Tarik Ni 16 (Tuesday) zing dar 8:15am khan Rev. Thattinlien Sungte (k89) chun a khawvel silpuon chu sie hrein rawng a i bawl pek a Lalpa kuoma alo chawl hadam tah. Ama hi kohran a chauh niloin khawthlanga in hmang mi, a thisen zungzam achang at at thei sunga HSA Shillong Jt. Hqrs., Hmar Inpui, Shillong Region a Senior Adviser nilai HNAM PASALTHA a nih. Chuong anga hnam ta ding thahnemngai mi ani leiin hnam khawm ei chan ropui hle tiin, Shillong Val-Upa, HYA le Hmar Inpui hai inrawn tlangin khawtlang inthuoidana a thini a vuiliem el lo dingin rel a ni a, chuleiin, a ruong chun zankhat nunghak-tlangval le nupui-papui in anla cheltang a nih.
A nau Delhi a um, pa ruong hnawta hung hai khawm an rengin an hung tlung hman a. Tarik Ni 17 February, 2010 (Wednesday) dar 10:30am khan vuina programe siemin Shillong Hmar thlanmuolah a sakruong buonlei chang dingin vuiliem alo ni tah.
Ama hi an sumtuol (a pieng le murna) chuh Tuolbung, Churachandpur District, Manipur ana, chutaka inthawk chun Sartuinek inpemin, a pa Chawngneithang (Chawnga) le Sartuinek Lalpa chu thisen inzawm ang ela in ngaina em em a um hlak ana; hi khuo a an um lai hi a nih Mizo Union party thlifim hrattaka a hranglai. Mizo Union boruok chun Lal thuneina suktlawma mipui rorelna kha an dit ani leiin mipui kha a khukin an khu chum chum el a, Sartuinek Lal Pu HB Sela khawm a him bik chuong naw a, Pu Chawnga chen khawma lal tienga thang ti a ring hla leiin a chunga harsatna tamtak mipuiin an siempeka, hieng hun lai a inthawk a Pathien rawngbawl nuomna lien tak neiin Rev. Thattinlien Sungte chun tu khawm tan neilo Pathien rawng ka bawl ding a nih, tiin a lungril a sukthluk a. Hieng hun lai hin missionary sinthaw dinga Pathien kona ruok chu ala hmu nawh. Kum 1953 in Sartuinek khuo a hin Pathien le in tuokna an nei a, tukhawm tan bik neilo Pathien rawngbawl chu tumin February 2, 1960 khan Bhutan a ringnaw tuhai laia rawngbawlna nei dinga kona chu a hriet ta a nih.
A nuhmei chu Pi Lalnguri Sailo, Lunglei, Mizoram tieng mi ana, hieng anga missionary lungril put mi alo ni ve a, Rev. Thattinlien chanchin alo hrieta hlak a, a ngaisang em em a, lekhathawna chanchin inhriltuoin an inhmu na hmasatak kum 1966 Silchar, Assam ana, hi taka hin Rev. M. Houghstad Minister na hnuoi Lutherian Church, EFI a ‘Tiem tlat e’ tiin kut-insuina annei nghal ta a nih. Hi kum vek March 6, 1966 hin Ngurte, Manipur a Rev. HL Sela Minister na hnuoi a Pastor Ordination pek ani bawk a. Bhutan rama missionary sinthawin pension chen a um in, kum 1995 khan Kangreng, Manipur a EAC Assembly chun pension alo pek ta a nih. Missionary sin a chu pension ah an ngai chuong naw a, a sunzawm zing tho a nih. Chu hnung hun sawtnawteah ama aiaw tu ding Kohranin missionary dang a hung sie a, chun a sunghai Shillong tieng hung siehre in ama chun a sin ala sunzawm pei a nih. Hnam pasaltha ani bakah Pathien mihrang pasaltha a nih. Ar nghal ei that chun a ai aw tu ding an hung suok kha tie, ama ang hi iengtik am ei nei nawk ta ding. A pam ngawtel.
Nau pasal-1 le Nuhmei-3 a nei a, a Upatak 1) Grace Pathien rawl, 2) Mr. Richard Sungte, 3) Ms. Pricilla Sungte le Ms. Dorcas Sungte an nih.
Hun iemani chen a inthawk taksa alo hrat tawk tanaw leiin Shillong tieng bukhuor lem kha a tul taa, kum 1993-2007 Shillong a EAC kohran indin a inthawk Pastor sinthawin a um a, a kohran bikhai chauh Pastor ni a tum nawh. Kohran dang dang hieng Mizo Presbyterian, Baptist kohran, tawng dang hmanghai lai khawm rawngbawlna a tulna tieng tieng a nei hlak.
HSA, Shillong Jt.Hqrs in nikum 2009 a Fresher’s meet hmang tum khan Lifetime Achievement Award anpek dawng dingin Motor in anhung thuoi tuma students haiin an chel bat a, a thuhril mipui laia a nei kha a nuhnungtak an tah. Chutaka students le mipui hai kuoma a thucha nuhnungtak chuh HMAR NAU HAI HI VANRAMA A TAMTAK NI TUM EI TIU ti hi a nih. Tuhin chu a taksa Lalpaa thuphmang ta, hmuding a um ta nawh. A rawngbawlna le a kuthnung hi thangthar haiin chipchier deua suithlak Pathien mi, Hnam pa ni bawk a nih. A vuiliem ni a puon inkhumtu le raltu mipui tam zie kha chu hmu seng inla nuom a um.A chanchin hre a hmun hrang hranga kohran le khawthlang hunser lo hmanghai chu damten la hung insuo tum ei tih.
A mi thienghlim hai thina chuh Lalpa ngai a chun thil ropui tak ani sia.
