Haflong, February 10, 2022, Virthli(ONP): 23rd January, 2022 a Assam Chief Minister Dr. Himanta Biswas Sarma, chair-na hnuoia IPF Palaihai le inbiekna nei huna ISF le IWF haiin CM kuoma Tribal Medical College N.C Hills district a inthut dinga um chu IPF Demand area ngeia sie nisien tia an ngênna angin Assam Chief Ministerin Pu Parimal Suklabaidya chu a hmun hai enfel dinga a ti angin zani khan Retzawl le Lasang khuo hai sirin, a hmun ngeia kanna le enfelna a nei.
Pu Parimal Suklabaidya hi Silchar a’nthawka hungin Harangajao area a IPF a hnam tin hai chun Boro Muolkoiah ropuitakin an lo lawmlut. Chun, Retzawl mipui chun Minister chu lamlien a’nthawk Tribal Medical College propose site hmuna chen zawnna an nei, Retzawl le Doiheng le a sevel a’nthawk mipui fekhawm a, lawmlûtna thilpêk hnam thuomhnaw, hnam lâm le lo thlai hai an inhlân. HSA Assam Hills President Pu John Mark Pena le Tv. Lalzartluong haiin Propose site visual presentation an nei a, chun Tv. David Keivom, ISF President in Retzawl hai pawimaw em em Tourist Rest House le Bird watching Tower, Retzawl - Amranagar road hai chu siem vat ding le Borial wildlife Sanctuary chu IPF mipuiin an dit naw thu hrilin Memorandum a pek bawk a nih. Hi program a hin IPF,ISF, IWF thuoitu hai bâkah Hmar hnam sûnga organisation dang dang Hmar Inpui, HSA, HYA, HWA Etc. haiin an uop.
Pu Parimal Suklabaidya hin mipuiin ropuitaka an lo lawm dan haia a lawm hle thu a hril a, Tribal hai hi mi lungril tluong le mikhuol lawm thiem ei nizie hai hrilin, Medical College bawlna ding a țul zat zat ram Retzawl khuo in an pek nuom hi sawrkar aiin lawmthu hrilin Medical College hi a um ngei theina dingin report chu CM kuoma a pek ding thu a hril. Chun, Retzawl- Amranagar road thu chu CM khawma SOPD hnuoia, pek dinga a hril ta thu hai a hril. Tourist rest House le Bird watching tower chu ama Department hnuoi a thaw ding tak ani thu hrilin, a hung pek ngei ding thu a hril chu mipui a suk lawm hle. Hmar Inpui chun lawmthu hrilna a nei zoin Retzawl program zo a nih.
Lasang khuo lût hma hin Mahur a ISF Branch fethlengin Hnam tin a Student HSA,KSO le ZSU hai chun Minister pa hi ropuitakin lawmlutna an lo nei. Chun, hi zoa hin Lasang khuo tieng a kan nawka, zan ni ta sienkhawm Lasang khuo a chun Borial le a sevel a khuo mipui a sangtel in Minister hi an lo hmuok a nih. Retzawl a ang bawkin Minister pa chu hnam puon, lo thlai chi dang dang le Vawk mal lien tawk tak el an lo inhlân. Kuki le Rongmei haiin an hnam lam inentirna neiin KSO(A) haiin propose site chu visual presentation an nei bawk.
IPF hotu haiin Minister chu IPF demand a GoM member a nina angin chawimawina le Memorandum pêkna a nei a, chun Tv David Keivom, ISF President chun thuhrilna neiin Medical College chu IPF Demand area a um ngei dingin ngênna a siem nawn a, chun Borial wildlife Sanctuary chu an opposed tlat thu hai hrilna a nei nawk bawk. Chun, tulai a NC Hills district a Tourist ni tina a za telin an kan hlak Tumjang tlâng chu Minister in thei ang anga sukhmasawnna dingin ngênna a siem bawk. Chun Lasang road țhatnawzie a’nthawk hin IPF hnam hai kawng iengkima thlirbiek an ni zie thu a hril.
Minister chun a thuhrilna a chun “hieng lawm lawma mipui hlutsakna hi ka la tuok ngai naw a, ka lawm hle a nih, zan khawvar raka programme hmang khawm kan huom a nih, Mani ram țhatna po po, in Tuilo in nei sun sun hai a thlawna in zuk pek suok ngam el na hin nangni Tribal nu le pa haiin in nauhai ta dingin thiemna hi in ngaithupui hle a suklang a nih, chun in ram a hai hin Medical College hi ințhut tlak hrim a nih. Chun, Borial Wildlife Sanctuary chu mipuiin in nuom naw chun sawrkar chun in ram chu thawluina hmangin Wildlife Sanctuary a siema, hnawtdawk cheu chu a tum naw ding a nih. Lasang road țhatnaw zie chu CM kuoma hung intlun ngei kata, ISF haiin Retzawl le Tumjang a Tourist thil mipui tadinga an hni hai chu tuta Budget a lut theina dingin Guwahati tieng hung bawzui kata, chun IPF Demand khawm CM in thlahni sunga sukfel dinga GoM an din angin sukfel vat ani ta ding anih" ti hai a hril.
Programme hmang zo hin Lasang khuo in vawk pahni lai an lo that chu hlim takin ruoi kil thlang a nih.
