Aizawl: Mizoram Police chun tulai hnai khan Mizoram sunga Bank hrang hranghai, Electric Power petu line pawimaw le nitin mamaw supply-na hmun pawimaw a thawk hai chu HPC (D) haiin an target tum ti thu intelligent report a um leiin, inralringna thu an suo mek nia hril a nia. Aizawl khawpui sunga bomb sukpuok tum ni awma hril a um bawk. Intelligent tienga inthawka Police hai'n report an dawng danin, HPC (D) hai hin power line pawimaw tak Manipur, Loktak Hydel Project le Jiribam inkar suksiet an tum bakah, National Highway No.54, Silchar le Aizawl inkara leilak le culvert hai suksiet el bakah, Aizawl khawlai hmun amanih bomb sukpuok an tum niin an hril.Hienga thu um lai zing'n Zirtawp zan khan Aizawl Tuikhuatlang-a PHE tanky lien chu tur phul tum ni awma thuthang a um leiin Police thahnem tawk takin khawvar zak'n an veng a, mipui hai khawm an chi-ai hman teu ti thu dawng a nih. Hi chungchang hi Aizawl SP chun tulai boruok thlirin, fimkhur na thua Police haiin an veng lem chau niin a hril.
Kha hma met khan Mizoram Police hotu hai thungkhawmna a thurel angin May ni 11,2012 (Zirtawpni) ainthawk khan HPC Demand Area-ah Police haiin Flag March an nei tan a. Kolasib District a chun District SP, Madhur Verma le Ist Bn IR Commandent H. Lalchhuanliana inrawina'n Vairengte, Saiphai le Saipum khuo ah Police haiin Flag March hi an nei.
Flag March nei hma met hin Police hotu haiin Vairengte SDO (C) baka khawtlang thuoitu inkokhawm'n Police haiin Flag March an nei nasan hrilfiena an nei. Tulai hnaia HPC (D) inti haiin an Demand Area huomsung nia an ngai Vairengte le a sevel khuoa VC hai kuoma donation dawlna lekha an pek le YMA hai kuoma lekha an pek chungchangah mipui hai thlamuong chu an thil tum a nih thu an hril a nih.
Mipui hai chu chi-ai lo dingin an ngena, iengkhawm tlung sien mipui hai thangpui ding le venghim dingin Police hai chun an inpei zing thu an hril bawk. Police thuoitu hai chun mipui hai kuoma donation dawl chu dan kal a nih ti hril in donation pek khawm dan kal tho ti an hril. Hienganga donation an dawl lei hin thubuoi pa 9 zieklut a ni tah thu an hril.
~Zalen
