HNA chun, HPC (D) ṭhuoitu laia inhrietthiemnawna suok leia Hmar thalai thisen luong mek chu suktawp ngei tuma hma a laknaa hmangruo tangkai em em ding, “HMAR HNAM CHUNGTHU LE INTHLANG THLIRLETNA” ti thupui hmanga lekhabute a siem chu tlangzar ani tah a; Hmar ṭawng hre taphawt chun lo tiem seng dingin HNA chun ngenna a siem a nih.
Remna meiser ni ngei dinga beisei, Hmar hnam chungthu le inthlang thlirletna lekhabute thupui tak chu, Hmar hnam sunga HPC (D) sungthu buoina remfel el chau nilovin, thulehla chungthua Ṭ le Tr etc. chungchanga ngaidan inkalna lien tak pieng mek dam, kohran chungthua in er na dam le, inthlang politics thila ei inhmelmakna hlak leia ei ram ei hnam chu, hlamzui el theina ding ngirhmuna a ngir meknahai ngei khawm hi sukbo vawng ani chun,ei hnam, Hmar hnam hi an dintu le a siemtu Pathien hringin mak le danglam taka a hung zawngsuokna san le, inṭhut a tumna hmun indik tak chu mitin a chin a lienin ei hmuin ei hriet thei ta ding a nih. Chuong thil chu a tlung theina dinga mawphurtu lien tak le a kaikuongpa ngirhmuna ngirhai chu, ram le hnam hmangaia insala mani hringna ngei khawm inro loa bawttu pawl, HPC (D) pawlhnia inthehai hotu, Pu Lalhmingthang Sanate, Pu Zosangbera le HNA hotu LS Lungṭauhai pathum le Pathien inkar chu a fel zet a ṭul ding a nih, ti hi a nih.
Chuleiin, Hmar mipui zaa za-in an duthusam le an beisei, REMNA LE MUONGNA chu, ei ram le hnamah an lengna dinga dal tlat hlaktu,ṭhuoitu ngirhmunah ngir ngam sia, sienkhawm ṭhuoitu ngirhmun chu a thienghlim le thienghlimlo hriet tum na lungril hrim nei lo na, sungril ngaituona mawk tak el, Hmar hnam ṭhuoitu ṭhenkhat sungrila kawp tlat el chu, nuoibo ani ngei theina dingin mitinin remna meiser, “HMAR HNAM CHUNGTHU LE INTHLANG THLIRLETNA”ti hming chawia lekhabute buotsaia um chu, ngaituona inril tak nei pum rana lo tiema, a thiltum ngei khawm chu a hlawtling theina dingin, Hmar hnam Pathien chu inthlahrungna nei der loa lo dawr mawlh mawlh dingin eiin fielin eiin ngen a nih.
Dated: Hmar Runpui -HR Khawbung
14th May 2012 Secy. Information & Publicity
