DHWA in thusuok pawimaw a siem

DELHI HMAR WELFARE ASSOCIATION

THUSUOK
Dated New Delhi:  February 24, 2025

Khawvel khawsak insang lem beiseina leiin eini Hmar nauhai khawm kum tinin India hmar sak state: Manipur, Mizoram, Assam, Meghalaya le Tripura haia inthawkin vai ram khawpui zuon thar ei pung pei a. India hmar tieng khawpui hieng Delhi le a sevêl, Gurugram, Noida, Greater Noida bakah Rajasthan, Himachal Pradesh, Chandigarh sûnga ngei khawm fakzawng le inhlawna awlsam lem zawng ei hung pung pei bawk. Hieng ani lei hin ei harsatna tuok hai le inbuoipui ei ṭul dan hai khawm a danglam pei a. Hmarnau ei nina anga siet le ṭhat ei tuok hunah fel lema ei insawmdawl theina ding, thil ṭha naw chi hran hran laka inthawka ei fihlim theina ding le fel lema ei invawng theina dingin vairam khawpuia khawsa hai le la hung zuon mek ding hai ta ding chau ni lovin ei ram tienga um nu le pa haiin ei hriet le zawm dingin a hnuoia thurawn hai hi siem a nih:

1. Vai ram khawpui lien a hai khawtlang le hnam thilah Hmar nauhai inkhâi khawmna Khawtlang le Sakhuo thilah ei nei deu vawng a. Mani umna peiah hieng Hmar hnam hminga inkhawikhawmna hai hi bêl tlat ding a nih. Mani umna khawpuiah hieng hai hi a lo um naw ani chun mani umna hmuna inthawka hnai tak ngaiven ding a nih. 

2. Tangka sum hi a hlu a, mitin mamaw khawm ani a. Amiruokchu, awlsam taka sum lam suok nazawng hi a ṭha in a him vawng nawh ti hriet tlat a ṭha. Khawpui a hai hin inhlêmna chi hrang hrang, a bikin nuhmei tadingin mani taksa inzaumna chen suksie thei khawpa sum lamna ṭha lo a hluor hle. Hieng hai laka hin fimkhur hle ding a nih. Mi nazawng le hriet chieng lo haiin, ‘chu lai, kha lai chun hlaw a ṭha, sin a ṭha’ an ti lei ringawtin mani nau nuhmei hai khawpuia inhlaw dingin tir nghal lo dingin ei infui a. Thil hrie lem hai indawn fie zet a, a him le him naw hai dam la bêl chieng hmasa zet hlak dingin nu le pahai ei in ditsak a nih. Hriet chieng naw leiin vai ram khawpuiah mani nau hai sinthaw dinga hung tir a, a hmunah beisei ang hmu ta lo, mani khuo tieng kir nawk el dinga laklaw a buoi, mihriem sie le ṭha hrietna khawm dawn zo ta lova khawsa zawm pei ei um hlak ti ei hriet nuom a um a, hieng hi ei tuok nawna dingin nu le pa hai ei fimkhur a ṭûl takzet a nih.

3. Vai ramah mimala (sungkuo ni lo)  khawsa hai tadingin Local Guardian nei ngei ngei ding a nih. Mi tu el khawm siet le ṭhat, vangduoi leia damnaw/accident hai tuok thei vawng ei ni a. Hieng huna hin a khawtlanga buoipui ṭul po po zo el thei naw châng a um hlak. Hieng ang huna ding hin local guardian nei a pawimaw zuol. Local guardian ding remchang hmu hlawl naw ani chun mani umna hnai taka ei Hmar chanpui hai dam inpawpui a, chanchin inhrietpaw pui zing hlak ding a nih. Khawpuia hospital ṭha lem pan dinga hung hai ta dingin, mani sung le kuo hnai, ruol le pai annawleh hmel hriet, khawpuia lo um ta sa hai zawng suok a inbiekpaw pui hmasa hlak hi thil bengvar tlak tak a nih. Vai ram khawpuiah harsatna lien lem ei lo tuok pal ani chun awlsam lema ei inbuoipui theina dingin sung le kuo hnai, ruol le pai le hmel hriet ei lo nei naw khawma a khawpuia Hmar welfare ṭhuoitu hai bêk inbiekpaw pui ding a nih. 

4. Delhi khawpui le a sevêl bîka dingin, hieng Delhi Hmar Welfare Association (DHWA), Hmar Christian Fellowship Delhi (HCFD) le Hmar Students Association (HSA) Joint Headquarters Delhi hai ei nei a. Hieng pawl pathum hai hi Hmar nau taphawt chun in sukchawngpu a bêl tlat hlak dingin le a sukvultu ni pei dingin ei infiel thar a nih. Khawtlang puipung ni khuo chi hrang hrang: Sikpuiruoi, Sikpui Sport, Mithi Ral le a dang dang haiah a tam thei anga ṭhang hi Hmar hnam zie mawi chawisangna ani bakah hnam khat ei nina anga insawmdawltuona ani leiin ngai pawimaw hle ding a nih. Chun, Delhi khawpuiah Hmar hnam besana kohran ngir lai, Hmar Christian Fellowship Delhi in Pathienni chawibiek inkhawm, Nilaizan ṭawngṭai inkhawm le chawlkâr tawp vengbuk inkhawm a huoihawt hlak a. Pathien thutak inchûktirna kawngah hun pawimaw ani el bâkah Hmarnauhai inhrietpawna dawkan pawimaw ani leiin a tam thei ang ṭhang hlak ding a nih. 

5. Delhi khawpui le a sêvêla khawsa hai le la zuon thar pei hai ta ding bîkin, kum tin Annual Registration nei hlak a ni a. Puitling pakhatah cheng 250 le naupang pakhatah cheng 100 pei Registration Fee lâk sa ani bawk. Annual Registration hi fel lema Hmarnau hai ei invawngna dinga thil pawimaw tak a ni a, Registration Fee ei lak khawm hi siet le ṭhat ei tuok hun le Hmar hnam rawng ei bawlna kawngah sum le paia mi phuhruktu ani leiin Annual Registration hi ngai pawimaw dingin ei inngên a nih.
             
(Lalhmingthang Songate)                                                  (C Hrangthangvung)
Secretary                                                                                  Chairman

SHDC Area Disturbed Area a puong kan phal nawh: PRISM

Aizawl (08/04/2015): Peoples' Right to Information and Development Implementing Society of Mizoram (PRISM) chun Mizoram le Manipur inrina bawr, Mizoramin a huom sung hmun thenkhat Disturbed Area a puong a tum nia inlang hi tha kan ti nawh a. Silai chawi ha’n nuom ang anga mipui an sukthlabar theina ding le, Mizorama hnam hai inpumkhatna suksie thei ding anga sawrkar hmalak tumna um hi suktawp nghal dingin sawrkar kan ngen a nih.

Kum 1966 khan Assam Maintenance of Public Order dan hmangin Mizoram pumpui hi disturbed area a puong a nih a. Disturbed Area ei ni leiin, Armed Forces Special Powers Act dan hmanga awpde zui ei ni nghal a. Silai chawi ha’n ei In le Lo, Bu-in hai chen an mi raw pek a, mi tam tak kap hlumin ram, tui-le-lo neilo khawpa sawisak le, pawngsuol khawm hril senglo an nei bawk. A rapthlak taluo leiin khang lai huna ei tuorna hai kha tu chen hin ei la hril suok ngamlo a nih a. Tuhin, ei thenum state thenkhata hmun thenkhat chu Disturbed Area in sawrkarin a puong mek a, hieng hmun hai hi Armed Forces Special Powers Act hmanga awpde mek an nih bawk. State thenkhata hmun thenkhat hai chu Rapthlak tak taka silai chawi ha’n mipui an sawisak hlak leiin suktawp an ni theina dingin Kohran le NGO bakah, mimal thahnemngai tam takin hma an lak a. Disturbed Area-a mipui tuorna suktawp tuma hmalakna ah hin PRISM chu kan thang vein kan theipatawpin hma kan lak zing a nih.

Ei thenum State haia Disturbed Area hai khawm suktawp a ni theina dingin khawvel huopa UNO le khawthlang ram changkang hai meu khawm thangruola hma lak ani lai a, State sunga Disturbed Area puong tumna hi thilthaw awm lo takah PRISM chun kan ngai a nih. Chu chau khawm chu nilovin, Disturbed Area-a hmun thenkhat puong ani hin ei hnam inpumkhatna a suksiet inlau a um a, Assembly Session nuhnung taka MLA han lungruol taka Mizo hnam inpumkhatna suksie thei thil thaw naw an nuom thu resolution an passed zo chaua, hieng ang thil an thaw nawk el hi PRISM chun inhme naw kan ti hle a nih.

Disturbed Area a cheng a, silai chawi hai insuk lu lienna hmun ani hi a rimum zie hre ta sa vawng ei nih. Chuleiin, hieng anga nasataka mipui hai tuorna tlung thei zawnga hma lak tumna hi bansan a, mipui hai himna ding le hrat nawk zuol le hma an sawn theina dinga hma la lem dingin sawrkar kan ngen a nih.




                Sd/-
(SL NGURSAILOVA SAILO)
General Secretary

CLARIFICATION

Tarik 22th March 15 (Chawlni) zan a Barak Valley H.S.A Jt Hq President Pu Lalthuthlung a chunga Hnam Sipai hai kut thlakna kha H.S.A President a ni leia kut thlak ani nawa, ama Pu.Lalthuthlung le a ruolhai mi pahni leh Hnam thuoituhai in ko in Hnam kalchawina le inthuruolna si zawnga an hmalakna hai tawpsan tadinga hril le warning pek an nia, a ruol mipahni hai chun thu zawm in an tawpsan nghal a, ama Pu Lalthuthlung ruok chun Hnam thuoitu hai thupek le hril chu iengmaloa ngaiin vawisun ni chen hin ala sunzawm zing leia a chunga hin zil hauna pek ani lem.

Chun, mituelkhawm Hnam inthuruolna si zawnga thu insuo amani thawlo hram dingin eiin fielin eiin ngen bawk anih.

Hnama inthawpui,

(L.K.HMAR)
PRO HPC(D)
General Headquarters, Sinlung.

Mipui Kuoma Hrilfiena ~ HPC (D)

March 26, 2015 nia PRO HPC(D) in thusuok a siem a chun hiengang hin an ziek.

Mipui Kuoma Hrilfiena

March 26, 2015

March 22, 2015 zana Mr. Lalthuthlung Hmar chunga keini HPC-D in Action kan lak chungchang a hiengang hi thil umdan a nih. Hi chungchang thu a hin pawl le mimal tukhawmin sawisel thei naw ni hai, Ama mimal thil suksuolna chunga kan thaw ding tak kan thaw a nih. Dan le dun kan nei a, ama khawmin a thu tiem a bawsiet leia a chunga hi thil hi hung tlung ta a nih.

Ama hi hnam inthuruolna suksie zawngin a chang rawp hlak a, Barak Valley Hill-Tribes’ Development Council (BVHTDC) Town Election hun a hai HSA a a nina changchawiin hi BVHTDC a hin Council Chairman dam dan naw ang takin an chu a, 1996 laia HPC Returnees hai Rehabilitation Case le Memorandum hai khawm a lo ziek pui hlaka, ama ngeiin hiengang thil hi thaw ta ngailo ding le Council Chairman an chuna hi tawpsan ta dinga an tiem hnung khawma ama intiemna ngei bawsiein hma a la lak zawm nawk pei leia Action hi lak a nih.

“Hi ka thilthaw suolna, kut ka tuorna a hin lungawinawna ka nei nawh, a tul chun hnam a khawm kan pek nuom, thawsuol ka neia ka hming an lang nawk a ni chun keiin mawphur ka tih.”  ti a suoi ama sie-le-tha hrietna le ama kut ngei a 22/3/2015 ni a suoi kei a nih.

Hi Action lak zana kut tuor mi 3 hai laia ama hi a tuor na naw tak lem a ni laia kut natak tuor anga khel let dera suklanga um hi thudiklo a nih. Hi pawl hmalakna kal zawnga che hlakhai chu tuelkhawm nisien Action an phu tawk pek ni pei an tih.

Ram le hnam tadinga in aihnaphapui;

(L.K. Hmar)

PRO, HPC-D

Gen. Hqrs., Sinlung