Tipaimukh-ah HSLC Exam Centre le Hr.Sec.hawng tuma hma lak a nih- Dr Amo

CCPUR: Tipaimukh A/C MLA le Hill Areas Committee (HAC) Chairman, Dr Chaltonlien  Amo chun  zani sun dar 11:00 khan Rengkai High School-ah Tipaimukh biel-a Govt. School  Headmasters hai meeting a neipui. Hi huna hin Pu Lalhossan, EM, ADC, CCPur  (Vangai MDC), Pu Lalhmangpui, MDC (Parbung  bieltu), Pu Lalditsang, MDC (Senvon bieltu) le Additional Director (Hills) Education;  Joseph Lalrothang, ZEO, CCPur  le Parbung Police Station OC le SDO, Parbung hai khawm an thang.

Tipaimukh biel sunga sawrkar school hai siem that dan ding le hmalak dan ding hriltlang a ni a, Headmasters hai chun School building hai ngirhmun, staff umzat le student um zat hai report an pek bakah harsatna an nei hai an hrillang.

Bieltu MLA Dr Chaltonlien Amo chun, Tipaimukh biel-a hin HSLC Exam Centre le Higher  Secondary School pakhat ve ve bek nei tuma hma lak mek a ni a. Chuonghai sukpuitlingna  ding  chun a bul tan that a pawimaw zie uor  takin a hril. Meeting zo zantieng huna DI Tipaimukh hmalaknain ruoi hlim taka kiltlang a nih.

Tipaimukh A/C huomsunga hin School tum tum 75 a um a, hienghai lai hin Government le Aided School 32 a um a nih.

~HmasawnnaThar