Responsive Ad Slot

Aw Kan Hmar Ram

Saturday, November 26, 2011

/ Published by Simon L Infimate
~RH Hminglien, VIRTHLI Columnist

Hmar district buoipuia hnam pui meu ei inphu mur mur lai khan a awi naw pawlin ‘Hmar district on the moon’ an lo ti mek a. A awi le inhnik pawl hlaka sawl le ṭam hril lovin, vaipuonte-a mani thuomhnaw zel hlawmin an fuonkawm a. ‘Mitin mani khawpui sengah’ ti ang deu khan khawpui hnai panin an inhawr khawm luoi luoi a. Demand Day a hung tlung chun lam an hraw mup mup el a ni kha. Nunghak-tlangval, a za tel tela fuonkhawmhai chu “We Demand – Hmar District” tiin an khek ruol ṭhup ṭhup el kha a na. A ropui kher el ie, cher cher a.

Hieng hun laia hotu lar chu Pu Ngurdinglien (LFT)[1] a na. Delhi tienga zu palai dingin hotu fuonkhawmin an tir a. Kalman ding khawm biel pumpuiah an dawl mup mup a. A hung kir nawk tieng biel a hung fang a, Delhi return kha a ni ta bawk a, a hmel hmu nuom mipui chu kan fuonkhawm nasa thei kher el.

Ṭhang li a liem a, Hmar Ram hlak a pieng chuong nawh. Hmar politician le hotuhai, abikin Hmar district hrila dang inhil rak khawpa biel fang pawl -Hmar National Union hotuhai khan Hmar Ram chu Manipur MLA seat-ah umin an hriet am a ni ding, MLA an ni pha Hmar district a re ṭawt pei a. Hmarhai hi Manipur-a chau ni lovin Assam, Meghalaya, Mizoram, Tripura, etc. etc. le etc. a hai an um hner-hnur a nih ti an hriet naw ni ta veng a tih! Hmar district chu kaha se.

Mizoramah Hmar district nei tuma HPC-hai an ramsuok lai khan an CM -Pu Lal Thanhawla khan, “Hmarhai chun ‘district’ ‘district’ ti lovin B.D. inchuk unla a ṭha tak” a lo ti pek a ni awm a. A ramsuokhai chun an theida tek el a ni awm. A’ndik hrim a. Pasalṭha ruol, fam dairiel chang huoma chengrang le kal pen ta hnungin maw BD runsang kan la kai ding? BD le chengrangin iem inzawmna an nei a? District le Serampur-in iem inzawlna an nei leh?

Sienkhawm Hmar ram hmu ding a um thei chuong nawh. ‘Aw, Kan Hmar Ram’ chu khawlam a um a tia ka zawng ngiel khawmin dawnna ka hmu nawh ie. Manipur-ah ka fe a, Hmar mipui a nuoi tel uma an inhril laiin Vaiphei, sing thum awr chau khawm an tluk nawh a. Mizoram-ah fein, ‘Hmar ram a pieng tah, kan hnam a dam tah’ tia hlaa an lo chawi ka va en chun khawlai-khawlai; Hmar ram awzawng a lo um nawh a. Assam tieng ka zu fe a, Council neia an lo inhril chu an office-ngeiah ka zu sir a, thingpui ka khilai tawl a. Hmarhai ta dinga ram a lo um awzawng nawh. Tripura le Meghalaya tieng lem chu chu chu … ram chu hril lo, tribal certificate an lak thei naw tieng a nih. An inhmun inchawk sa ngei ngeia an in inkal sa khawm an bawk zo thei nawh.  An’leh Hmar ram chu khawla’m a um a le? On the moon? In Serampur or Pune? In a development Council? In a Sate Assembly House?

Pu Lalkhum Keivom (lft) chun ṭhang li-ṭhang nga liem taha khan Burma rama inthawk ringna mitin Hmar Ram a lo thlir tah a. Nebo tlanga inthawka Mosie’n Kanaan ram a thlir an hril ang deu kha a ni awm. Lungril enhlatna (visionary durbin) hmangin Hmar Ram -tlangram inthim le dum dur el, a sunga Hmar nauhai leng chu a hmu a. Chu ram ditum le mawi chu a hming a mawi zuolna dinga nunghak-tlangval theitawp suoa inphu sup supa a hmu leiin Hmar nauhai ta ding ngeia a par mawi insuo dingin chu Hmar Ram chu a lo ngen a nih. Sienkhawm chu visionary durbin-a chieng em ema inlang Hmar Ram chu ṭhang nga a liem hnunga khawm ‘la hung tlung ding le chun tekhi a nih’ ti ang deu kha a la ni ie.

Hi ram lo hmutu Pu Lalkhum hi a hmel hmu ding um ta naw sienkhawm a khaw sat -Kuokluong, a sulhnung le a thlan, a lungdaw hai, a khuo-le-tuihai le a nuhmei ngei, an nau-le-tehai leh va hmu dingin Thlavul ni 17, 2003 Thawṭanni khan kan va fe a. Kei, Tv. Lalringum Khobung, Pu Lalthlamuong Keivom le a lekhabu ziek phawta a hming inlang ve tei tei, ‘a serh zinga a mei ang’ an nu Pi Dari Keivom, Pi Engi Sinate le Pu Tangka Sangkhum hai nupa kan nih. Hmarkhawliena inthawk zingbu fak hunin, fa si lovin kan inthawk a. Hi tuk hin ka tunu suonvawr Vari’n vadungpui nga sipisial taka a mi zeuṭawl pek a. Sienkhawm Kuokluong khuo hmu ding ka ni leiin ka fe naw thei nawh a, nga fry ka chan a ṭul ding an tah. Inthawk vakin a zeu hmin sa chu ka va ham ṭawk a, motor dash board chunga siein ka tlanpui a, lampuiah ka fak malam pei el a nih … tui bovin.

Tata Sumo thar lem lo tak a nih, kan motor chu. Lampui ṭhat naw dan chu inhrilfie tum naw inla a awlsam a ne’l. Kan fena dingin lungril a hluo sip deu ning a ta, motor gear tlak nachang ka lo theinghil a, a zo naw beidawng chu a’n rum hum hum el. Khawm chun ka la ngaisak naw zui. Kan ruol danghai hlaka a motor umchan hrim an sawn amani ding; an to chip chip el bawk. Sienkhawm mi thil chik mi Pu Keivomin a lo hriet hlau va, a gear ka thlak a, a re ṭawt el.

Motor fe thei nawna rel lampui kan hraw ding chu mel 3 vel zet ning a tih. Pu Keivom le Tv. Khobung hin philosophy inrum rut el an nei a. ‘BA inchuk hun ta hnungin matric pass thei lo hai iengtin am nghak nghak ei ta’ an ti a nih. A’n dik tho. Sienkhawm BA inchuk dinga fe ni lovin Kuokluong pan kan na, kan lampui hraw hi zirna runsang ni lovin rel lampui a ni leiin an philosophy hi a ṭhing an naw tawp khawma a relevant naw bek chu a ni hrim hrim. Pihai Dari le Engi kan sawm a, Pu Sangkhum-hai nupa leh chengkawl speed-in kan tlan dawr dawr el a ni chu. BA inchuk dinga inngaihai chu hmu phak an ni nawh. Leilak hlak tam ta rawh, kan pihai hlak an kalpen chena chel-pek ngai a ta. An cher taluo naw dun si, an hrat naw si, an inthazo naw si; -si, si si. Kuokluong lampui hi BA lampui ni sien chu fe hmasa hai kha chu ka hnawt phak awm thliet leh!

Phai zawl kara tlang pawng chungah kan pan ram, sorry kan pan khuo chu a lo um a. Pu Sangkhumin Barak Valley Hill Tribes’ Development Council chairman a chel laia motor lam dinga a zawng le a chopek, intung ar el chu mel chenve tling kher naw sienkhawm tha chu a lak zek el. Pu Sangkhum hi pa maksak ve tak chu a nih. Chairman a ni lai hin development program tienga all-in-all a na, planning strategist, surveyor, engineer, contractor, laborer, etc. etc. & etc. a ni vawng el a ni awm. A lam rel hi Gypsy King four-wheel thar hlawkin hraw inla iem chang a tih aw! A kai zo a ni khawma a ke chu kham ve hle tho a tih.

Tlang sip zawl (zawl ti tham chu a ni nawh) chu khuo a na. Hmar Ram a ni em naw khawma Hmar Khuo chu a ni phawt el. Vawk thatin, mipuiin um ni kham meuvin an mi lo tuok a. Pu Lalkhum tuolzawla umfak inzam chu pandal-a hmangin inkhawm an buotsai a. Tuolsung Youth Club-in Spanish guitar indiktak leh ‘Aw, Kan Hmar Ram’ ngei chu an hei rem a leh …! Lungrilah thil dang a’n leng nawh … nuhmei nau-le-tehai ei hrietfuk nawh. Lalringum khawma a chhas a theinghil ṭhak. A original, a phuoktu phuok dan tak, a visionary durbin-a a thlir laia inlang Hmar Ram a puong suok dan chie, Pherzawl Reader-a an lo inchuon dan ang tak khan an hei sak a na le, chem chem a! Ama Pu Lalkhum thlirna tukver kan inṭawmpui thei hiel a, sienkhawm ama thlirna le tuta kan thlirna tukver hin danglamna an nei ta tlat!  Ama’n Hmar Ram a lo hmu chu thu nisienkhawm tisaa la hung inchang ding chu a na. Thangtharhai ruok chun ei ram ding chu boruokah ei lo inhlamzuitir ta sih a.

Ama Pu Lalkhum hi pa dangdai, pa huoisen le pasaltha indik tak, vai kara Hmar khuo sat thei ngat, ram lien tawk -phaizawl huoma lo keithla thei, sakei sawmnga chuong kap, sakeiin a dar a chip tlang ta hnung khawma mani insansuok zo a na. Sahrang chi nga kap hi thangsuo an ni ngai chun vawi nga neka tam thang a suo ti thei ei tih. Ama thlirnaa inthawk chun Hmar Ram chu thu chau ni lovin tisa ni ngei dingin ka ring. Chu Hmar Ram chu hei sui a, ziek ṭeu khawm chak a um hle a. Sienkhawm chuong tieng thu le ama chanchin chu Pu Keivom le Tv. Ringum haiin chieng lem le umze nei lema an la phusuok dingin hla lem ei tih; chuong naw chun lo keiphuoi rak ei ta, ṭha naw nih.

Pu Lalkhum vision, ‘Aw Kan Hmar Ram’ ti hla chu tu chena Hmarhai hlapui a la ni ta pei a. Sienkhawm ṭhangtharhai bawk … intithiem le insukfel, thil hrechieng tak tak si lo le thil hrim hrim a nina tak sui-chieng pei lova ringthu fepui el ching haiin an lo sukchingpen ta rek a. Chu chu a nih, ka hril nuom chu. Hieng mihai hin ei thu le hla ṭhahai an sukchingpen rawp si a.

Ei hla pakhat a ‘Ram hmangai, an hril BA lekha thiem’ ti an lo sukchingpen chu tu hma khan Delhi Sikpui Ruoi-ah ka sawisel a, vanneithlak takin Delhi HSA hotuhai an fel hram a, an sukdik nghal a. A ṭha. Tuta ei hril ‘Aw Kan Hmar Ram’ khawm hi hre chieng si lova intifel haiin an sukchingpen rek a nih. Pherzawl Reader tiem phak lo hai tak hi chu aw. Buhmasa tiem bawk lo hai.

Tulaia hi hla an sak dan chun chang hnina le chang thumna an sukkawkal a, chang lina an belsa bawk. Hieng ang hin:
Chang hnina:    Cachar, Haflong, Aizawl, Manipur,

Inpumkhata ngirin;

Ei hnam lungmawl indar hi,

Keikhawm tuma varna ṭha zawngin,

Hma tieng ke pen …

Chang thumna:  Hnam dang dan ṭhahai la ve’ng ei ta,

An dan suol thik lovin;

Inpumkhata ngir tlatin,

A pawng bik - a phai bik um lovin,

Hma tieng ke pen …

tiin. A’n dik dan chu-
Chang hnina:   Cachar, Haflong, Aizawl, Manipur,

Inpumkhata ngirin;

Inpumkhata ngir tlatin,

A pawng bik - a phai bik um lovin,

Hma tieng ke pen …


Chang thumna:  Hnam dang dan ṭhahai la ve’ng ei ta,

An dan suol thik lovin;

Ei hnam lungmawl indar hi,

Keikhawm tuma varna ṭha zawngin,

Hma tieng ke pen …

a nih.

October 2002 khan Hmarkhawlienah Hmar Inpui khawmpuiah ka ṭhang zawk a. Chutaka chun hla ṭha tak tak, hmun ṭhenkhata an lo sukchingpen ta hai chu a original ngat peiin mipuiin an sak ṭhup ṭhup el a, inhawi ta ti ngei el. Brahmaputra ral tieng lo kai tah, mi neka chang-sang lema inngaihai a mi sukzak ram ram ie. Hmar rama chu Hmar hla khawm indik takin an lo la sak a, Hmar kalcharin, hmar thu-le-hla hmangin, iengkim Hmar takin a ni ding hrim a nih. Chu Hmar Ram chu la pieng chie naw sienkhawm ṭhangthar nawk ding haiin varna ṭha lem le remhrietna ditum lem hmangin an la hung kei suok ding a nih ti ei ring.

Chu ram chu ngaiin ei inrum takmeu si a!







[1] Lo Fam Tah





Copyright: VIRTHLI.COM retains full copyright of all published content, unless an excerpt or code snippet is attributed to another website. To republish posts, the best way to do this is with a link to this web page.

Don't Miss
© all rights reserved
made with by Simon L Infimate