~Ngurrivung Hmar, Aizawl
Pawl thum, pawl li vel ka nilai khan, hnam a hin ka lo inhnik hle ni mei a tîm? Class a ka bawsan (desk) taphawt chu ka hming le Hmar Ngurte Sanate ti’n pen, blade le compus hmawr zumhai hmangin fie em emin ka ziek hlak chu tie! Hieng a bawsana ka thil ziekhai hi, kan hotupa pakhatin (a hming chu hril da’l ei tih) a mi hrilfie pek a, a umzie chu – “kan vêt pangngaiin ka lan vêt zing” tina anih, a ti chu. Tu tieng tieng hin ka hang ngaituoa, iem a ta aw khang em em a, Hmar ti a hin ka lo in hnik, ka ruolhai khawm kha Hmar anni ve vawng si a, anni hlak khan an ziek ve khawm ka hriet si nawh, ka nu le pa’n Hmar ti hi inhnik ding anih, ti khawmin an mi hril chuong bawk nawh. Pawl sawm ka pass-na le ka Certificate-ahai hlak chun ka hming ti lo chu iengkhawm ka belsa ve ta naw si, ienglei am nieng a ta aw, khang em em a Hmar ka lo inhnik kha?
Hmar ti hi, iengtik hun a inthawk a’m ‘hnam / tawngin’ ei put, ti khawm ngaituo lem lovin, mi tam tak chun ei inruichil tawp a, hrilfie khawm angai nawh, Hmar chu Hmar a ne’l an nawm ei ti hmawk hmawk el ni’n an lang. Pu Hranglien Songate, Pu T. Khuma le thuoitu/upa thenkhathai hril dan chun Hmar ti ei put nasan chu ei pi le puhai khan an hnungtieng an sam an in tawm hlak a, chu taka inthawk chun Hmar hming hi hung put einih, an ti chu. Chun ngaidan pakhat nawk a chun Hmar ti hi Hmar (North) amanih, Hmar tiengmi (Northern people) amanih ti na anih, an ti chu, asanchu Luseihai a inthawkin Hmar tieng a cheng ei ni leiin. Chuleiin Luseihai a inthawka Hmartieng a chenghai tawng chu Hmar tawng a hung ni a, a mi chenghai khawm chu Hmar mi ei hung ni el ni’n an lang. Hmar ti hi, ei hang thlir vang vang chun Hnam hminga ei putna hi chu a la sawtnaw ni’n an lang, asanchu ei pi le puhai a inthawka ei in hlân sâwng, ei thu le hla a hai hin Hmar ti ei put awm hmu ding a um nawh, Ei pi le puhai a inthawk a ei put tan nisienchu ei Sikpui Hla a hin Hmar ti hi chuong ve ngei a tih, ei Sikpui Hla a inthawk a chieng em em chu Manmasie thlahai ei nih, ti hi anih.
Naupang sande sikul kan kai lain, kan hotuha’n an minchuktir dân chun Hebrai (Hebrew) ti umzie chu, ‘Ralkhingtiengmi’ tina anih. Abraham kha Eupheretis Vadung raltieng, Kaldaihai khuo, Ur-a inthawkin Pathien kona dawnin, Ramtiem ram, Kanaan ram pana an zin velna le Aigupta rama tam leia an zinna ahai khan Ralkhingtiengmi ti’n an lo kova, chuleiin Hebrai ti hming hi ahung suok / um pha anih. Hebrai hi Israelhai tawng ani a, chun khawvel hmun hrang hrangah invak darin, tawng dang dang an hmang hnung khawma, an ram le an hnam keikhawm tu le suk hringtu pawimawtak anih bawk. Hebrai tawngin thu an zieka, an in hlan sawnga chuleichun Hebrai tawng / hnam ahring zing pha anih. Hebrai ti hi Lalpa Jehova, Hnuoi le van siemtu’n Israelhai hnam le tawng hming ding a pek khawm a ni chuong nawh a, Lalpa Jehova ringlotu, Kanaan mihai le Aigupta mihaiin Abraham le a thlahai (Israelhai) an kona mei mei anih. Chun ei Bible Thienghlim a khawm Pathienin a pek anih ti a inziekna a um bawk nawh. Israelhai hin Hebrai ti hi anni’n an phuok le an Pathienin a phuok pek ninawsienkhawm, Israel tawng anih, ti hi chu an pawm nghet tlat anih. Vawisun hin, Hmar ti hi, Hmar intihai hin ei phuok ninawsienkhawm ei hnam le ei tawng anih ti hi pawm ei tieuva, hnam thi, tawng thi el a hung ninawna dingin theitawpin thanglâng ei tieu.
Mi thenkhat chun, khawlai hmun a khawm um inla, ieng tawng khawm hmang inla, ei Hmar nina chu bo chuong lova, a pangngai zing an nawm ei ti ani awm ie. A ni ngei el, thisenah, ei Hmar nina bonaw nih. A miruokchu, hi thil a hin chu eini, Hmarnau tlawmte chauhai, hnam anga ei dam suokna ding chun ei fimkhur hle a ngai in an lang. Hmarnau thenkhat chun, Hmartawng hre tanawhai sienkhawm, Hmar an nizie inentirnan an hming khelah Hmar ansie hlak hi tie. Thenkhat nawk ruok chu Hmar anni le anninaw khawm inhrie ta lohai, hang hril rak khawma umzie um ta lo ei tam khawpin an lang. Entirnan Mizoram khawpui tak, Aizawl a hin Hmarnau hmel tha le hausa tak tak ei tam vei leh, Hmar hming chawia thilthaw ni khuo ahai hin Hmar tawng hmang, atlangpuiin ber tak takhai hi ei fekhawm nin an lang, asanchu a tawng hmang ta naw nana chu hnam a hin an lo thitah nin an lang,(milo hrithiem inla) Keih pawh Hmar ka ni a lawm ti tu le Kei chun Hmar ka nih tituhai inkar hi chu akar hla tak a nih. Vawisun a Hmarhai hi Hmar min nitirtu chu ei tawng hi anih. Ni khatlai el a Mizoram Legislative Assembly-a Chief Minister-in Sinlung Hills Development Council chungchanga a thu hril kha ei en chun, thangtlawm um vieu sienkhawm thudik a hril ani si, ‘SHDC chungchang ka chiengnaw ang bawk hin, SHDC hi chiengnawsien, sawrkarin a nuom nuom a chinglet thei hi a huntawk chau’ ati le ‘SHDC hi Mizoram sawrkarin Act in nitir pal a tih’, ti a tri thu a hril anih kha. Khânga CM-in thu a hrillai khan Hmar mi, Hmar thisen a insieng, Assembly Hall a khan ei umnaw amanih ti inla? Um e, amiruokchu kei chu Hmar ka nih titu ding ei umnaw lei anih. Ei ni Hmar nau tlawmte chauhai hi hnam a hin ei chieng a va ngaizuol de. American-hai khu hnam an ni a, ieng tawng khawm hmanghai sien American an ni zingtho, chuongang bawkin Hmarhai khawmin ieng tawng khawm hmang inla Hmar ei ni zing tho, ei ti ani thei, hnam thil a hin chun Hnam changkanghai le Hmar ei tekhi chun indik theinaw nih, Hmar ti hi chu tawng le hnam in kawp tlat anih. Hmar tawng a ral chun Hmar hnam a ral tina a ni el nawding maw?
Ei hnam thuoituhan, Hmar pahnam an tarlangna a thangvenaw Hmarnau / Hmar hnam tamtak ei um, hienghai hi Hmar hnam anhnuoina lai dawmkangtu le a kul a tai a hnam ta dinga inpe, an hringna chen khawm inhlan ngam an nih, hienghai hi tuha’m ei ti chun Hmartawng indakhlawk a hmangtuhai hi an nih, ruol thenkhat lem chu Hmartawng an hmang lei ringawt a mi kut tuor an um bawk. Vawisuna Hmar nunghak, tlangval, hmarnau lekhathiem tamtak khawpui a chenga, umhmun nghet khuor mekhai hi Hmarnauhai tading chun suong ei um in, mi tamtak inhnemna ei nih, amiruokchu, ei tu le te la hung um dinghai hi ieng tawngin am tawng tâng anta aw!? Ei tawng, Hmartawng hlak hi insuong khur a bak hmangna ding um lo. Ei mithiem thenkhat, sapram chen chen a hmunnghet neihai hlak hi an nauhan Hmartawng hmang thei ta lohai, an tu le tehai chu ngaituo um tak an nih. Hmar hnam hmangaituhai chu maw, Hmartawng indakhlawk a hmang tuhai hi anih. Chun, Hmarnauhai lai a, Hmartawng hmang lo / hrelo, Hmar hnam hmangeitu chu za-ah pakhat (1%) khawm ei um hmel nawh. Vawisuna Hmar hnam thuoitu, hnam tadinga ringtan ngam, hringna inhlan ngamhai hi Hmar tawng hmang theilo le Hmar tawng hrelo um thak nawnihai. Sakei thi hnung nekchun uite pakhat cho khawmin thil a thaw theilem, asanchu, hmel hrietlo, misuol a lo in bau khum thei a, rukru lakah in a veng him thei tlat chu tie. Nang le kei hi lo hausa er uor inlakhawm Hmar hnam tading chun mithi, tangkaina neilo ei ni thei tlat chu tie!
Hmar hmangaituhai hin, Hmar hnam / tawng a thi nawna dingin, ngaizâwng ei nei khawmin Hmartawngin nei ei tieuva, chuongang peiin ei khuosawt, lungngai le lawmlainia khawm Hmar tawng bawkin, chuongang tak a ei thaw chun ei thu le hla hi, hi nek hin hung hausa ngei ngei a tih. Amiruokchu, mi thenkhatin Hmar tawng a lekha bu siem/ziek chu a hlâwk naw êm, Hmar tawngin siem/ziek ta nâwng ka tih, ei ti a ni chun an dikna lai khawm um atih, ei tawng a lekhabu tha tak tak hang ziek le hang inlet dingin a zawrna ding um lo chu, ei ni, Hmar mipuihai hlak chu lekhabu ngainat nachang hrie ei tlawm bawk, nitin chanchin bu ei neisun Hmasawnna thar khawm hi a hring in hrova ei siem nin an lang. Ei thu le hla thiem tam takhai hlak hin, Hmar tawng nekin Lusei tawng ei ngaina tan nin anlang bawk, anngainat nasan ni dinga in lang chu a zawrsuokna, dawr ni’n anlang, entirnan Pu L.Keivawm hin Zoram Khawvel a ziek hma le a ziek hnunga, a hming inthang dan le a lekhabu zieka a pawisa laklut inang naw nih, chuongang bawkin ei hlasak thiem - ICI hlapawl, Lalruotmawi le a dang danghai hi. Amiruokchu, unau ei tawng, ei hnam athi nawna dingin thang ei lak angai anih hi, thu le hlaa ei hausa naw chun thang le thar la hung um pei dinghai hin ei tawnga inziek lekhabu tiemding an tlasam chun, ei tawng hi a ral el thei ding anih. Mani hlawkna ding um nawsienkhawm, ram le hnam hmangaina leiin (kei te lul hi mihai thurawn petu ding ni naw lang khawm) ei mi thiemhai hin a tam thei ang ei tawngin lekhabu mi siem / sie pek thei hai sien chu aw!
Hmar intihai hi a tlangpuiin, a tamlem chu Ruonglevaisuo biel fe thleng a hmun dang danga inbeng bel / umhmun khuor tahai, Ruonglevaisuo biela chenghai le in fe paw zing zing hlak le tawng hmun khat hmanghai hi ei ni’n an lang. Chun ei hnam thuoituha’n Hmar Pahnam an zieklangna a Pahnam tam takhai hin chu Hmar an inti ve lêm nawn an lang, entirnan- Aimuol, Hrangkhawl, Chawroi, Chiru, Kom, Khawlhring, Ngente, Hnamte, Khiengte, Sakechep le a dang danghai hi, hieng ei tarlanghai hin Hmar an inti nuomnawnasan niding a inlang pakhat chu ei cheng hmun khat lai khan Hmar ti’n ei lan konaw lei ning a tih, ti hi ring a um.
Eini, Hmarnauhai hi hnam a hin ei chieng a va tul de! Mizo Nationalism le Kuki Nationalism-in a mi hnengbuoi zing lai hin. Cachar, Assam a theitawp suoa development council ei chosuok ve hlak hi, thang ei lak thiemnaw chun, hnam danghai insukhausakna ding ringawt a ni hmel si.
Kuki Nationalism hin Hmarhai hi a mi huomsa reng am aw? Ei mithiemhai hril dan chun Hmarhai hi Kuki tia ko hmasatak ni awm tak ei nih. Chun, Indian Constitution Schedule Tribes Order 1950 khawm ei en chun, any Kuki tribes ti hnuoia a hin Hmar pahnam hieng- Biete, Changsan, Hrangkhawl-hai hi ei inziek lut bawk. Chun athen hieng- Aimol, Anal, Chiru, Chothe, Kom tihai hi Schedule Tribe hranin ei inzieklut nawk bawk. Chun, tuta Kuki State Demand thua hin, Hmarnau tamtak chun ei phur hle a, a thuoitu tua dam ei thang ni awm taka nih.
Mizo ti chungthu a hin, ei ni, Hmarnau tam tak lai hin, Mizo ka nih inti le Mizo ka ninawh inti, ei um teu ni’n anlang. Mizo ei inti nuomnaw nasan niding a in lang chu, a hma a Mizo hril fiena ‘any Lushai tribe’ ti an hmang lei le Mizo tawng chu Lusei tawng a ni, ti a an ziek lei kha ni mei a tîm? Chun ei ni, Zohnathlak tawng dang dang hmanghai a mi huopsanawa ei inhriet leikhawm anithei bawk, tuhin chu Mizo hrilfiena a ‘any Lushai tribe’ ti kha, Zohnathlakhai po po huopin le Zohnathlakhai po po an inti Mizo theina nadingin ti’n Mizoram State Legistature chun alo nawtre tah a nih. A hrim hrimah, mi hi ei chungah an thavieu chun kawmaw insuo hi harsa ve deu a nih. Mizo ti ahin, eini Hmarnau tam takhai hi chu ei lung a awi vieu tah nin anlang. Central YMA thuoitu tam takhai khawm hi Hmar ei ni a, tuta (Thlaram, 2011) President nilai lem hi chu Lungtau, Intoate a nih. Mizo Union hunlai a thuoitu tam takhai khawm kha Hmar ei ni bawk, chun Mizo Union le Greater Mizoram chungchang a khawmkhan Manipur a Hmar mipui khawmin ei phur pui vieu ani nawmaw? Chun, Mizorama, Khawbung khaw (Hmar Pahnam, Khawbung hnam hming chawi a sak) mipuiin “Mizo Hlakungpui Muol” an indin a, hi tak ahin Zohnathlak thu le hla thiem, an kut hnung hrietzing tlak a an ngaihai, Zoram hmun hrang hrang ami (mi 33 lai lak lut anni tah) an lak khawmhai hrietzingna Tlânlung, hmun inhawi deu a hin andawh a, (hi hmun hi khawvel hmun hrang hrang a Zohnathlakhai hriet le kan a hung ni mek a nih) hi hmun ahin, eini, Hmarnauhai tading chun thu le hla a ei pa, Pastor Thangngur ngeikhawm lak lut a lo ni zing antah. Mizo ti umzie hi ei bichieng chet chet chun Hmarhai hi Mizo eini le ei ninaw thu a chun hringmi zaleng po pohai hi Adam le Evi-thlahai vawng ei nih, ti ang hi a ni el naw maw?
Mi hi an ngirhmun a ei ngir si naw chun, hang inthiemnaw ringawt hlak hi a thei si nawh. Entirnan, nang le kei hi Middle East ram thenkhat a khun, ei lo pieng ni sienchu ‘Muslim rawlrala che pawl’ ninawng ei tih, tunam ti thei ei ta? Hmarnau tam takhai hi chu Mizo ti hming hin a mi lempil mek nin an lang. Ei ni, Hmar ha’n kan ram ei ti ve pakhat, Sinlung Hills huomsuong hi ei hang thlir chun, abiekin hieng Khawlien tlangdung, Suongpuilawn tlangdung ahai hin Pi le Pu tam takhai hi Hmar tawngin indakhlawk in ei inbiek pui thei a, Nu le Pahai hi Hmar tawngin an tawng thei tawk tawk a, Naupanghai ruokchun Hmar tawng an hriet ve tawk tawk chau an ta hi. Mizo Union thiltum ‘Greater Mizoram’ le MNF thil tumhai kha lo puitling sienchu, vawisun a Hmar inti hai hi, ei unau Mizorama Hmar tam tak Lusei tawng hmang tahai ang tho hi ei ni el naw ding maw?
Vawisunhin, mithiem tam takhaiin, thiem takin, Kuki inti hai po po hi Hmar an ni vawng a, Hmar intihai po po khawm hi Kuki ei ni vawng ti le Hmarhai khawm hi Lusei ei ni vawng thu le Luseihai khawm hi Hmar an ni vawng, an ti lei ringawtin hin, nang le kei, Hmarnauhai hi Kuki amanih, Mizo amanih ahin buoi nawng ei tieu. Ka nuomtak chu, ei Hmar nina hi Mizo Nationalism le Kuki Nationalism-hai hin an chimral nawna dingin Hmarhnam / Hmartawng hi thei tawpin chawisâng ei tieu. Mi thenkhatin Lusei tawng hi Hmar tawng Part –II, ti a an hang sie vel hi chu, kei chun ka pawm naw zawng tak a nih, ka ngaidan chun Hmar tawng le Lusei tawng hi inang vieuin, Hmarmi po pohin Lusei tawng hmangvawng inlakhawm, Lusei tawng hi Hmar tawng ningai naw nih.
‘Aw kan Hmarram ... Cachar, Haflong, Aizawl, Manipur’ tia ei hang sak chang hin chu, ami sukhlim vieu chutie, amiruokchu, vawisuna Hmarnauhai po po hi Aizawl khawpuia hin inpem lut vawng inlakhawm Aizawl khawpui hi Hmarram / Hmar khawpui ningainaw nih, chuongang bawkin Imphal amanih, Shillong amanih, Delhi amanih-hai hin Hmarnauhai po po hi in pem lut vawng inlakhawm Hmarram / Hmar khawpui ni ngai bawk nawnih. Sawrkar sinthaw le ahausa sa’n ei maksan ram, motor le kawlphetha êngin a paw mumal nawna hmunhai ku hi anih, Hmarhai hnam a ei ngirsuokna ding hmun chu. Thenkhat Hmar hmangai luot leiin State amanih, Union Territory amanih ei hang sam ngam el hi chu, India ram Pawlitiks ngirhmun en chun sam chi a ni di’m maw!? Telegan State hran hnina, Nagalim le Gorkhaland-hai a politics invir dan ei en chun Hmarnauha’n mania inrelbawlna hran nei chu thilharsa tak anih hmel, asanchu hieng ei tarlanghai hin an thil hnina huomsuong ahai hin mipui khawsak dan, nuphung an thuhne vieu khawmin sawrkarin an thil hni a suk puitling naw ana, eini Hmarhai, ei ai a ngir ding nei phaknaw tephai tading hin sawrkar nawr a va harsa awm de! Mizoram a Autonomous District ei hni khawm hi kum hieng zat a liem ta a chu ei ngirhmun chu hi hi a ni tawk ana. Mizoram a Autonomous District ei neitheinawna pakhat ni dinga in lang chu, kei chu Hmar ka nih titu ding Hmar mipui aiaw Mizoram sawrkar rorelna khawl a ngir ding le atir tuding, kei chu Hmar ka inti mipui ei um naw lei ni mei a tîm? Hmar mipui demand area-a MLA pathumhai hi Hmar hnam tadingin an MLA nina inban ngam hai sienchu hieng ang ngirhmun a chau hin chu ngir ta naw manih, amiruokchu hi tak a chieng em em chu Hmarha’n ei ram hnina huomsung a hin, mipui atam lem hin Hmar hnam hminga, a hrana ram nei, ei Amen lêm nawh ti a chieng a nih. Hmar ti hi chu Zoram Khawvel a hin chu a tlana naw khawp el, Registered Political Party ei nei ve sun HPC khawm hin, ei ram hnina huomsunga hman MLA neithei lo ei na, tlawma Hmar le inzawma MLA ei neithei ve sun khawmkha, mipui lei nilovin Silaimu sem lei ani kha. Ei ram hnina a hin Village Council (Khawsung rorel khawl) tamtak a uma, hi tak a khawmhin Tinghmun khuo a chau Village Council ei in din thei a ni hi, a dang po chu Congress, ZNP, PC le MNF-haiin an in sem a nih.
Hieng Tuiruong kamvel, Tuithaphai le hmun then khat khata, ei chengnahai ei hang thlir vel chun, ei ram neisahai khawm hi a kiem mek ni’n an lang, asanchu, ei teima tawknaw lei le Pathien thu ei awi tawknaw lei ni mei a ti’m? Ei leilet le ei in hmunhai hnamdanghai lai ei zawr tlawng a, tiena Israelhai angkhan Jubilee kum a um ta hmel si nawh. Thu leng vel, ka hriet ve pakhat chu, kha hma deu khawm khan Rengkai Lalpa’n a ram Hmarmi nilo kuomah zawr atum thu le ei hnam thuoituhai thurawn zawmin, a zawrnaw mei mei ni awm tak anih. Ei ram delsahai hi hnamdanghai kut a tluklut zo hma hin iengtinam thanglang ei ta aw? Kohran le Pawlitiks a hin inthuruolna tha tak leh hma ei lak tlang chu a hun tatak zet anih, i ti ve naw maw?
India sawrkarin mimal sumdawngnahai le ramdanghai le insumdawng tawnnahai hung hawng lienin, eini, India hmarsak mipuihai changkangna ding ti’n ‘Look East Policy’ dam hung induong suokin, hmasawnna chu an chawma inchawm zawt zawtin, Mizoram, Manipur le Nagaland a hai rail lampui le Lirthei lamlienhai riruong leh siem meka ni lai hin, eini, Hmarnauhai hi inkharkhipin, ei changkang / ngirsuok phana ding ni a inlang, Tipeimukh dam hi ei dodal bur el di’manih? Ieng am thaw tâng ei ta aw!? Ei ngirhmun tak hi chu, tiena Samari kul puoa Phar palihai ang el kha ei nin ka hriet, khawpui sung lut dingin phingtam a thina, annawleh Hmelhmahai kuomah thlûklut hlak chu Kawlhnam a sat hlum.
Nang le kei, hnam hmangeina neituhai hi, ei inenchieng a hun ta tak zet naw maw? In chimralna (assimilation) kan ditnaw ti a thu le hla a ei in zâwt lai hin, mani ditthlangna, Jordon phaizawl, duamna hin a mi la chȋm ral el naw ding maw? Ei miziehai ei hang en hlak chun keiin nei lang, keiin fa lang tiin, mani chanvo thatna ding a niphawt chun unau sietna ding intlun nuom tuhai ei ni si a. Lota chun saktieng Jordon phaizawl a hang en a, hring dup le mawi em em chu a thlang a, chuongchun sodom le Gomora khuo chen in an tawl pei a, atawp a chun a dit thlang ram chu mei le kat in suk chimit let der anih. Nang le kei, Hmarnau tlawmte chauhai hi ieng lampui am ei hraw a? Aw thalai, Sodom le Gomora ang a suk chimit a ei um nawna dingin i lampui hraw kha hang sut ta? Hur le indit hmang a um lovin, ieng tinam a ni a, ei in thuomna ding kha? Ngaituo rawh, AIDS le natna chi tamtak kar a hin, i nun kha a himnaw chun Hmar hnam / Hmar tawng hi him zo nawnih. Ei chengna ram leilung le ei tawng, ei hmangei a ni chun iem thaw tâng ei ta? Dak la, i singmit hang in lên rawh, Hmarnauhai hnam le tawng a ei pieng suokna ram Rounglevaisuo biel, nuavang michawi lien tu hi, India sawrkarin mi suksiet pek a tum si a. Jordon phaizawl ang a inlang, Tuitingin a hung hring suok ding hmasawnna le changkangnahai hin thawnthu ang mei meiin Hmarnauhai tawpna min tluntu a ni el naw ding maw? Israel nilovin chekpawl hnam, ’Samari’ hungpieng suokna ding a ni el naw maw?
Hmar tawng le hnam hi nang le kei a hin dam zing sien, ei lungril a hin, takram chang thei di’n, Hmarram hi pieng mawlh rawh se.
Hmar ti hi, iengtik hun a inthawk a’m ‘hnam / tawngin’ ei put, ti khawm ngaituo lem lovin, mi tam tak chun ei inruichil tawp a, hrilfie khawm angai nawh, Hmar chu Hmar a ne’l an nawm ei ti hmawk hmawk el ni’n an lang. Pu Hranglien Songate, Pu T. Khuma le thuoitu/upa thenkhathai hril dan chun Hmar ti ei put nasan chu ei pi le puhai khan an hnungtieng an sam an in tawm hlak a, chu taka inthawk chun Hmar hming hi hung put einih, an ti chu. Chun ngaidan pakhat nawk a chun Hmar ti hi Hmar (North) amanih, Hmar tiengmi (Northern people) amanih ti na anih, an ti chu, asanchu Luseihai a inthawkin Hmar tieng a cheng ei ni leiin. Chuleiin Luseihai a inthawka Hmartieng a chenghai tawng chu Hmar tawng a hung ni a, a mi chenghai khawm chu Hmar mi ei hung ni el ni’n an lang. Hmar ti hi, ei hang thlir vang vang chun Hnam hminga ei putna hi chu a la sawtnaw ni’n an lang, asanchu ei pi le puhai a inthawka ei in hlân sâwng, ei thu le hla a hai hin Hmar ti ei put awm hmu ding a um nawh, Ei pi le puhai a inthawk a ei put tan nisienchu ei Sikpui Hla a hin Hmar ti hi chuong ve ngei a tih, ei Sikpui Hla a inthawk a chieng em em chu Manmasie thlahai ei nih, ti hi anih.
Naupang sande sikul kan kai lain, kan hotuha’n an minchuktir dân chun Hebrai (Hebrew) ti umzie chu, ‘Ralkhingtiengmi’ tina anih. Abraham kha Eupheretis Vadung raltieng, Kaldaihai khuo, Ur-a inthawkin Pathien kona dawnin, Ramtiem ram, Kanaan ram pana an zin velna le Aigupta rama tam leia an zinna ahai khan Ralkhingtiengmi ti’n an lo kova, chuleiin Hebrai ti hming hi ahung suok / um pha anih. Hebrai hi Israelhai tawng ani a, chun khawvel hmun hrang hrangah invak darin, tawng dang dang an hmang hnung khawma, an ram le an hnam keikhawm tu le suk hringtu pawimawtak anih bawk. Hebrai tawngin thu an zieka, an in hlan sawnga chuleichun Hebrai tawng / hnam ahring zing pha anih. Hebrai ti hi Lalpa Jehova, Hnuoi le van siemtu’n Israelhai hnam le tawng hming ding a pek khawm a ni chuong nawh a, Lalpa Jehova ringlotu, Kanaan mihai le Aigupta mihaiin Abraham le a thlahai (Israelhai) an kona mei mei anih. Chun ei Bible Thienghlim a khawm Pathienin a pek anih ti a inziekna a um bawk nawh. Israelhai hin Hebrai ti hi anni’n an phuok le an Pathienin a phuok pek ninawsienkhawm, Israel tawng anih, ti hi chu an pawm nghet tlat anih. Vawisun hin, Hmar ti hi, Hmar intihai hin ei phuok ninawsienkhawm ei hnam le ei tawng anih ti hi pawm ei tieuva, hnam thi, tawng thi el a hung ninawna dingin theitawpin thanglâng ei tieu.
Mi thenkhat chun, khawlai hmun a khawm um inla, ieng tawng khawm hmang inla, ei Hmar nina chu bo chuong lova, a pangngai zing an nawm ei ti ani awm ie. A ni ngei el, thisenah, ei Hmar nina bonaw nih. A miruokchu, hi thil a hin chu eini, Hmarnau tlawmte chauhai, hnam anga ei dam suokna ding chun ei fimkhur hle a ngai in an lang. Hmarnau thenkhat chun, Hmartawng hre tanawhai sienkhawm, Hmar an nizie inentirnan an hming khelah Hmar ansie hlak hi tie. Thenkhat nawk ruok chu Hmar anni le anninaw khawm inhrie ta lohai, hang hril rak khawma umzie um ta lo ei tam khawpin an lang. Entirnan Mizoram khawpui tak, Aizawl a hin Hmarnau hmel tha le hausa tak tak ei tam vei leh, Hmar hming chawia thilthaw ni khuo ahai hin Hmar tawng hmang, atlangpuiin ber tak takhai hi ei fekhawm nin an lang, asanchu a tawng hmang ta naw nana chu hnam a hin an lo thitah nin an lang,(milo hrithiem inla) Keih pawh Hmar ka ni a lawm ti tu le Kei chun Hmar ka nih tituhai inkar hi chu akar hla tak a nih. Vawisun a Hmarhai hi Hmar min nitirtu chu ei tawng hi anih. Ni khatlai el a Mizoram Legislative Assembly-a Chief Minister-in Sinlung Hills Development Council chungchanga a thu hril kha ei en chun, thangtlawm um vieu sienkhawm thudik a hril ani si, ‘SHDC chungchang ka chiengnaw ang bawk hin, SHDC hi chiengnawsien, sawrkarin a nuom nuom a chinglet thei hi a huntawk chau’ ati le ‘SHDC hi Mizoram sawrkarin Act in nitir pal a tih’, ti a tri thu a hril anih kha. Khânga CM-in thu a hrillai khan Hmar mi, Hmar thisen a insieng, Assembly Hall a khan ei umnaw amanih ti inla? Um e, amiruokchu kei chu Hmar ka nih titu ding ei umnaw lei anih. Ei ni Hmar nau tlawmte chauhai hi hnam a hin ei chieng a va ngaizuol de. American-hai khu hnam an ni a, ieng tawng khawm hmanghai sien American an ni zingtho, chuongang bawkin Hmarhai khawmin ieng tawng khawm hmang inla Hmar ei ni zing tho, ei ti ani thei, hnam thil a hin chun Hnam changkanghai le Hmar ei tekhi chun indik theinaw nih, Hmar ti hi chu tawng le hnam in kawp tlat anih. Hmar tawng a ral chun Hmar hnam a ral tina a ni el nawding maw?
Ei hnam thuoituhan, Hmar pahnam an tarlangna a thangvenaw Hmarnau / Hmar hnam tamtak ei um, hienghai hi Hmar hnam anhnuoina lai dawmkangtu le a kul a tai a hnam ta dinga inpe, an hringna chen khawm inhlan ngam an nih, hienghai hi tuha’m ei ti chun Hmartawng indakhlawk a hmangtuhai hi an nih, ruol thenkhat lem chu Hmartawng an hmang lei ringawt a mi kut tuor an um bawk. Vawisuna Hmar nunghak, tlangval, hmarnau lekhathiem tamtak khawpui a chenga, umhmun nghet khuor mekhai hi Hmarnauhai tading chun suong ei um in, mi tamtak inhnemna ei nih, amiruokchu, ei tu le te la hung um dinghai hi ieng tawngin am tawng tâng anta aw!? Ei tawng, Hmartawng hlak hi insuong khur a bak hmangna ding um lo. Ei mithiem thenkhat, sapram chen chen a hmunnghet neihai hlak hi an nauhan Hmartawng hmang thei ta lohai, an tu le tehai chu ngaituo um tak an nih. Hmar hnam hmangaituhai chu maw, Hmartawng indakhlawk a hmang tuhai hi anih. Chun, Hmarnauhai lai a, Hmartawng hmang lo / hrelo, Hmar hnam hmangeitu chu za-ah pakhat (1%) khawm ei um hmel nawh. Vawisuna Hmar hnam thuoitu, hnam tadinga ringtan ngam, hringna inhlan ngamhai hi Hmar tawng hmang theilo le Hmar tawng hrelo um thak nawnihai. Sakei thi hnung nekchun uite pakhat cho khawmin thil a thaw theilem, asanchu, hmel hrietlo, misuol a lo in bau khum thei a, rukru lakah in a veng him thei tlat chu tie. Nang le kei hi lo hausa er uor inlakhawm Hmar hnam tading chun mithi, tangkaina neilo ei ni thei tlat chu tie!
Hmar hmangaituhai hin, Hmar hnam / tawng a thi nawna dingin, ngaizâwng ei nei khawmin Hmartawngin nei ei tieuva, chuongang peiin ei khuosawt, lungngai le lawmlainia khawm Hmar tawng bawkin, chuongang tak a ei thaw chun ei thu le hla hi, hi nek hin hung hausa ngei ngei a tih. Amiruokchu, mi thenkhatin Hmar tawng a lekha bu siem/ziek chu a hlâwk naw êm, Hmar tawngin siem/ziek ta nâwng ka tih, ei ti a ni chun an dikna lai khawm um atih, ei tawng a lekhabu tha tak tak hang ziek le hang inlet dingin a zawrna ding um lo chu, ei ni, Hmar mipuihai hlak chu lekhabu ngainat nachang hrie ei tlawm bawk, nitin chanchin bu ei neisun Hmasawnna thar khawm hi a hring in hrova ei siem nin an lang. Ei thu le hla thiem tam takhai hlak hin, Hmar tawng nekin Lusei tawng ei ngaina tan nin anlang bawk, anngainat nasan ni dinga in lang chu a zawrsuokna, dawr ni’n anlang, entirnan Pu L.Keivawm hin Zoram Khawvel a ziek hma le a ziek hnunga, a hming inthang dan le a lekhabu zieka a pawisa laklut inang naw nih, chuongang bawkin ei hlasak thiem - ICI hlapawl, Lalruotmawi le a dang danghai hi. Amiruokchu, unau ei tawng, ei hnam athi nawna dingin thang ei lak angai anih hi, thu le hlaa ei hausa naw chun thang le thar la hung um pei dinghai hin ei tawnga inziek lekhabu tiemding an tlasam chun, ei tawng hi a ral el thei ding anih. Mani hlawkna ding um nawsienkhawm, ram le hnam hmangaina leiin (kei te lul hi mihai thurawn petu ding ni naw lang khawm) ei mi thiemhai hin a tam thei ang ei tawngin lekhabu mi siem / sie pek thei hai sien chu aw!
Hmar intihai hi a tlangpuiin, a tamlem chu Ruonglevaisuo biel fe thleng a hmun dang danga inbeng bel / umhmun khuor tahai, Ruonglevaisuo biela chenghai le in fe paw zing zing hlak le tawng hmun khat hmanghai hi ei ni’n an lang. Chun ei hnam thuoituha’n Hmar Pahnam an zieklangna a Pahnam tam takhai hin chu Hmar an inti ve lêm nawn an lang, entirnan- Aimuol, Hrangkhawl, Chawroi, Chiru, Kom, Khawlhring, Ngente, Hnamte, Khiengte, Sakechep le a dang danghai hi, hieng ei tarlanghai hin Hmar an inti nuomnawnasan niding a inlang pakhat chu ei cheng hmun khat lai khan Hmar ti’n ei lan konaw lei ning a tih, ti hi ring a um.
Eini, Hmarnauhai hi hnam a hin ei chieng a va tul de! Mizo Nationalism le Kuki Nationalism-in a mi hnengbuoi zing lai hin. Cachar, Assam a theitawp suoa development council ei chosuok ve hlak hi, thang ei lak thiemnaw chun, hnam danghai insukhausakna ding ringawt a ni hmel si.
Kuki Nationalism hin Hmarhai hi a mi huomsa reng am aw? Ei mithiemhai hril dan chun Hmarhai hi Kuki tia ko hmasatak ni awm tak ei nih. Chun, Indian Constitution Schedule Tribes Order 1950 khawm ei en chun, any Kuki tribes ti hnuoia a hin Hmar pahnam hieng- Biete, Changsan, Hrangkhawl-hai hi ei inziek lut bawk. Chun athen hieng- Aimol, Anal, Chiru, Chothe, Kom tihai hi Schedule Tribe hranin ei inzieklut nawk bawk. Chun, tuta Kuki State Demand thua hin, Hmarnau tamtak chun ei phur hle a, a thuoitu tua dam ei thang ni awm taka nih.
Mizo ti chungthu a hin, ei ni, Hmarnau tam tak lai hin, Mizo ka nih inti le Mizo ka ninawh inti, ei um teu ni’n anlang. Mizo ei inti nuomnaw nasan niding a in lang chu, a hma a Mizo hril fiena ‘any Lushai tribe’ ti an hmang lei le Mizo tawng chu Lusei tawng a ni, ti a an ziek lei kha ni mei a tîm? Chun ei ni, Zohnathlak tawng dang dang hmanghai a mi huopsanawa ei inhriet leikhawm anithei bawk, tuhin chu Mizo hrilfiena a ‘any Lushai tribe’ ti kha, Zohnathlakhai po po huopin le Zohnathlakhai po po an inti Mizo theina nadingin ti’n Mizoram State Legistature chun alo nawtre tah a nih. A hrim hrimah, mi hi ei chungah an thavieu chun kawmaw insuo hi harsa ve deu a nih. Mizo ti ahin, eini Hmarnau tam takhai hi chu ei lung a awi vieu tah nin anlang. Central YMA thuoitu tam takhai khawm hi Hmar ei ni a, tuta (Thlaram, 2011) President nilai lem hi chu Lungtau, Intoate a nih. Mizo Union hunlai a thuoitu tam takhai khawm kha Hmar ei ni bawk, chun Mizo Union le Greater Mizoram chungchang a khawmkhan Manipur a Hmar mipui khawmin ei phur pui vieu ani nawmaw? Chun, Mizorama, Khawbung khaw (Hmar Pahnam, Khawbung hnam hming chawi a sak) mipuiin “Mizo Hlakungpui Muol” an indin a, hi tak ahin Zohnathlak thu le hla thiem, an kut hnung hrietzing tlak a an ngaihai, Zoram hmun hrang hrang ami (mi 33 lai lak lut anni tah) an lak khawmhai hrietzingna Tlânlung, hmun inhawi deu a hin andawh a, (hi hmun hi khawvel hmun hrang hrang a Zohnathlakhai hriet le kan a hung ni mek a nih) hi hmun ahin, eini, Hmarnauhai tading chun thu le hla a ei pa, Pastor Thangngur ngeikhawm lak lut a lo ni zing antah. Mizo ti umzie hi ei bichieng chet chet chun Hmarhai hi Mizo eini le ei ninaw thu a chun hringmi zaleng po pohai hi Adam le Evi-thlahai vawng ei nih, ti ang hi a ni el naw maw?
Mi hi an ngirhmun a ei ngir si naw chun, hang inthiemnaw ringawt hlak hi a thei si nawh. Entirnan, nang le kei hi Middle East ram thenkhat a khun, ei lo pieng ni sienchu ‘Muslim rawlrala che pawl’ ninawng ei tih, tunam ti thei ei ta? Hmarnau tam takhai hi chu Mizo ti hming hin a mi lempil mek nin an lang. Ei ni, Hmar ha’n kan ram ei ti ve pakhat, Sinlung Hills huomsuong hi ei hang thlir chun, abiekin hieng Khawlien tlangdung, Suongpuilawn tlangdung ahai hin Pi le Pu tam takhai hi Hmar tawngin indakhlawk in ei inbiek pui thei a, Nu le Pahai hi Hmar tawngin an tawng thei tawk tawk a, Naupanghai ruokchun Hmar tawng an hriet ve tawk tawk chau an ta hi. Mizo Union thiltum ‘Greater Mizoram’ le MNF thil tumhai kha lo puitling sienchu, vawisun a Hmar inti hai hi, ei unau Mizorama Hmar tam tak Lusei tawng hmang tahai ang tho hi ei ni el naw ding maw?
Vawisunhin, mithiem tam takhaiin, thiem takin, Kuki inti hai po po hi Hmar an ni vawng a, Hmar intihai po po khawm hi Kuki ei ni vawng ti le Hmarhai khawm hi Lusei ei ni vawng thu le Luseihai khawm hi Hmar an ni vawng, an ti lei ringawtin hin, nang le kei, Hmarnauhai hi Kuki amanih, Mizo amanih ahin buoi nawng ei tieu. Ka nuomtak chu, ei Hmar nina hi Mizo Nationalism le Kuki Nationalism-hai hin an chimral nawna dingin Hmarhnam / Hmartawng hi thei tawpin chawisâng ei tieu. Mi thenkhatin Lusei tawng hi Hmar tawng Part –II, ti a an hang sie vel hi chu, kei chun ka pawm naw zawng tak a nih, ka ngaidan chun Hmar tawng le Lusei tawng hi inang vieuin, Hmarmi po pohin Lusei tawng hmangvawng inlakhawm, Lusei tawng hi Hmar tawng ningai naw nih.
‘Aw kan Hmarram ... Cachar, Haflong, Aizawl, Manipur’ tia ei hang sak chang hin chu, ami sukhlim vieu chutie, amiruokchu, vawisuna Hmarnauhai po po hi Aizawl khawpuia hin inpem lut vawng inlakhawm Aizawl khawpui hi Hmarram / Hmar khawpui ningainaw nih, chuongang bawkin Imphal amanih, Shillong amanih, Delhi amanih-hai hin Hmarnauhai po po hi in pem lut vawng inlakhawm Hmarram / Hmar khawpui ni ngai bawk nawnih. Sawrkar sinthaw le ahausa sa’n ei maksan ram, motor le kawlphetha êngin a paw mumal nawna hmunhai ku hi anih, Hmarhai hnam a ei ngirsuokna ding hmun chu. Thenkhat Hmar hmangai luot leiin State amanih, Union Territory amanih ei hang sam ngam el hi chu, India ram Pawlitiks ngirhmun en chun sam chi a ni di’m maw!? Telegan State hran hnina, Nagalim le Gorkhaland-hai a politics invir dan ei en chun Hmarnauha’n mania inrelbawlna hran nei chu thilharsa tak anih hmel, asanchu hieng ei tarlanghai hin an thil hnina huomsuong ahai hin mipui khawsak dan, nuphung an thuhne vieu khawmin sawrkarin an thil hni a suk puitling naw ana, eini Hmarhai, ei ai a ngir ding nei phaknaw tephai tading hin sawrkar nawr a va harsa awm de! Mizoram a Autonomous District ei hni khawm hi kum hieng zat a liem ta a chu ei ngirhmun chu hi hi a ni tawk ana. Mizoram a Autonomous District ei neitheinawna pakhat ni dinga in lang chu, kei chu Hmar ka nih titu ding Hmar mipui aiaw Mizoram sawrkar rorelna khawl a ngir ding le atir tuding, kei chu Hmar ka inti mipui ei um naw lei ni mei a tîm? Hmar mipui demand area-a MLA pathumhai hi Hmar hnam tadingin an MLA nina inban ngam hai sienchu hieng ang ngirhmun a chau hin chu ngir ta naw manih, amiruokchu hi tak a chieng em em chu Hmarha’n ei ram hnina huomsung a hin, mipui atam lem hin Hmar hnam hminga, a hrana ram nei, ei Amen lêm nawh ti a chieng a nih. Hmar ti hi chu Zoram Khawvel a hin chu a tlana naw khawp el, Registered Political Party ei nei ve sun HPC khawm hin, ei ram hnina huomsunga hman MLA neithei lo ei na, tlawma Hmar le inzawma MLA ei neithei ve sun khawmkha, mipui lei nilovin Silaimu sem lei ani kha. Ei ram hnina a hin Village Council (Khawsung rorel khawl) tamtak a uma, hi tak a khawmhin Tinghmun khuo a chau Village Council ei in din thei a ni hi, a dang po chu Congress, ZNP, PC le MNF-haiin an in sem a nih.
Hieng Tuiruong kamvel, Tuithaphai le hmun then khat khata, ei chengnahai ei hang thlir vel chun, ei ram neisahai khawm hi a kiem mek ni’n an lang, asanchu, ei teima tawknaw lei le Pathien thu ei awi tawknaw lei ni mei a ti’m? Ei leilet le ei in hmunhai hnamdanghai lai ei zawr tlawng a, tiena Israelhai angkhan Jubilee kum a um ta hmel si nawh. Thu leng vel, ka hriet ve pakhat chu, kha hma deu khawm khan Rengkai Lalpa’n a ram Hmarmi nilo kuomah zawr atum thu le ei hnam thuoituhai thurawn zawmin, a zawrnaw mei mei ni awm tak anih. Ei ram delsahai hi hnamdanghai kut a tluklut zo hma hin iengtinam thanglang ei ta aw? Kohran le Pawlitiks a hin inthuruolna tha tak leh hma ei lak tlang chu a hun tatak zet anih, i ti ve naw maw?
India sawrkarin mimal sumdawngnahai le ramdanghai le insumdawng tawnnahai hung hawng lienin, eini, India hmarsak mipuihai changkangna ding ti’n ‘Look East Policy’ dam hung induong suokin, hmasawnna chu an chawma inchawm zawt zawtin, Mizoram, Manipur le Nagaland a hai rail lampui le Lirthei lamlienhai riruong leh siem meka ni lai hin, eini, Hmarnauhai hi inkharkhipin, ei changkang / ngirsuok phana ding ni a inlang, Tipeimukh dam hi ei dodal bur el di’manih? Ieng am thaw tâng ei ta aw!? Ei ngirhmun tak hi chu, tiena Samari kul puoa Phar palihai ang el kha ei nin ka hriet, khawpui sung lut dingin phingtam a thina, annawleh Hmelhmahai kuomah thlûklut hlak chu Kawlhnam a sat hlum.
Nang le kei, hnam hmangeina neituhai hi, ei inenchieng a hun ta tak zet naw maw? In chimralna (assimilation) kan ditnaw ti a thu le hla a ei in zâwt lai hin, mani ditthlangna, Jordon phaizawl, duamna hin a mi la chȋm ral el naw ding maw? Ei miziehai ei hang en hlak chun keiin nei lang, keiin fa lang tiin, mani chanvo thatna ding a niphawt chun unau sietna ding intlun nuom tuhai ei ni si a. Lota chun saktieng Jordon phaizawl a hang en a, hring dup le mawi em em chu a thlang a, chuongchun sodom le Gomora khuo chen in an tawl pei a, atawp a chun a dit thlang ram chu mei le kat in suk chimit let der anih. Nang le kei, Hmarnau tlawmte chauhai hi ieng lampui am ei hraw a? Aw thalai, Sodom le Gomora ang a suk chimit a ei um nawna dingin i lampui hraw kha hang sut ta? Hur le indit hmang a um lovin, ieng tinam a ni a, ei in thuomna ding kha? Ngaituo rawh, AIDS le natna chi tamtak kar a hin, i nun kha a himnaw chun Hmar hnam / Hmar tawng hi him zo nawnih. Ei chengna ram leilung le ei tawng, ei hmangei a ni chun iem thaw tâng ei ta? Dak la, i singmit hang in lên rawh, Hmarnauhai hnam le tawng a ei pieng suokna ram Rounglevaisuo biel, nuavang michawi lien tu hi, India sawrkarin mi suksiet pek a tum si a. Jordon phaizawl ang a inlang, Tuitingin a hung hring suok ding hmasawnna le changkangnahai hin thawnthu ang mei meiin Hmarnauhai tawpna min tluntu a ni el naw ding maw? Israel nilovin chekpawl hnam, ’Samari’ hungpieng suokna ding a ni el naw maw?
Hmar tawng le hnam hi nang le kei a hin dam zing sien, ei lungril a hin, takram chang thei di’n, Hmarram hi pieng mawlh rawh se.
Tarik: Thlaram, 2011.
