Dr. Amo Tipaimukh biel fangin an zin

CCpur, May 28, 2014 (HT): Chairman, Hill Areas Comittee (HAC), Govt.of Manipur le Tipaimukh A/C MLA Dr. Chaltonlien Amo Vangai biel, Tipaimukh biel fang dingin an zin mek a. May 23, 2014, 11:00AM khan Patpuihmun khuo ah Vangai tlangdunga khuo tina hotuhai inhmukhawmna neipuiin Vangaitlang suk hmasawn dan ding hrilpuiin ruoi a thepui bawk. Chun, May 26, 2014 chawhnung dar 2 khan Ankhasuo phaisung po po a khuo tin a hotuhai an pawlpui nawk a, a biel hmasawnna le hmatieng peia hmalak dan ding hriltlangin ruoi the a ni bawk.

Zani zantieng 2PM khan Jiribam PWD Guest House ah Vangai (Tipaimukh) concern Department tin head hai ZEO, Jiribam; DFO, Jiribam; EE, Electricity; EE, PWD le EE, PHED hai an hmupui a, Vangai, Tipaimukh a hma hrat taka lak dan dinghai a hrilpui.

May 28, 2014 in Zomi area Vangai hai leh Jiram hmun ah inkhawmna neipui bawk a tih. Bufai normal quota baka additional quota in bag 400 sem thei dingin sukfel nghal bawk a tih.

Vangai pumpui Electric la tlung le varnawna hmun Sartuinek chena invarsuok tir ngei dingin Department hai le biel mipuihai thangpuina ngenin hma a lak bawk a. Vangaitlang dai tawk ding Electric ban tuhin Ankhasuo thak tlung vawng a ni ta a. Department hai le thangruol in 2014 chena a varsuok ngei beisei a ni thu a hril.

Tuhin Jiribam ah a la cham mek a, a tul chen chena, a biel mipuihai harsatna sawmdawl dingin biel mipuihai leh an inrawntlang zing tiin Pu Lalhossan, EM, ADCC a inthawk ei thu dawngna chun a hril.