The 32nd Hmar Martyrs' Day Observance- Cum - The 17th State Level Hmar Martyrs' Trophy ursûn le ropuitaka inser le hmang

Saikot, May 17, 2022, Virthli (ONP): HMARTOB hmalakna hnuoiah May 16, 2022 khan Saikot Playground-ah The 32nd Hmar Martyrs' Day Observance-cum-The 17th State Level Hmar Martyrs' Tophy Closing Ceremony ursûn le ropuitaka inser le hmang a nih. Hun hmasa tieng " Aw nang kan lengna Hmar tlângpui" ti hla mipuiin an sak a, hawng ṭawngṭai Rev. Lalneikhum, PS, Saikawt Presbytery ICI in a nei a, Keynote Address Pu Lalvullien Hmar, Chairman, HMARTOB in a hril zoin Mr. Lallienkhum Traite, Secretary, HMARTOB in Chief Host le Khuollien hai Chawimawina thilpêk inhlânna hunser a hmang. Hi huna hin Chief Host in Pu Thanghlun Hmar, IRS (Retd), President Hmar Inpui GHQ a ṭhang a, Functional President in Pu Lalṭanpui Hmar, Social Worker a ṭhang. Chief Guest- Pu Paolienlal Haokip, Hon'ble MLA, Saikot A/C chu remchang nawna leiin ṭhang thei naw sien khawm, a aiawtu dinga a ruot- Pu Atong Haokip in a hun a hung hluo bit a, Guest of Honour in Pu Chinlunthang, Hon'ble MLA, Singhat A/C le Pi Kimneo Hangshing, Hon'ble MLA, Saikul A/C hai an ṭhang. Martyrs' Day huna hin hnam ta dinga martyr chang hai inzâna suklangnain hnam organisation hran hrana ṭhuoitu, khuollien le HMARTOB han salute pêkna le pâr inhlanna an nei a, toṭawka sûnna hunser hmang niin Rev. Dr. V. Lalnghakthang-in Intercessory prayer a nei. Hi hunser a hin Blessed Choir le hlasak thiem ha'n hla mawi tak tak el sakin mipui fekhawm hai an inawi a. Hmar Cultural Warrior ha'n hnam ta dinga martyr chang hai 'Gun Salute' pêkna an nei a, Tuiṭhaphai phairuoma khuo hran hrana HYA Branch ha'n a ruolin hnam lâm mawi tak el an pholang. Pu Lalhrietzing Famhoite, Vice-Chairman, HMARTOB in lawmthu hrilna a nei a, Rev. Salem L. Hmar, PS, Saikot Presbytery EFCI in hun khâr ṭawngṭai a nei zoin hun khatna suktâwp a nih. Session-II ah Football Final match hmu nuom um tak el inkhêl a ni a, inkhêl ṭan a ni hmain hnam ta dinga Martyr lo chang ta hai po po inzâna suklangnain toṭawka sûnna le salutation parade nei a nih. Final Match a hin Kangpokpi District a'nthawka team hung suok- KPA Saikul in Symropia FC 1-0 a hnein The 17th State Level Hmar Martyrs' Trophy Champion Nopui an lo dawm ta a nih. Champion KPA Saikul hai hi Trophy le sumfai chêng 100,000/- (One lakh) inhlan an ni a, a pahnina latu- Symropia FC hai chêng 70,000/- (Seventy thousands) The 17th State Level Hmar Martyrs' Trophy a Awards chi hran hran hai: Fair Play Award :The Shepherd's Football Academy. Top-Scorer : Paolenlal Khongsai (KPA Saikul) 10 goals. Best Goalkeeper : Kennedy of KPA Saikul. Most Promising Player : Lalhmingmawi (15) of Zodairun FC. First Hattrick : Paolenlal Khongsai (KPA Saikul). First Goal-Scorer: Minhao (29) of Northeast Youngsters Football School.