An Interview with Tv. Ebenezer Thuoitulien

Tv. Ebenezer Thuoitulien Chhangte @Bena Chhangte

-     Interviewer: LRS Puruolte 

Ei dam maw? Hallo Ben! A hmasa’n Lawmpuina Chibai Vochuom ka buk che. Inchûlai mek tam tak tadinga entawn khawm I nih a. Tuta tum chu hun I mi pek thei chun, I hlawtlingna le inzawm hin hohlim in la ka nuom.

Bena: Aw ka dam ie. Chibai. Aw ni raw seh. Chuonga I mi hohlimpui nuom phawt chun, hohlim naw mani’m. Ka lawm taluo. Lawm a um taluo chuh tie.  

1. I Biodata dit a va um de. Mi hril thei I ti?

Bena: Aw hril thei e. Hiengang hin a nih-

Name: Ebenezer Thuoitulien Chhangte (eldest among three)

Father’s Name: (L) C. Daniel Remruotsang

Mother’s Name: Helen

DoB: 20/12/1987

Siblings:

Lalringzo

Lalthuoilien Chhangte

Schooling:

Nursery to Class X in Assemblies of God High School, Rengkai
Class XII (Science) in Sielmat Christian Higher Secondary School
Graduation:

Subject Offer: B.Tech (Computer Science and Engineering)

College: National Institute of Technology, Hamirpur, Himachal Pradesh

University: National Institute of Technology, Hamirpur, Himachal Pradesh

Educational Qualifications:

Class X in HSLC, BSEM (74.34%)

Class XII in COHSEM (Science, 65%)

B.Tech (Computer Science and Engineering, 59.1%)

Permanent Address:

Edenthar, Rengkai, Churachandpur, Manipur

Hobbies:

Reading; writing; watching movies; hiking; problem-solving; Chess and others.

2. I hlawtlingna hi Lawmpui I um tak zet. Ka Chibai buk che hi Hmar le Zohnathlak inchuklai le mipui aiin mi lo pawm pek el rawh aw. All India Rank ieng zatna am I ni a? Hi I sin ang a in ziek tling eini mi kha tu tu hai am an ni tawl a? Khawlai hmun hmun am postingna ding mi hril thei I ti?

Bena: All India Rank chu 2,353 niin ka hriet. Kan Ministry a ding a ka tling inruol pui hai chu Mark Ngamthangrum le Lalthuoisang Pangamte hai an nih. Mark Ngamthangrum chu E/I, Kingston (Jamaica) a dingin posting a nghak. Chun, Lalthuoisang Pangamte ruok chu E/I, Osaka (Japan) a lo fe ta.

3. I hlawtlingna hi lungawium tawk I ti am? Sin dang i la beisei tum hmel am?

Bena: Pathien in ka sin ding hrim a mi pek niin ka hriet leiin ka lung a awi hle. Amiruokchu, a tha lem le ansang lem hai chu a remchang dan i zir ni tang a tih.

4. I hlawtlingna thuruk iem ni’n I hriet a? Nikhat a hin darkar iengza’m lekhatiemna’n hun I hmang tlangpui?

Bena: Hieng ang hlawtlingna ka chang hi a hmasataka Pathien le ka nu le pa tuisik ka ni a inthawka mi lo chawilientu hai zar lieu lieu a nih. Chun, taimakna le tumruna neia rimsik khawm tuor huom a ka lo thaw ve na zar hi Pathien khawmin kan rimna mi hriepuiin hieng ang hlawtlingna hi ka hung chang thei a nih.Ka hun nei dan i zirin ka tiem. Serious deua in prepare ding chun nikhatah darkar 5/6 dam hi tiem thei chun a tha.

5. Foreign Service (IFS-B) inziekkaina ding hin ieng chen am in buotsai/iengangin am I hun I lo pek a?

Bena: Inbuotsai ti em a SSC CGL a ding chun chuong talu a inbuotsai a um hran nawh. Insung harsatna leiin pawlkuo ka ni a inthawk ta khan tution hai thaw in pawlsawm pahni ka zo chen khan ka school tin hin tution ka thaw a, zan hun a chu ka lekha hai ka tiem ve nawk thung. Pathien zarin kei le kei chu ka hung intodel ta pei a. Engineering ka’n chûk lai khan MBA a dingin ka lo in buotsai a, graduation zo khan chu SSC CGL a dingin a hran pa tak chun ka’n prepare ta nawh.

Kum 2010 khan graduate in Civil Service a dingin in prepare-na lungril ka hung nei a. Ka thei ang tawk a thaw dingin ka hung in buotsai tan a. Ka hun awl nei po chu lekhatiemna ding chun ka’n riruong a. Coaching a hai khawm thang nuomna lungril hai chu a um. Amiruokchu Pathien remruot am ani ding Oct, 2010 khan ka pa’n a mi zuk boral san bawk le khawvel khawsakna thlirin SSC tieng pang hin thang lak phawt lem ding a nih, tiin decision ka siem a. Ka first attempt-na dingin SSC CGL, 2011 exam chu pe ve dingin ka’n buotsai a. Result a hung suok chun Pathien zarin ka tling ve ta hlau a ni kha.

6. IFS-B/Group-B ti umzie tak hi iem ani a? Promotion ieng chen am a um thei pei a?

Bena: Staff Selection Commission in Combine Graduate Level Exam a conduct-na hnuoia Ministry of External Affairs hnuoi a sin hmu hai hi IFS-B or Assistant ei ti chu a nih. Chun, IFS-B hi Group-B Non-Gazetted a nih.

Kum nga service hnunga UPSC conduct nain Limited Departmental Examination passed chun Section Officer ni thei a nih. Section Officer chu gazatted officer ni theina hmasatak a nih. SO chu kumriet chel hnunga Under Secretary kai thei a ni bawk. Chun, Under Secretary kum li an chel hnung a hin Senior Scale a kaisangin IFS cadre a sie anni hlak a nih. Under Secretary to Deputy Secretary 8 years. Deputy Secretary to Director 6 years. Director to Joint Secretary 4 years. Director hai chu rambung chin deu a hai chu Head of Mission an ni phak tah. Chun, Joint Secretary chu Ambassador le angkhat char a nih.

7. Iengangin am Office ah sin in thaw tlangpui a?

Bena: Kan sinthaw dan hi an angnaw thei khawp el. Headquarters (New Delhi) a kan umsung hin chu a tlangpuiin noting, drafting, reporting, accounts, records maintenance, filing le Indian Missions hmun tin a mi hai Headquarters (New Delhi) a inthawkin a tul dan i zir in kan enkai a ni tak. Kan va postingna hmun a hai chu, a Missions chin le lien dungzuiin kan sin chu a tamin a tlawm thei bawk a nih.

8. Mi kum zat le hlaw hi michangkang le hnam var deu hai chun an indawn ngai naw a. Amiruokchu, a tul ve chang le hun a um tlat hlak a. Midang hriet I phal chun hriet nuom a um bak el.

Bena: A ni ngei, amiruokchu hlaw hi chu lekhatiem le sinzawng a ngaiven tuhai chun a tlangpui chu an hriet tho in ka ring.

9. Algiera a i posting ding ti chanchin ka lo hriet a. Iengtik vel am i fe hmel? Foreign Posting hi a umdan tlangpui i mi hril thei ding?

Bena: Buoina dang a um hran naw a, Pathien in rem a ti chun September thla bul vel hin ka fe hman ngei ka beisei. Kum hni sung vel hi New Delhi a um phawt in vacancy i zirin foreign posting dingin kan suok pei. Kan va posting-na hmun a kumthum va um kan ta, chu zo a ramdang khawm apply nawk thei a nih. India tieng a kir kan nuom lem a nih ruok chun kumhni vel kan umnawk phawt a ngai. Ministry of External Affairs hnuoia thawk ansang tak a inthawk LDC le Multitasking hai chen khawmin Foreign Posting hi an chang thei.

10. Upa lem met nina ah hi Tlangval la upalo tak el. Kei lem chun I naupanglai khawm ka hriet a. Naupang fel tak, biek thei tak kha I ni hrim hrim a. Iengtik am, ieng mi deu am? mi dum am? Mi ngo am? Khawtieng ram mi am? Ienghnam am? Vacancy a la um am? A hnai tam? Ti hai dam hriet chak a um bak el.

Bena: Aw nei hun chu um ve ngei ding chu ana. A ngo le dum nek hmanin khawsak dan kawng a ka’n rempui le ka’n milpui thei ding a ni chun ka lung a awi. Pathien remruot chu hung um el naw nim tiin ka’n nghat.

11. Ruonglevaisuo Education Society (RES) kha nangni bul tan phut niin ka hriet a. RES Product hi iemanizat hriet ding an/in lo um tah a. Kha kha ieng ang taka hung suok dawk thei? RES hin Hnam damna dingin sin ropui tak a thaw a. Hmar Education Missionary Society ah kei lem chun ka sie nghe nghe a nih.

Bena: Ruonglevaisuo Educational Society kha 2011 khan indin tan a hung nih a. R.E.S hin a thiltum chu pawisa/sum hlawkna zawnglo a education tieng pang a eini mi Matric, Higher Secondary le Graduate ta chin hai in sorkar a sin ei hmu theina ding a Coaching huoihawt kha a nih. A bik takin Staff Selection Commission (SSC) exam hluor deu a coaching hi huoihawt a nih.

           

A tir chun Prof. L. Ruoivel Pangamte inrawina in Lalthuoisang Pangamte, Lalhmingthang Sawngate, Mark Ngamthangrum le kan panga chun Coaching chu HSA hai le inhrepawin, HSA campus, Rengkai ngeia thaw thei ding chun phalna la in, Coaching chu kan hung tan ta ngei a. Free coaching kha 2011 kum tawp khan 1^st Batch chu Rengkai HSA Campus a tan a hung nih a. Registration fee tlawmtete pe in thla thum sung chu free in kan hang thaw phawt a. Coaching material hai chu a thlawn a sem a ni hlak bawk a nih. Chutaka inthawk chun kumkhat a vawithum dam huoihawt a hung ni pei a nih. Chuongchun, Guwahati a hai khawm zu fe in HSA hai le thangruolin coaching chu huoihawt a hung ni nawk ta pei a. Pathien zarin vawisun chen a chu mi 20 chuong zet Coaching a thang hai chu hlawtlingna chang hmu theiin an lo um tah. 

12. Inchûklai mek hai le an nu-le-pa hai tading a incha/Infui nuom iem I nei a?

Bena: Inchûklai  mek hai ta ding chun tumruna le terei peina nei hi a pawimaw tak in ka hriet. Lekha tiem dan hriet le hun hmang thiem a pawimaw hle. Chun, ka ngaidan a chu inchûklai ta ding chun “Mobile” le “Facebook” lakah hai khawm insiekieng a tul hle. Chun, ei career ding hai hi chu midang dang tawng lak el nilovin ei inhnikna ngei a fe hin career a siem tak in ka hriet. Chun, hnam var le mi changkang hai chun darker in sin an thaw ang bawkin, ei hun hmang dan hai hi enfel hlak inla thiltha ni ngei a tih

Nu le pa hai chun nauhai inhnik zawng le nuom zawng chu naupang chikte anni a inthawkin an hrietpui a tul. An nauhai nuomzawng le inhnikzawng chu an thei ang tawk a taksa le moral support pek a tul in ka hriet.

13. Ei Society le Kohran fe mek dan a hin mipuihai iem Education le inzawmin thurawn pek nuom dam I nei am?

Bena: Eini rawi chu Society thil a tlawmngai thei tak le social activities ngai pawimaw mi tak ei nih. Education hi lekha el an naw a, ei Society a tlawmngaina le taimakna kawnga a hmang thangkai chun hmasawnna pakhat niin ka hriet. Amiruokchu, mani hmakhuo in hmang rak khawp chu inlau a um hle thung a nih. Mani sin thei ang tawk a thaw hi Pathien in a lawm tak niin ka ring.