Khuoihli/panna hnai nei hi a hnai kheithre chu na hle sienkhawm a damna ding chun kheithre a ngai ang bawkin, pawlkhat sunga manih mi pahni kar a manih intheidana le inhmelmakna lo pieng ta ang sien, a vawrtawp, insuosalna manih annawleh insuolna le inthatna manih chu a thlung naw chun, inremnawna khan thilthra intlun nekin tluksietna an tlun lem chawk hlak. Abikin Silai chawi ta ding lem chun inthatna em a tlung naw chun, an intheidana chun, Hmar kohran buoina, ICI le EFCI hung pieng phana ang chau kha ninga ta, HPD (D) ngei khawm hi a hmakhuo pik hle bawk a tih. Asanchu, an sungthu buoina hin a vawrtawp a tlung zet naw chun, asi le atak thlirhrang thei ani naw ding a nih. Entirnan, Hmar hnam hi Hmel felvuk nei ni awm takin a lampui chu lo hraw ta ang sienkhawm, a sungril damkimlona khan lamlakah cancer invawitir ta hlau sien, a sie ding chu nang le kei tho: chu umzie chu, Hmar hnam le a ram hin lamlakah sietna lientak a tuok ding tina a nih.
Tulai khawvel politics boruokin a phursuok ang hrimin, Hmar hnam khawm chun ka ram ti thei ding ar hmai ruol tak ngiel khawm a neinaw lai zing, sawrkar laka alo nuorna chu kum 24 lai alo invawi ve der tah a. Chu kawnga chun, sawrkar thlungpui hrieta Hel ei nei ve chu HPC (D) le HNA hi an nih. Anni pahni hi hmangthiem chun Hmar hnamin hlawkna nasatak an tel thei ding a nih. Chu hmangthiem theina ding chun HNA ah buoina aum nawha, HPD (D) ruok chu thuoitu sungthu buoina leiin hmangthiem dingin kawt an hawnga hriet ani hri nawh a. An buoina khawm chu ngaizam elthei chi ani naw zie suklangtu chu a vawrtawp/ inthatna hiel a tlungna hi alo ni ta a nih.
Tuhin chu HPC (D) sunga inremnawna chun a vawrtawp a tlung ve tah chu ani ngei a. HPC (D) hi Hmar hnam revolutionary party a insal ngam ani ang hrimin, tuhin civil mi amanih tu mi dang amanih va khing ta loin an aihna lo phapuihai le an tlaithleng lo kilpui hlakhai ngei leh khan an inpel ta lem a nih. Hi khel tieng um ta nghal lo chu, ala dam umsunhai khawm anni le anni an inthat nghal naw ngat chun, Hmar hnam ta dinga thilthra chu an sungrilah Pathienin a tu em ta naw ding maw?... ti hi a nih.
Lusun sungkuohai sunpui an umruol ruolin inhnar an um takzet a nih. Asanchu, hnam pasalttha umzie nei lem loa muolliem hiengzat laia HPC (D) in lampui indik a hrawtheina ding 0r damna kim neia hmelthar a nei theina ding lampui-a fenluttu a nina hi inhnar tham a tling takzet a nih.
Chuleiin lusun sungkuohai hin, an chunga thina intlungtirtuhai hi theida loa hieng ang thil intlungtirtu dinga ruot an nina hi an vangduoina ani lem zie hrea; kha thil tlung lei khan Juda Iskariot ang ela anni le anni chungah thilthalo iengkhawm an thaw nawna ding dam, taksa le thlarau ah piengtharna an nei pha theina ding dam le hnam san dinga hringna bawt an ni ang ngeia tu thisen khawm nisien farkhatte khawm far ta loa, Hmar hnam san suok theina ding lampui chu an hraw lem hlau theina ding dam haia trawngtrai pek mawlh mawlh lem dingin, HNA chun lusun sungkuohai a ngenin a fiel a nih.
HR. KHAWBUNG
Secy. Information & Publicity
