Aizawl: Kum thara Mizoram election um ding le inzawm'n Mizoram People Forum le Political party hrang hrang haiin election thienghlim taka um theina ding tiin MoU an signed. Mizoram People Forum hi Mizoram Presbyterian Church hai hmalaknaa 2006 kuma indin alo nih.Hi taka political party signatories hai chu Indian National Congress (INC), Mizo National Front (MNF), Zoram Nationalist Party (ZNP), Mizo People's Conference (MPC) le Bharatiya Janata Party hai an nih.
An memorandum sign dungzui chun Mizoram People Forum hin election le inzawm thil iengkim enthlakna sin a thaw ding a nih.
Election neina hun ding anthawka ni 10 hma chu rally nei phal ni naw'ng ata, motor hmanga voters hai polling station a thak phallo, door to door campaign le thil pek hai khap ani bawk ding a nih.
Hienghai baka party flag, banner le poster hai khawm council member neizat dungzuia hmang phal chau ani ding a nih. Village council member 7 nei hai chun 3 banners, 30 flags le poster 20 chen nei thei an tih. Election campaign sung chu supporter han party T-shirt, badges, stickers le lukhum hai an hmang khap ania, organisation le NGO haiin an hlawkpuina ding thil/sum hni phal ni naw bak atih tiin MPF thusuok chun a hril.
