Responsive Ad Slot

HLS Letter to HSA PJCC

Wednesday, July 16, 2014

/ Published by VIRTHLI
To,
The Programme Co-Ordinator,
Hmar Literary Day Programme.
Subject: Hmar Literary Day Programme-a kan ţhang naw ding inhrietirna
Dittak Programme Co-Ordinator,
July 18 – 19, 2014-a Hmar Literary Day Programme-a Paper present dinga i mi fielna kha kan ţhang thei naw ding a nih ti kan hung inhriettir che. Kan ţhang thei nawna san chu a hnuoia hin kan hung tarlang.
1. Hmar Literature Society-a Chairman le Secretary kan nina besana fielna hi kan dawng a ni a. Kan lekha dawng hi mimal hminga kan dawng a ni naw leiin, HLS Executive Committee Member inkhawmnaah hi thu hi kan intlun a. Dilsut taka kan hei hriltlang chun, Hmar Students Association hin a thawding tak thaw si lova, a thawlo ding thaw niin kan hriet a. Hnam puiin fepui le pawm dan mumal tak a nei lai zing a, hnam pui kalchawi sukchingpen zàwnga HSA-in hmâ a làk hi, Hmar Literature Society chun a thlawp thei naw leiin, kan ţhang naw ding a nih.
2. Kum 2013 October thla khan Hmar Inpui hmalaknain Hmar Linguistic Seminar huoihawt a ni a. Kha ţum khawm khan, Hmar hnamin fepui mumal tak nei a, India rama Central University pahni – Manipur University le Assam University hai chena inchûk ding Hmar MIL subject, lo ziek tah a ni lei le, chû style sukpher tuma inrawl an um ti hriet a ni leiin, Hmar Literature Society chun, Hmar Linguistic Seminar programme chu, a thlawp theinaw ding thu Press Release siemin, a lo thlawp ta naw reng a.
3. Hmar Students Association-in Platinum Jubilee hmangna ding le inzawma Essay Competition a huoihawtnaah, “Hmar Literature Society-in Hmar ţawng ziek dan a pawm anga ziek ding” tiin Competition-a ţhang dinghai kuomah inhriettirna a siem a. Hieng anga HSA hmalak dan hi thil lawmum tak a nih.. Amiruokchu, ieng thlisie hung hrangin am a nawt a ni ding, “Thumal / hawrawp ziek dan thuhmun ei pawimaw” ti le, “Ziek dan inanglo / indiklo langpuihai le a’n dik lem” tihai ziek ding le hril dinga mi ţhenkhat a lo fiel nâwk el hi…? Hieng anga Hmar Students Association hmalakna hi hnam ta dinga thil hrisel a ni nawh ti, HLS hin a hrietchieng leiin Hnam inthuruolna ni lova inţhedarna chi tutuhai hmalakna hi, Hmar Literature Society chun a thlawp thei naw a nih..
4. Hmar ţawng hawrawp le a ziek dan ding chungthua hin Hmar Literature Society hmalaknain Seminar le Workshop huoihawt a ni hlak a. Thutluknahai siemin chu thutlukna dungzui chun Central University pahni haia BA chena inchûk ding Hmar MIL (Modern Indian Language) Text-book-hai khawm ziek a lo ni tah. Chu chu sukpher zàwng le hnuolsuot zâwnga hmalatuhai hi, ‘hnam hmangaitu le hnam hmakhuo ngaitu an ni nawh’ ti hi, Hmar Students Association ţhuoituhai hin ngaituo hai sien ti hi, Hmar Literature Society dit dan a nih.
5. Chun, Hmar Ţawng hawrawp le ziek dan thua Hmar Literature Society-in Seminar le Workshop a buotsai hlak bakah, Hmar MIL subject inchuktirtuhai ta ding khawmin, ‘Orientation Course’ le ‘Refresher Course’, sum le pai harsa sa sain, kum tinin a huoihawt zie hlak a. Hmar Literature Society hin tangkasum laklutna – sum hnar iengkhawm a nei naw a. Text-book zawrnaa tlawmte te a hmu tinaw chu, public contribution le Government-a inthawkin, hmu iengkhawm a nei nawh. Mani mimal mansa pura thaw chùk chùk châng khawm a um hlak. Hnam hmakhuo ngaina leiin chuonghai chu tobopui pei a ni hlak a. Hieng nikhuoa writing materials sem ding inchawkna ding le, refreshment inchawkna ding tum theitu, Hmar hnam hmangaitu lai hin, um ve inla nuomum kan ti thei hle. Hnam inpumkhatna ding ni lo, hnam sukţhena dinga sum tuok nuomtu ei um lem tlat si hi, Hmar Literature Society chun pawi a ti a nih.
6. Hmar hnamin a fepui mèk, ‘Hmar Writing Style’ humhal hi Hmar Literature Society sinthaw ding pawimaw tak a ni a. Chu chû kalzàwnga hmalatu hrim hrim chu, tu mimal le ieng pawl khawm ni sien, Hmar Literature Society chun a thlawp thei ngai naw a, thlawp khawm thlawp ngai naw bawk a tih.
Hnam ta dinga ringum taka hma latu,
Hmar Lierature Sociey aiin,

Sd/- 
(L.Ruoivel Pangamte)
Secretary
(S.N.Ngurte)
Chairman
Hmar Litereture Society
Don't Miss
© all rights reserved
made with by Simon L Infimate