Hmar People’s Convention (D) General Hqrs. Sinlung chun, demand area sungah khuo 15 laia VC inthlang buotsai phal naw le thawluina hmanga YMA-hai an in ṭhiektir chu ṭha a ti naw a, VC inthlang buotsai vat le YMA-hai zalen taka indin nawk an nuom ti thusuok siemin an puong.
Jackie Hmar, Information Secretary, HPC(D)-in tulai hnaia thusuok a siem danin, Mizoram hmar tieng mipuihai harsatna sukkieng ding le, sawrkar anthawka an chanvo ding indiktak an dawng theina dingin HPC(D)-in hma a lak zing laiin, thawktuhai laiah mi ṭhenkhat induthaw deuhaiin demand area sunga khuo 15 laia mipuihai chu an aiawh khawtlang ṭhuoitu VC thlang thei lovin an rikrap a, thawluinain YMA ṭhiek dingin an vau bawk a, hieng ang chi bik inthlier hrangna le hnam bik chawi vul tumna hi HPC(D) Gen.Hqrs.Sinlung chun ṭha a ti naw a ni, an tih.
Demand area sunga chenghai ieng hnam khawm nisien hmasawnna rabi thar sira sawrkar anthawka an chanvo diktak an dawng theina dingin ke a pen pei ding ti puongin, Mizoram sawrkar chu khuo 15-ah VC inthlang buotsai vat dingin a nuom a, YMA-hai khawm function nawk vat dingin an nuom ti thusuoka chun an tarlang bawk.
Pawl le pawl inrikrapna leia lunghnur el lo ding le, hmasawnna lam hraw dingin titakzeta ṭhang la ding le, demand area sunga ieng hnam khawm thirbikna um lova lungruol taka hmasawnna lam hraw dinga ṭhang la tlang ding dam in HPC(D) chun a fiel a, mipui harsatna le buoina sukkieng dingin hma lak pei an tum ti an tarlang bawk.
~Vanglaini
