Bangalore khawpui hi India ram Metropolitan city a chuh ka hmu nuom pawl tak, vawi iemanizat relin ka fetleng tah hlak a chuh, cham a belchiengna hih kala nei ngai naw a. “Silicon Valley/City of India” an ti nasan dam, “Garden City” annawleh “India’s most expensive City” anti dam chanchinbua hai ei lo hrietve hlak a. Chubakah a boruok inhawi zie le IT tiengpanga khawvel hrieta khawpui changkang Sofware company lien tak tak Infosys, Wipro le dang danghai ofis lien innghatna ani leiin ramdangmi khawma an ngaisang em em ani leiin hei belchieng ka nuom em em hlak a nih.
Vangneitlak takin ofis sinthawna le inzawma Mysore khawpui a meeting nei dingin Tarik Ni 9th February 2012 ka fe tum khan Bangalore a cham theina hun remchang ka siema. Bangalore International Airport ka thlung a, Tlangval fel Laltlansuok Khawbung hi airport a thawklai zing le Pu Robert L. Sungte haiin an milo ngaiven leiin buoina um der lovin Pu Sungte in tieng kan tlung tah a nih. Pu Sungte hih Deccan Herald newspaper ah Senior Sub-Editor le Senior Reporter sinthaw mek a ni a. Chun, tuta ei Hmar tawng website inlar INPUI.COM bakah Mizonews.net, Mizoramexpress.com, askofficer.com, mothersforum.org hai neitu a ni bawk.
Airport a inthawk kan hungna vawitieng-changtieng ka mit kan len vel a, lampui intluonin Pu Sungte’n, a khawpui kan hmu phak chin thil inchiktlakhai chuh kan dawn hman ami hril zung zunga, a bengvar thlak ngei el.Lampui four lane a siem deu vawng hieng lawm lawm a indai, fly over a tam em em el chu tie.
A khawpui hming hih Bangalore ti ni tah lovin a Kannada tawng (a ram tawng) hmangin Bengaluru tia tlak an tah. Khawthlang ram hieng- America le ram changkang tamtak haiin IT tiengpanga Company lien lien an hung innghatna hmun pawimaw le an ram nekin fak le dawn le nitin khawrsaw man a tlawm lem bawk si leiin thalai tamtak an hung fuonkhawmna khawpui a nih. Chuleiin, American President nilai zing Pu Barack Obama meu khawma America economy suksangna dinga a ngaimaw phak ‘Say no to Bangalore and yes to Buffalo’ tia a lo hril phak hiel khawpui a nih. Chuongchuh ani leiin BPO/Call Centre hmunpui India ram hmun hrang hrang a thalaihai tlan khawmna hmun pawimaw a nih. Kawtthler a thienghlim a, lamlien a tlunin an hawi bawk, a boruok an hawiin an nem.
Zantieng ni nema thalai insuk thawveng nuomhai tadingin M.G.Road, Brigade Road (Commercial Street) le Lal Bagh Botanical Garden hmunhai hih duthusamna hmun ani hmel. Mihriem chi an kim a, inthlahrung lo taka um theina hmun a nih.
Bangalore khawpui hih an hawi em leiin hmatlir nei em em lo thalaihai tading chun umna chi ni kher naw nih. Nitin mamaw, thuomhnaw le inlawnna (travel) man a tam a, a tamlem chun in a inthawk internet hmanga dawr thei vawng ana, keikhawm ka tlungin a inthawk ka fena dinghai inkei buoi chekchuk umlovin ka sukfel thei vawnga a remchang kher el.
Shanti Nagar a um Pu Jonathan Kungate Hostel siemna ah kan va lenga. North East tienga studenthai tadinga rawngbawlna tha le hnam sukmawitu nin ka hriet. Ama zarin Bangalore khawpui a ei unauhai insuk chawngpu lurin an um thei a nih.
BANGALURU ZAWNGTA :
Forest department haiin anphun ni awmtak lamlien kawla thing insanglo tamtakhai khuh zawngta deu vawng ana, ara chuh kutpha chen chauh, a ziet inhawi deu, phak derlo a nih. A rammi haiin an fakve si nawa, i dit zat zat man bova lo thei a nih. Hiengneka zawngta inhnik hih kala bak (fak) ngai nawh. Mak deu a nih! Inhro tawl ita, i kumkhat fak ding chauh chuh awlsam takin i hungphur el ding a nih. In man thei thilkhap annaw a, ti ding a um nawh. Chuleiin, Zawngta duhai chun ara hun inchan unla, chu huna chun inzin ro. Insir kher naw ti niu.
Bangalore a hin eini Hmar tawng hmang 150-200 bawrvel an um a, sawrkar le company a sinthaw iemani zat an um a, student college, university le institution hrang hranga inchuklai an um bawk. Bangalore Hmar Christien Fellowship a um a, Lingaraj Puram a Vivya Shanti Church ah zantieng Dar hni a inkhawmna an nei hlak.
March 11, 2012 (Pathienni) khan keikhawm ka van khawm vea, thalai deu vawng an nia, mi lawmlut le chawimawi an thiem ngei. Pastor Robert Vanlallien keihruoina hnuoiah phuisui takinsacrament rawngbawlna nei ani nghe nghe a. Hril nuom nei hril dingin chanvo hlutak el an mi pek nawk nghal, ka vang neiin inkhawm an man hla hlein ka hriet. An inthuruol khawp ela, hi fellowship a thuoituhai hih hnam le khawtlang thila thawding le buoina a um chang khawm an mawphurna a ngai ani leiin Biekinah an puonga an inzo pei el. Hi a nih, Kohran pawl bik umlova hmunkhata inkhawmna ra suok le a thatna chuh. Tu kohran pawl khawmin zu chawkbuoinaw hai sien nuom a um.
Churachandpur, Manipur ah Thenmuol Hmar khuo kohran pawl umlo Local Church an um vea, kum 2009 khan ka van khawmve tah nghe nghe. Khawtlang thilhai hrim hrim Biekin a puong thei awm chuh an puonga an inzo pei el. Kohran pawl hrang hrangin chawkbuoiin kutrawl tum hlakhai sienkhawm Pathienin a thangpui hlak leiin inthuruol takin khawtlang le kohran an fe peia, khuo inhnar um a nih.
Hiengneka Bangaluru chanchin hrietding tul le pawimaw tamtak a uma, ka cham tawi em leiin, hi khawpui hih kala belchieng naw a, inzin nawk pha chuh hunsawt deu hlek cham dinga insiem a, hi khawpui nun le mipui chetdan hih hrietchieng a tha awm.
(Kan zinna –VIII Next)
19th February 2012
