I thatlaini le vanglainihai chun nangma siemtu che chuh hre zing la.
Thalai Day hi day dang ei inser angin a hunbi in angin khawvelin a hmangve naw a hawi a, eini khawmin ei hmang ni hih an ang vawng naw nisien a hawi. Chubakah, Kohran pawl a hmangnaw khawm ei um nuolin an lang a, a tawi thei ang takin ka hung ziek a nih.
South Africa khawpui Johannesburg simtiengpang Orlando West SOWETO ( South Western Township) an ti hmun a hin kum 1976 June 16, khan hnam inthlierhrangna (Apartheid) le kum 1956 laia South Aferica sawrkar laipuiin Bantu Education Act, an ram School Curriculum ah Afrikaans hmang dinga alo passed an ditnaw leiin students mi 15000 neka tamin an ditnawzie entirna dingin lamhrawna (Protest) an nei a. Sawrkar tieng venghimtu pawl (Police) hai leh an inbei ta chiem ela, dodaltu student an hrat a, an huoisen si leiin Policehai chun lamhraw pawlhai tieng ngha zawngin an silai chawi an hmet puok el ta a. Hi tum hin students mi 600-700 bawrvelin an hringna an chan a, mi sangkhat bawrvel an hliem bawk. Student singtel chuh ramdangah an tlanhmang hmang bawk a nih.Chuleiin hini hih South Africa rama chuh ursun takin THALAI DAY tiin an inser.
African National Congress a hung hrat a, Pu Nelson Mandela President a hung ni khan hi ni hih ni pawimaw a nih ti’n THALAIHAI NI tiin national Holiday dingin kum 1994 khan a puong a, a namdet nghal ta a nih.
Roman Catholic Kohran hai chun a hun bik um chuonglovin a tul angin an hmang ve a. Kum 1985 Pope John Paul II chun WYD ( World Youth Day) tiin diocesan ( D/S annawleh PO bielsung tina ang ning a tih) kumtinin a hmang pui a, khawvel pumhuop R.C. a ding ruok chun kum 2/3 hnungah hmunding ruotin a hmangpui pei hlak.Kum 1985 khan Vatican City, Rome ah a hmang a, Thalai nuoi thum neka tam an fe khawm a, thupui tha tak tak siemin an hung thaw pei a, holy mass a um hlak bawk.Kum 2008 July 20 Australia khawpui Sydney WYD08 an hmang tum lem chun Pope John Paul II thlaktu, Pope Benedick XVI khawm thangin fekhawmhai po po Holy mass a nei pui nghe nghe a, a ropui hle. Makteduoi 4 neka tam an fekhawm a, Australia ram a Thalai fekhawm tam tak a record a nih.Hi tuma an thupui ( Theme) chuh – Receive The Power ti a nih.Australia puotieng Vatican City ah kum 2000 a WYD00 a chun Thalai Makteduoi 2 neka tam an fe khawm. Tukum chuh Madrid, Spain ah August khin WYD11 a um ve thung ding a nih.
Swami Vivekananda piengchampha 12, June 1984 hi India rama chuh Thalai Day-in a hmang ve thung. Kum 1985 khan India sawrkar-in National Youth Day tiin alo puong ve tah nghe nghe a nih.Hi ni hin Thalaihai insukhlimin hieng - recitation, musics, conventions,essay writing,sports,social works le inruolsiekna hrang hranghai an nei ve hlak.chubaka, mirethei Hospital a thangpuingaihai an thangpui a, thisen pek tulhai chen an pek hlak.
Leh, eini khawm May 29, 2011 hi THALAI DAY a ei hmang ve hun ding a nia, ei umna le Kohran rorelna le in mila ei hmang ding chuh ni ve el a tih. Pathienin thalaihai hi a dittak a ni leiin, setan khawmin a min hnar ngawi ngawihai ei nih.Chuleiin, hini hi hmang tangkai seng inla nuom a um.Thalai day hmangtu hai po po Lalpa malsawmna chang dingin ditsakna kan hlan.
