Tariki Ni 8, December 2011-in Mizoram a HSA Jt. Hqrs. kum 1986 indin a hotu hmasa President term tamtak lo chei tah hlak Pu Laltlanchhunga Hmar leh HSA khawmpui Lien vawi 53na Sakawrdai, Sinlung Hills Development Council, Mizoram, Headquarter ah Tarik Ni 9-11, December 2012 a thang dingin Circuit House, Aizawl a inthawk kan suoka. Darlawn le Sailutar inkarah Gate mawi le lientawk taka siem SHDC ramri charah WELCOME, SINLUNG HILLS DEVELOPMENT COUNCIL tikan hei hmu chuh hmulthi an ding sur sur ela. A bula tentui inkhaw thla hieu hieu tuidawra an laksawng chuh kutin kan daw a, kan hei dawnzo chun Mizorama thisen le nunna tamtak senga ei suoldawk SHDC ramri gate banhai chuh kuoin, bieng leh chuktuo’n thla kan lak mawl mawl a. Chun, kan hei penluta ‘Aw kan Hmar ram inthim tlang dumduoi…ti hla sakin motor kan khal luta kan tlan nawk tah a nih.
Lamsak-lamtlang thing le ruohai chuh ramdanga mihai leh an danglamna ka hrietchuong dernaw a chuh Hmar ram thing le ruo ani lei a ni awm, ka hmangai ngawi ngawi el a. Zantieng ni nema virthli hung hrang del delhai khawm Hmar ram virthli ani tlat leiin ami tawk dan hmundang nekin a dangin ka ha a dam sawng sawng bikin ka hriet tlat chuh.
Hi Ienglei am ning ati aw. Pathienin Hmar ni dinga ami siemna, chu hnam hmangaina lungril inno lei ani ka ring. Lamlien a tha a, a enkawltu dinga ruothai khawmin an sukfai hne hle’n ka hmuh. Lam kawla hmunphi, Tierhrep, Luong, Hnathiel, Ngaidi, Sizo le thing chi hrang hranghai le rannung anlo inhram ve chuk chuk a, lung an sukno ngei el.
Kum sawmhni liemta a kea kanbielfangna lampui New Vervek le Sakawrdai inkar lem chuh Bul Dozer hmangin an nawr tlut tlut lai tak ani a, a khu deuva chuh anzo huna chuh a van hawi awm de aw. Sakawrdai tlunghma chawlhmun ah hadam takin kan la hei chawl a. Zan thla var em em a, boruok inthiengtak karah ruom le tlanghai kan hei thlir a, a mawiin kan en nghawk nawh.Kan nghatna tieng tieng zan khawthieng nun chena rannung inhram velhai chun a misuk lawm zuol a. AwkanHmarram ti bawk khahkankel rawl suok rak rakinkanhei sak nawk hlak. SHDC a pieng hnunga Headquarter a einei Sakawrdai akanzin vawikhatna a ni leiin chuh ka lawmna tak a nih.
Ei ram neive sun hih duot takin, hmangai takin sawrkar hratna leh thanga suk hmasawn hi ei maw a nih tia hril le hriet ringawt nilovin a tak taka ram le hnam hmangaina a piengthar hih ava tul ngei deh aw. Pathien a piengthar chau hih an nawh piengthar eiti hih.
SAKAWRDAI SHDC KHAWPUI
SHDC Headquarter Sakawrdai hi mihriem anlo pung hrat em em a, in 530 vel alo um tah a, mipui chuh 2950-3000 an tlingphak tah. Sawrkar milienhai khuolbuk (tlungin) ding Tourist Lodge, PWD I.B. le dang dang a umve tah bawk a. Tourist Lodge building thar mikhuol iemani zatzet tlung theina khawm bawl zo tep an tah. SDO/PWD a umna hmun a na, Hospital khum 30 vel umna, Doctor pathumin an en kai a nih. Ram venghimtu Police tiengpangah MRP, SDPO-um theina siem ani a, MAP Asstt.Commandant/DSP in a um chil bawk. Lampui Aizawl le infe pawna Bus pahni HMAR SERVICE/EXPRESS ti le MAMI EXPRESS a tlan zing thei tah a. Hma a sawn hrat hle.
Sakawrdai khuo hih Kum 16 zet liem ta a thisen a ei nawr dawk a ropui am, a chin am, a lien, Sinlung Hills Dev. Council Headquarter ani leiin a hlu a nih. SHDC Ofis dingin mimal in thlakhat pei a Rs 5,000/-pein an hluo a, Clerk pakhat le Chawkidar pakhatin an um ngha a nih. Staff tamlem chuh Aizawl khawpui Tuikhuah tlangah mi building thlat khatah Rs 10,000/-neka tam man hluo’n Pu Lalhmachhuana MCS Secretary, (tuhin midangin an thlak nawk tah ni awm tak a nih) SHDC inrawina hnuoiah staff iemanizat zet leh hi Council hi a fe dep dep a nih. Pu Malsawm Darngawn Chairman SHDC ni lai zing ei thlangval haiin inban dinga an phut leiin an ban a, Chairman umlovin SHDC chuh a um. Chun, hi Council hih Administrative Department, Government of Mizoram Nodal Department a hmangin Interim-Councilin SHDC chuh a fe teng teng a. Khawvel mipui rorelna ram a interim hunsung sawttak ni dingin ka ring. Kum 2012-13 a an budget dingin Rs 300 lakhs Mizoram sawrkarin a siem pek niin ka hriet a.
Chun Sakawrdai hih Kohran tiengpanga chun Kohran Pawl 10 neka tam a um a. Chuonghai chuh, AG, Baptist, EFCI, ICI, Presbyterian, RPC, Sabath, (Vawksa fa le fanaw pawl an inthe nawk an tih), Salvation Army, UPC (NE), UPC (Mizoram), Juda sakhuo ring Pawl khawm an um. Chuonganga sakhuo thiempu tamna ‘Thiempu hnam ei nih’ tia inzak derlova ei khekpui lai zing Zu zawr le khawsung thlangval khawtlang nghawkum zawnga inper le nun vilik pawl an bo chuong naw a, an pung deu deu ti a nih. HSA khawmpui tawptieng lem khan chuh Zurui buoi leiin khawsung roreltuhai khawm nasatakin an sukbuoi ti thu kalo dawng. Chuleiin, Kohran pawl tam hi khawtlang le hnam inthuruolna a ding chun ei tangkaipuina a umnaw hli ni’n an lang. Baibul le Pathien thu sirsanin Kohran Pawl ZU ei inrui a, Krista hming nilovin Pawl hming a thi ngam ei tam lem bawk a hawi. Setan lawmzawng thawa inper-kalang ei nih ti ei ngaituo nawa, hriet ei tum bawk nawh. A pawi a nih. Khawlai khawm Hmar umna ta phawta ei Hmar nauhai syndrome chuh ana; ei kawlvela unau haiin kohran pawl tam hi hnam le khawtlang inthuruolna suksetu ani zie inchuknan anmi hmanga an inthang duok duok ani hi.
HSA KHAWMPUI LIEN
Tarik Ni 9 December 2012 khan HSA khawmpui lien chuh tan ani a, a hall hmingin SIKPUI RUN ti a nih. Keikhawm mawphurna pek kani angin HSA thuoitu boral tah hai hrietzingna hunser ka hmang vea. Zantieng hotu thar ding an thlang hma po chuh rorelna ah ka thangve thei a. Rorelna ah HSA General Hqrs. hotu le hmun hrang hranga Jt. Hqrs, Branch hotu le palai an hung khawm tha hlein ka hriet a. Thu thelut tam lem chuh CEC rel dinga peksuok vawng a nih. Thu thelut laia ka ngai pawimaw em em pakhat chuh HSA ngirhmun enin INDINTHAR NAWK EITIU ti Shillong Jt.Hqrs.a inthawka hunglut hih a nih. An thu thelut nasan hrilin ‘HSA hi naute hnuchak invawi ang elin Nulepa tam tak le mipuiin ni dang angin an mi uopmawi zo ta nawh. Chuleiin, indinthar ei tul nin an lang’ tiin. Member hmun dang danga inthawka hunghai leh hriltlangna neiin ‘ A THA IE’ ti hnung khawmin CEC rel ding bawkin sukthluk a nih. HSA General Hqrs. Rengkai, Churachandpur, Manipur hmun a Tribal Hostel bawl mek le inzawma Pu H.L.Daka Memorial Hall bawl ding chungchang le thil dang dang rel ani bawk.
Inthlangnaah General Hqrs. hotu dinga thlang Vice-President tinaw chuh Aizawl, Shillong, Imphal le dang danga mi vawng anni a. General Hqrs. Rengkai, Churachandpur nisi, hotu rorelna khawlpui cheltu General Hqrs. hmun Churachandpur puotieng mi ei sie vawng el hih HSA tadinga thiltha lampui dithai chun ngaituo veng veng khawp a tling. Chuongnekchun General Hqrs. hotu dinga post pawimaw zuolhai hi Hqrs. hmun a um ngeiin chel hai sienla thiltha nilem ngei ring a um. Asanchuh, mipui hrietphak manglo Computer hmabula chingfel theilo students le mipui thil nitin deuthaw a ngaituo le rel neu neu ding a tam em em a. Hmai intawna hriltlang le phone le internet hmanga thil hril hih ngai pawimaw dan in ang derlo a nih. Ieng organization khawm inhmukhawm rawn hi hratna le hmasawnna a nih. Thil khawm ei thawsuol tlawm tak. Chun, sum tiengpang khawm feltaka hmu le hmangdan record ding chun inhmu le inhrietpaw zing a tul. Hieng bakah hmun hrang hranga HSA Jt.Hqrs, Branch le organization hrang hrang a inthawk indawrna le thil iengkim thawnsuok le address (Official correspondence) annawleh, organization dang hotuhai le inbiekna ding khawma an hung address chuh ei hmunpui Rengkai Road, Churachandpur ani hlak sia. Chuleiin, hi thu hih kan vawi em a, HSA fe hrat danding ngaituo’n ka thahnemngaina thu tlawmte tuta HSA khawmpui Souviner ah ka thusep a thupui HSA LE KEI tia khan ka zepsa nghe nghe. Ka hriet suolnaw chun tuta ei hotu tharhaiin Aizawl, Mizoram hih Working General Hqrs. dingin an sukthluk ti a nih. A beidawng tlak ngei el.
Chun, zanah Enaugural Programme hmang ani a. Pu R.L.Pianmawia MLA 7/Tuivawl A/C, Mizoram chuh khuollien a nih. Mipui fekhawm chuh a tamlem Hall puotienga um ni hai sien a hawi. Programme zovin Sakawrdai suoksanin Darlawn Forest I.B. tieng kan pan tah a, programme danga chuh ka thang tah nawh. A hnunga kalo hriet danin Manipur le hmun dang dang a ei hotu Programme a hming chuong khuollien chenin Pu C.Lalrosanga ADG of DDK Speaker dinga ruot tinaw chuh a hung mumal an um nawh tih a nih. Vairengte HSA khawmpui lien a khan ka thangvea hiengang tho hih a nih.
Hienganga programme phuisui taka siem buoinuoia ei thaw vet el hih HSA thuoituhai thawsuol am annawleh ei hotu/nulepa hai ?. Nulepahai hih HSA thilthaw tlawptu le sukmawitu ding ei na, HSA a muolpho chun hnam muolphona a nih tihi ei hriet thar nawk nuom a um. Chun, HSA thuoituhai khawmin nulepa’n an mi ralkang tlir tah chun a san iem ning ata ti hih ngaituo ve ding a nih. Hiengkhawm hih hotu le hotu karah co-ordination a thatawknaw lei le nundan mawi, mi entawn tlaka an umnaw lei le hotuhai umna kar hlat lei khawma thil um thei ni bawk a tih.
Chun, ei hriet dinga pawimaw kati em em el chuh Website a ei activities hai ei tarlang chang a um a, hih 10% (100 pei a 10) student a hmuphak lo ei um chauh nilovin Website umzie hrelo khawm HSA member tam tak ei um tihi.
03th February 2012
