Jakuradawr, August 15, 2025, Virthli (ONP): Independence Day a vawi 79 na chu vawisun khan Jakuradawr ah phuisui taka inser le hmang a nih. Hi huna hin Barak Brothers' Union (BBU) in August 5, 2025 a'nthawka Independence Day le inzawma a huoihawt 'The 13th Barak Games' khârna hunser hmang a nih. Hi tournament a hin Football Team 26 (Hmar team 16 lê, Bengali team 10) an ṭhang a, football bâkah tug of war khawm nei a ni a, Ankhasuo HYA, CES B. Huonveng, Buṭhangkhal HYA, Henchungpunji HYA le Savawmphai HYA han Hmar Cultural Dance ah inruolsiekna an nei bawk.
Barak Games hi kum 2010 a'nthawk khan kum tin huoihawt a lo ni hlak a. Barak Valley (Hmarram) Tuiruong dunga dingin Sports tienga huopzâu tak niin Barak Games hin abîktaka a huom chu Pherzâwl district sûnga Tuiruong dung lê Jiribam district, Hmarram sûng niin, kum 2023-2024 tî lo chu, kum tin BBU hmalâknain Barak Games hi huoihawt hlak a nih. A thil tum tak chu Tuidung suka hnam chi hrang hranghai laia inpumkhatna siem hi a nih.
Independence Day vawi 79-na hmangna hi hun thuma ṭhe a ni a, National flag keipharna le National Anthem sakna nei a ni a, hun khatna hi dâr 9:30 AM a ṭan niin Pu Achab Uddin MLA, 40- Jiribam A/C chu Khuollien niin Pu Rothangkhum Sungte, Joint Secy., Hmar Inpui, Jiri-Vangai Region, Pu Shyamol Kumar Bose, Zilla Parishad, Boro-Bekra le, Tv. Vanlalhriet Hmar, President, Hmar Inpui, Jiribam Region hai chu khuolinzaum in an ṭhang a, Pu Gunadhor Das, Social Activist, Jakuradâwr chu Khuol Chawngpu in a ṭhang. Hi hunser a hin Barak Valley (Hmarram) sûnga Schools 9 hai a inthawk March Past inelna nei a ni a, Ankhasuo PMS School, Pherzâwl District in a pakhatna an lâk a nih. Bengali hnam lâm Bisnupriya lê Hmar hnam lâm in elna khawm buotsai a ni a, CES B.Huonveng in hnam lâm inruolsieknaah a pakhatna an lâk a, hmu nuom a umin mipui mit a tlei tawl hle!
Hun hnina ah Shri. Prashant Singh, Chundawat, Shaurya Chakra, Commandant, 38th Assam Rifles chu Khuollien niin Tug of War a hrâtna chang 20 Bn. CRPF hai lâwman inhlânna a nei a, kum tin a Barak Valley area sûnga chawimawi tlâk hai hi huna chawimawi hlak an nî angin Shri. Kabin Singha, Bisnupriya, Shaurya Chakra Awardee, East Goakhal lê Pu Ginzalal Duhlian, Honorary Captain Awardee, Dolakhal hai chu chawimawina thilpêk an hlân tawl.
Hun thumna ah Vishnu Gautam, DIG CRPF chu khuollien a ṭhangin Bengoli Group a tem hai: Dolakhal Muslim Youth Club lê Govindji Youth Club hain final an khêl a, Govindji Youth Club hai chun 1-0 in hrâtna an chang.
Hmar Group a'nthawk Ankhasuo FC (Pherzâwl district) le, Buṭhangkhâl (Jiribam district) haiin Final Match an inkhêl a, full time ah a hrât bîk um lovin penalty shoot-out nei a ni a, Ankhasuo FC chun penalty ah hratna changin 'The 13th Barak Games 2025 " Football Tournament ah Champion Nopui chu an lo dawm ta a nih.
Individual a lâwmman dawngtû hai: Besr player~ Samuel Hmar (Buṭhangkhal FC) player, Top Scorer~ Silvanus Hmar (8 Goals, Buṭhangkhal FC), Best Keeper ~ Joel Hmar (Ankhasuo FC). Khuollienin lâwmman hai inhlânna a nei zoin Pu D Lawmsâng, General Secretary, BBU in lawmthu hrilna a nei a, Independence Day le inzawma Football tournament chu a lo ṭum ṭiek ta a nih.
Input ~ Som Hranngul, Virthli Correspondent.
