Pherzawl, January 28, 2022, Virthli (ONP): Vawisun January 28, 2022 zing dâr 11:00 a.m. khan Shiv Sena Party Pherzawl District chun flag keipharna hunser ropui takin an hmang.
Hi hunser a hin Chief Guest- Shri Dilip Panicker, Shiv Sena Party, Northeast Observer in flag a kei phar a. Mipui fê khawm hai hmaa vote hlut zie uor takin a hril a, selection nekin elected thlang lem a ṭhat zie uor takin a hril. Vote zawr chu a dem hle a, cheng 500 a vote zawr chu kum nga sunga hmasawnna ding cheng 500 a zawr ang tluk a ni zie a hril.
Hi huna Guest of Honour chu Shiv Sena Party, Manipur State Unit President, M. Tombi Singh a ni a. Ama hi Manipur Democratic Alliance, party 7 inzawmkhawm a Convenor a nih. Shiv Sena, AAP, BSP, MPP, PDA, MNDF, MPC le PDF hai hi ṭhangruol an ni a, party dang khawm hi inzawmkhawmna a hin an la lut belsa ring a um thu ei thu lâkna chun a hril.
Pu M. Tombi hin Pherzawl ram hlat zie chu motor ngeiin a zu sir thu le a ram hi development in a hlatsan zie uor takin a hril thu dawng a nih. Mi 500 chuong fê khawm hai lai hin Thanlon A/C a in candidate ding Tv. Lalhlunsang Sungte chun mipui hai kuomah thilthaw theina peka a um a ni chun, mipui hai thil thaw theina a pek ding thu a hril a. Ram hmasawnna ding tam tak thaw ding a la um zie a vel a velin a hril thu dawng a nih.
