Aizawl: HPC(D) ainthawka boruok tha dit leia inbiek rem dinga rawtna a um chun, CYMA chu iengtiklaikhawm an hawng zing thu chu CYMA thusuok in a hril.CYMA chun, Mizoram sung le puotienga Mizo hnathlak hnam hrang hrang hai chu thlirhran bik an nei ngai naw thu le state sunga um hnam inkara buoina leia Mizoram sunga "raltlan' hai khawm en hran bik nei lovin, thei ang angin a lo tuommawi'n a lo enkawl hlak thu an hril.
Mizo chu hnam tlawmte, nuoi sawm chuong met chau an la ni leia Mizoram thedar zawnga hnambil le chibing inla hrang zawnga thil thaw hai, ram le hnam inpumkhatna suksie thei zawnga hmalakna reng reng chu CYMA chun a thei ang angin dodal zing a tih tiin a hril.
HPC(D) haiin thusuok le open letter hmanga CYMA President thuhril ni teu teu lo an hril tira, demand area sunga YMA Branch hai an thik lui tira, an seal hai chen'n CYMA a thelut dinga an ti chu CYMA chun hrietthiem harsa an ti thu tarlangin, "Hienganga thu belchieng dawllo hmanga an putna hi, evidence-a video(mobile record) nei nia an inhril hi an rang thei angin phawr lang ngei ding le CYMA kuta pe dingin kan ngen a ni" ti an hril bawk.
Mizo hnathlak hnam hrang hrang hai inzawmkhawm chu CYMA dittak le thiltum tak ani thu an hrila.HPC (D) hai inbiekpui dingin theitawp a suoa. April ni 18 ainthawk khan hma laiin, April ni 23 zantieng dar 4 khan HPC(D) Chairman, H.Zosangbera chu biek ania,a zinga hun pangngai bawka inbiekna sunzawm dinga ti ania, hi ni hin an phone thei naw leiin, Army Chief, Ropuia chu an biek paw thei hrama, dawkan khata inhmu tlanga inbiek an nuom thu chu an hriltlang niin an thusuok chun a tarlang.
April ni 25 khan HPC(D) tieng biek an tum nawka chu a thei naw leiin CYMA chun inbiek dinga hmalak zing ngaina a hriet ta naw thu an hril bawk. HPC(D) haiin in biek nuom na an nei phawt chun CYMA chu iengtiklaikhawm an hawng zing niin an hril bawk.
