Responsive Ad Slot

HPU Assam Region - Kumbul Rorel CUM Retzawl - Doiheng Village Interactive visit

Saturday, January 29, 2022

/ Published by VIRTHLI
Muolhoi, January 29, 2022, Virthli (ONP): Tarik 24/01/22 ni a HPU Assam Region Executive meeting in a lo rel ta angin, Arda khuo kumbul rorel chu nei dingin Tarik 28/1/22 (Zirtawpni) zing dar 11:00AM khan Arda khuo ah inhmu khawmna nei a nih.
Hun hmasataka Pu Malsawm Tuolor, President Hmar People Union, Assam Region in Thilthawhai 20:33-35 tiemna a nei zo in Pu Zuola in Pathien kuomah hun inhlanna ṭawngṭaina a nei zoin rorelna ṭan a nih.

 Chutaka fekhawmtuhai chu HPU Assam Region Office Bearers le Executive members hai bak ah, Pu Remsang Joute, General Secretary, HPC (D) Assam Region, Pu Sandam Songate, Commander HPC (D), Assam Region, VAWMPA MUKZADAR le Special invitee Muolhoi Vâl-Upa Pu Zuola hai in hi meeting hi an uopmawi ve a nih. 

Arda khuo hausa, a khâwnbâwl le khuosûng mi hai leh inbiekna fumfe tak le thatak nei ani a. Hi hun a hin, Doiheng le Arda khuo inkâr lampui chungthua ah, Arda khuo in Memorandum HPU AR kuomah pêklûtna an lo nei chu, HPC (D) AR, le HPU AR chun hung ngaituo mêk ani thu le thlakhat thlahni sûngin chanchin chiengkhuong a um thei beisei a um thu hril nghal ani bawk.
Arda khuo mipui hai fâk le dâwn zawngna kawngah, thu ngaituo tlâng ani a. Hi thu a hin, Ran vâi dan ding le thlâi le thei hieng mafû, sâpthei le a dang dang huon nghet a siem dân ding hai hriltlâng anih. 

Arda khuo rorelna hun a hin, Arda khuo hi hnam le hnam organisation popo in HPU AR enkawlna hnuoia sie ani thu hai le Arda khuo ah in tlawmte chau umna hmunah, Kohran pathum lai a hang um thu hai hriltlângna nei ani sa bawk. Hi thu a hin HPU AR chu mawphurna pêk ani in Arda khuo a Kohran pathum a hang um el hi, hnam hmakhuo ngaituo chun, hmatienga thil pawi le inthuruol nawna siem thei a hungni thei ding anih ti ngaituoin, HPU AR chun Arda khuo mipui hai chu Kohran pakhat a luongkhawm dingin thu rêlna le ngênna a hung siem nghal. Arda khuo mipui, Hausa le a khawnbâwl hai ngenna angin, thlakhat sûng inbiekna lo neia, lungruol taka ieng Kohran tak am zawm ding ti chu ngaituo tlang dingin thu incha le ngên anih.

 Hun tawptak ah, Pu Malsawm Tuolor, President HPU, AR in tawngtaina hun hmangin zantieng dar 4 in hun suktawp anih.


Retzawl Sekhnuoipha: L.P School 7pm.
Zân dar 7pm in Retzawl ah Doheng khuo le Retzawl khuo Hausa le a khâwnbâwl  hai leh inbiekna nei tan a nih.

Hun hmasatak ah, Pu Malsawm Tuolor, President HPU AR in hun hawngma neiin, meeting chu Pu Lallawmzuol, Vice President HPU AR chu chair la a meeting conduct dingin hun inhlânna a nei zoin meeting chu tan anih.
Hi meeting hi HPU AR chun hohlimna hun a hmang a nuom angin, agenda hranpa thlûrbîk um loin meeting chu nei anih.

Retzawl le Doiheng hai politics a an chanvo le ngirhmun hai hriltlângna nei anih. Hi huna hin, Assam rama ei hnam hmakhuo seitak ngaituona neiin, hung tlânkhâwm tu hai chun an ngaidân hai hrilna hun in meeting chu hmang anih.

Hi huna hin HMAR LE IPF – HMAR LE HPC(D) AR DEMAND chungthuah hnam mipui mimir le khuotlang thuoitu hai in an ngaidân hai le ei hamthatna ding lem ngaituo tlangna nei anih.
Mipui le thuoitu hung tlânkhâwmtu hai chun IPF thlazâr hnuoia ei hnam damna ding a vâng thu le HPC (D) AR fethlanga, hnamin Hmar chanpuol ding leiu lieu cho a i demand a hin lungruol tak le inthuruoltaka hma lâk nisien ti an nuomthu hai HPU AR kuomah inthlunna an nei. 
Fumfê tak le ngun taka houlim tlangna hun hmanga um chu thlâkhla tak le tawngkhawp lo takin zan dar 11 in inhmu nâwk dingin hun khârna tawngtaina Retzawl khuo thuoitu ha’n an nei zoin tînna hun siem ani nghal.

Report petu: Pu Silvias L Khawzawl
Asst. Secretary
Hmar People’s Union Assam Region.
Don't Miss
© all rights reserved
made with by Simon L Infimate