Mipakhat’in hienghin fiemthu a thaw a, “Ka zudawn chau hi inhril inhril a,ka thingpuisen dawn khawm hi hril ve ta unla,” ti in. Aningei,ei thiltha thaw vawi sang tamtak nek chun, ei thilsuol thaw vawikhat hi hriet a hlaw in an thang nuom lem hrim a ni.Mihriem mizie ahin,mi that nalai hril nek chun,mi that naw nalai hang hrilsuok le hang hril dar hi ei chak lem tlatsie.Chuleiin annawm, misuol,umthapeilo pakhatin mi tamtak a hen nasan chu.Ka ruolhai,ka khuolevenghai thatna ngawt hrilin midangin an famkim nawna hrenaw haisien chu,famkim anni el ding ana.Nang le nang in hmangai angin I khuolevenghai I hmangai ding anih, ti hi chu,thalaraua sip naw chun,a hmang a hmang hi chu an tak ding a chieng sa a ni.
India ram thuoitu ropui M.K Gandhi chu,Indian zalenna a suollaia tharum thaw loa zalenna;hmungei tumin nasatakin thang alaka, ngaidan dang dang nei zalenna suoltu hai lai chu ama hin hriet a hlaw tak in an lang.India hnampa ti a ko le tuchenna khawvel sawrkar dang dang ngaisang hrawn a ni.Mother Teresa chu hmuntawphnawk lai a,phar,kutdaw,damnaw tamtakhai enkawlin a tuomhlawma,a hun po po a hmangral thaka,khawvelin a ngaisang leiin lawmman ngaisangum tak; Nobel prize hai le India rama lawmman insanghai khawm a dawng pha hiel a ni. A nun an nemin ngainat a hlaw hle bawk a ni.Khawvel thu le hla thiem Shakespeare,P.B.Shelly le a dang danghai chu an thil ziek thiem leiin tuchen hin thangtharhai in an thil ziek hai inchukin ei tiema,Khawvel milar le hlasakthiem tamtak hai an chanchin ei hriet bawka.Adolf Hitler’an khawvel hne atum dan le,Juda tamtak, makteduoitel a that le, Osama Bin Laden’an khawvel a keibuoi hnezie hai ei hrietin tamtak an chanchin ei tiem bawka.
Eini hmar lai ngei khawm miropui tamtak einei a,a then hang tarlang inla, hieng, Rev.Thangur,Rev.Liengkhai, Pu Buonglienkung le adang tamtak haiin chanchin hrietzing tlak an mi hnutsie pek bawk a.
Anih,mitamtakin hriethlaw le inlar ei nuom leiin thil tamtak ei thaw a.Eiin hrietzing dan ruok chu an ang tawl naw hle a ni.Chuonglaizing chun,mani tanghma chau ngaia,midang sietletderna ding khawm pawisa loa,phetsek khawm eilo um thei.Hnuoi hi ei chamsawngna ding ram an nawh ti hrezing siein,ropuinatehlem hnawtin,ei nitin nun ei hmanga,hlunlo ram a ni ti hi ei lungkham naw a.Nisienlakhawm,intanna nei chun tawpchin ala hung nei tho tho ding a nih.Hie hnuoi damsung tawite ei hmangsuong hin, ieng ang lampui am ana ei hraw tading chu?Hi zawnna hi chu mani a indawn fel chie a nih.Asanchu,ei hmelma lientak le ei ruolringum,nitinna ei kalchawipui chu eini ngei hi eini si a.
Khieng a chunga ei tarlang hai chanchin khi chu a chipchier a ziek lo khawma,ei hrietlar anni leiin an hminghai ei hriet ruol ruol in iengang mi’m anna ti chu ei lungrila indawn buoi ngailoin a hung fie uor uor nghal a.Ei hrietzing na ding le sulhnung anmi hnutsie pekhai khi an angnaw tawl hle a ni. Ka pu thil mihril kala hrietzing chu, “Nang le nang in ngaidan kha inina niloin,midangin an hmudan che le an ngaidan che kha inina indik tak ani,”a mi ti,an dik hmel khawpel,chuleiin,nang tiemtu dittak iengang mi am ni tang ita. IENG ANGA HRIET’AM I NUOM A?
Copyright: VIRTHLI.COM retains full copyright of all published content, unless an excerpt or code snippet is attributed to another website. To republish posts, the best way to do this is with a link to this web page.
