CCPUR: March 23, 2011 ni khan Vangai biela Kangreng khuoah Hmar National Union (HNU) Joint Leader’s Meet hlawtling taka nei a nih. HNU Joint Leader’s Meet-a hin HNU General Headquarters ṭhuoituhai, Tipaimukh Block Congress ṭhuoituhai, HNU Vangai Block, HNU Barak Valley Block, HNU Hmar biel le HNU Tuiṭhaphai Block haia inthawka khawtina members le ṭhuoituhai ṭhahnemtawktak an ṭhang. Mikhuol fekhawmhai fak dingin Vawkchal pathum zet thata ruoiṭhein mipui, members le ṭhuoitu fekhawm han hlim le lawm takin ruoi an kiltlang niin thu ei lo dawng. HNU Leader’s Meet-a hin HNU Party ngirhmun le hmatienga fe pei dan dinghai hriltlang le ngaituotlang a ni baka hungtlung ding kum 2012 a Manipur Assembly Election hung um dinga khin Dr Chaltonlien Amo, President, HNU General Headquarters chu lungruol takin 55-Tipaimukh A/C-a HNU party candidate/support dingin thutlukna an siem. Khaw hran hrana inthawka ṭhuoitu le members fekhawm han kum 2012 a Manipur a MLA election hung um ding le inzawma hma an lo lak danhai report an pek baka hmatieng peia khawm lungruol taka hma an lak pei dan ding thuhai an hril leiin ṭhuoitu le members fekhawmhai inhawi an tiin an hlim hle. Members le ṭhuoitu fekhawmhai chu Pathien zara inthlang huna hlawtling ngei dinga hma latlang seng dinga thu inhmu le intiemin March 24, 2011 ni khan an umna khuo seng hlim taka panin an lo inṭhedar nawk tah. Hi Programme hmang zo hin Dr Chaltonlien Amo le ṭhuoitu iemanizat chu motor 3 ṭhuoi le hmangin Vangai biel an fang a, March 24, 2011 khan Sartuinek khuo an va kan a, khaw mipui han um ni kham meuva hmuokin an lo lawm lut a, mipuihai beiseina an suksei hle niin ei report dawngna chun a hril. Dr Chaltonlien Amo le HNU General Headquarters ṭhuoituhai chu him le dam takin zani hmasa khan Imphal le Churachandpur an lo hung tlung nawk tah.~Source: HmasawnnaThar
Photo source:Hmar.net
