Parbung, August 15, 2025, Virthli (ONP): Independence Day a vawi 79-na chu Thlazing 15, 2025 khan Tipaimukh Sub Divisional Heaquaters, Parbung, Pherzawl District ah ursûntakin Independence Day vawi 79-na hmang a nih. Hi huna hin Pu Zosanglur Joute, SDO Parbung chu Chief Guest in a ṭhang a, Pu Ramdinglien, President, Hmar Inpui, Hmarram Region chu Guest of Honour in a ṭhang.
Hun hmasa tieng Chief Guest in India Flag a kei phar zoin National Anthem sakna nei a ni a, Inchûklaihai han March Past hai neiin Khuollien a'nthawk Independence Day thucha ngai thlâk a nih.
Hi hunser a hin Jubilee Standard School Parbung, PMS school Parbung le, Parbung Govt. Higher Secondary school a inchûklaihaiin hnam lâm hmu nuom um tak tak inentirna an nei a, NSCBAV Parbung han special item an nei bâkah Sinlung Hills Mizoram a'nthawka hlasak thiem- Nk. Amanda Ngurte, Nk. Zaizaii Faiheng le, Lungthulien a'nthawka artiste- Nk. Ellie Buongpui han hun kâr lak ah hnam hla sakin mipui fê khâwm hai an in âwi.
Greetings le Keynote Address Pu James Pusing, President, Pherzawl District Football Association (PDFA) in a nei a, Khuollien le Khuol inzaum hai thilpêk inhlanna a nei zoin The 1st Pherzawl District Independence Day Trophy 2025 Final match inkhêl a ni a. Hun pâng ngâi ah Parbung Youth Club chun an khingpui Ralngam FC (Phulpui) chu 6-0 a hne in, Independence Day Trophy le, sumfai chêng Rs. 30,000/- chu an khuo zâwl a ngei an lo dawm phei ta a nih. 1st Runner- up latu Ralngam FC (Phulpui) hai khawma Trophy le sumfai chêng Rs. 20,000/- Vangai tlâng tieng an lo dawm tla ve ta a nih. Independence Day Trophy inchuna a hin Sinlung Hills Mizoram a'nthawkin team 4 an suok a, Pherzawl District a'nthawkin team 8 an ṭhang a nih.
Hun tâwp tieng March Past neina a lâwmman hai le, Tournament sûnga individual prize hai semna nei a nih.
