Naupang sikul kai thei ruol ka ni a inthawk Hmar sikul a lut ṭan in, A, AW le Zirtirbu inchukin kan khuo Parbung EAC sikul a ka lut a. Sikul ka kai pei naw leiin ka nu’n zingkar sikul ka fe ding zat hin hmawlin a mi vuk tlung zie hlaka, ka kai pei naw na chu ieng dang nilovin; ka thiem theinaw el chu thuhran, insung harsatak kan ni leiin ka sanghai dawn a ngai hlak bawk. Unaua upatak ti taka, insung sin po po tlaisuong, ṭung nawt le insawp chen ka thaw hlak lei in thabona khura ka thlulut sa ta. Hun a hung liem pei chun, ka nu thahnem ngaina zarah, pawl pangngai chen hai nei thei ta in; Hmar sikul a chun kan chuk zawm ta peia. Mi anga thiemthei ka ni naw baka, Sapṭawng subject bukhat kan neisun chu ka la tiem thei naw nawk ta pei a.
Pawlruk kan chuk phak ta hnung khawm chun sapṭawng chu ka la tiem thei naw ta rawp el a. Harsa ka ti thei em leiin sapṭawng period a hung um phat hin chu ka zun; hnawm a suok zak el hlak a nih. Chuonglai a ka undam; tu hnunga ka ngaituo hin iengtin am pawl ka sawn thei a, ti hi; mak ka ti chu a la nih. Sienkhawm Hmar zirtirbu le A, Aw ka lo inchuk hi tulai ṭhangthar keini neka naupanghai hang ti ve khanglang lang, nekin, neka Upa inzana ka nei lem dei in ka hriet. Asanchu, zirtirbu kha a lo ṭha em a. Hun a hung fepei chun, pawlsari ka ni ding kum chun, ka nu le pa’n sap sikula kai ta dingin an mi ti a, ka hawphur em em el ta a. Sapṭawng ka tiem thiem naw khela, ka pawl kha ṭhumhnuoi a ngai nawk ding ana. Chun ka kum inruolpuihai le ka class-mate’s hai neka kan hnuoilem ding chu, kan zak nawka. Nisienlakhawm, Hmar sikula khan ka pawl inchuk ding aum ta naw si. Sap sikula kai hlak chun, pawl ṭhumhnuoi a ngai bawk. Amiruokchu, lo thei lo na leiin pawlsari ka ni ding kum chun, Pawlli thaw in sap sikula chun ka lut ta a, kan pawl a chun a thiem nawtak ka ni nawk ta peia. Home-work hai reng reng khawm hi tawite khawm nisien ka By-heart thei ngai naw reng reng. Sapṭawng ka tiem thei naw leiin. Chu kum 1994 kum chun, kum chanve kan hung kai ta a; ka hung man ṭan ta maw ka ti ding Chauvin, damnawna nasatakin a mi thlakbuok naw ta a. Thlaruk lai, Christmass tawm chen chun ka damnaw ta a. Kum tawp exam result hlim taka kan khawzawla ruol le pai haiin an result ena hlim taka an pasI an lawm lai chun kei khawm kan hotuhai lunginsietna zara subject tina pasi mark sawmthum an mi pek ve a, ka hming a tawp taka. Third-ah Pasi ti an ziek ve a, ka lawm in ka hlim kher el.Exam lovin ka pasi ve a ni chu!!
Kum 1995 hung inhersuok nawk chun, pawlnga kan khuo Jubillee Standard School (RPC) a chun ka lut nawka, pawlnga chu kan chuk ta a, sienkhawm thleirawl nungchang inhmanglai hun thingtlanga chu kan ni ve ta leiin, nungchang mawinaw kan inchuka, insunga thil nu le pa haiin harsa ngawi ngawi a an thlan tla zawi zawi a; nitina nisapui hnuoia an I thawsuok chu, zawr ruk ka la hang chieng nawk ta pei, sikul kai pei naw chu thuhran, thiem thei naw nak a lai a. Hmabak chu a pik ie…. Chu cho chu ni lovin, kan sikul Teachers common room hmunhnawk an phit thlakna hmun kha kan pum inlengna tawk an kuo a uma, chutaka chun lut in exam questions paperhai chu akimin kan inruk suoka,exam huna nasataka tiemhai nekin kan thaw ṭha in, kan pasi insang nawk hlak a ni chuh. Ka lo va invet ngei deh!!
Chuongchun, hun a hung fe pei a, pawlruk inchuk dingin 1996 kum chun C.C.Pur Sunchine Sielmat a chun, kai dingin kan pai suok nawk ta a, chu kum chun ,kum chanve bawk buoina leiin pawlruk kan chuk nawka, kum chanve dang chu TALAN ram ah sinthawn ka hun ka hmang ral ṭhak a, chu kum chun sinthaw rinumzie, sawl umzie le harsatzie ka hriet ta a, inchukna tieng ka piengthar pha ta lem a. Kum 1998 a hung inhersuok chun pawl ruk khawm pasi lovin kan khuo Parbung ah bawk pawlriet ka hang in chuk nawk ta a. Sikul kai mumal lo chu thuhran pawl mumal inchuk naw nak a lai, kum Upa ta bawk ka tiem nasa ta em em a. Sienkhawm mi sawmpahni ka class lai chun a thiem nawtak ka la ni nawk ta peia. Pawlriet chu ṭhatakin Second-ah ka pasi a, a kum nawk chun C.C.Pur a pawlkuo inchuk dingin ka fe nawk ta a, chu kum a inthawk chu Pathien in ka piengtharna le ka ringumna a mi lo hriet pek ni ta ngei a tih. Ka pawlkuo inchuk anthawk chu, class-ah mi sawmruk chungtieng deu vawng umna ah a thiem thei pawl ka hung ni ta peia, hotuhai inza le biek ka thiem bawk, anmi ngaina in lawm ka hlaw ta a nih.
Pawlsawm hai chen zo thei in ka um ta pei chu, Lalpa malsawmna ka I dawng ka theinghil thei ta naw chu a nih. Sienkhawm pawlsawm ka zo chun, insung kan harsa em leiin ka nu le pa’n chawl dingin an mi ti zet chu, vuk zek angin ka na a, in awkhlum chen tumin hnam hruol chawi in kan in chu zanah ka suoksan a, nisienkhawm, ka ṭawngṭai ta lem a, chun zingkhuo a hung var chun, ka Pu ka ngaisang em em EAC Upa chawimawina hiel dawng tu G. Manlien chun, ka tupa hi ka dam tawk tawk suong chu sikul akai ding a nih tin, chengkhat khawm nei lovin C.C.Pur tienga fe dingin ka nu le pa hai ahril a, kei chun ka kai peinaw lai inmi vuk a, sikul chen chen; tun kan hnik phingin in min chawl tir tuma, ti in ka nu le pa ka chier khum a, chu hnung chun, ka Pate Roding mi hmangai em em tu, kuoma um dingin ka fe ta a nih.
Sawrkar sikul le chawmna sikul, fee umnawna ngawta kai ka ni leiin sikul ṭha pangngai deu a kai kan hawk ta em em a (A danghai aṭha naw ka tina nilovin) Sielmat Christian Hr. Sec Sikula lut chu ka chak em em a, kan zo naw ding ti hre lang khawm chutaka chun admission ka thaw ta rawk a.Sikul kan hang kai tan chun, Aiman zakuo leh hlim em em in nal inti em em hin kan hang ṭan ta a, alo van hawi ngei deh, hril dan ding khawm ka hriet nawh, hril ta dal ka tih. Chutaka hotuhai chun thiemtak le hmangai takin an mi enkawla, pawlsawm pahni Science 1st a hai chen zo thei in an mi siem nawk ta pei a. Kum tawp a hung ni chun Scholarship chu an hung sem a, keini ka ruolpa Hmingchunghnung leh lak ding hi kan nei ngai nawh. Sikul fee-ah kan pek vawng hnung in chengkhat dam kan chang phak ṭawk hlak. Vawikhat lem chu kan scho--- khan a dei naw a, cheng zahni sawmnga (250) lai kha kan Clerk pa’n a mi ngaidam a, Tuchenhin chu kan la hrilin kan la hrietzing a nih. Tun chu Pathien lunginsietna le kaihruoina zarin Degree hai chen inchukna khela sin malsawmnahai chen dam hmuthei ngirhmuna mi siem tu chung pathien le mi lo enkawl tuhai zarin lawman dar an ri ta lem a nih.
