Responsive Ad Slot

Dr. Chaltonlien Amo in Tipaimukh biel a hmang ding Ambulance thar hlawk pahni (2) a lo inchawk fel tah

Thursday, June 17, 2021

/ Published by VIRTHLI
Imphal, June 17, 2021, Virthli (ONP): Tipaimukh MLA  Dr. Chaltonlien Amo chun a biel mipuihai hmang ding Ambulance thar pahni ( 2 ) a lo inchâwk fel der tah. Ambulance baka hin bieltu MLA - Dr. Chaltonlien Amo chun a biel sûnga hmang ding Oxygen Concentrator -11, Pulse Oxycilator- 20, PPE Kits- 150, Thermomemter- 2 , Sodium Hypochlorite bur lien- 5, Hand Sanitizer- 2140 , Face mask- 1,2500, Hand gloves- 200 lê dawmdawi chi hran hran a biel sunga hmang ding iengkim sukfel vawng a ni tah . Hi chauh hi la dittawk lovin hmun danga mi khawm incha mek ani thu, a tlung mek tah le la tlung ding mek khawm tamtak a la um thu dawng a nih.

Ambulance thar hai hi vawisun khan Dr. Chaltonlien Amo a chengna Quarter, Imphal hmunah Tipaimukh biel mipuihaiin tangkai taka an hmang ngei theina din Rev. H. Chungthang Thiek in Pathien kuomah inhlanna a nei.


Hi huna Dr. Chaltonlien Amo in thu a hrilna a chun hripui inleng le inzawma tulaia a biel mipuihai hai mamaw le tul em em el Ambulance thar (2) inchawk theia a um hi lawmum a ti thu a hril a, Pathien le mipui hai zar lieu lieu anih ti ei hriet tlat nuom a um tiin a hril , a hril peina a chun Tipaimukh biel mipuiin an tul le an harsat huna hmang dinga sawrkar ta thang lova ama kutsuok ngeia ambulance hi an chawk ani thu a hril. A hril nawk peina a chun MLA fund hai hi a tulna na ah hmang a ni thu a hril a, a tul leh a biel mipuihai hmang ding motor inchawkna'n a hmang el thu a hril a, a biel mi CCpur le Imphal phairuoma thina tuok tamtak el hi an ruong phursukna dinga ama sum senga motor tamtak el a lo tuokpek hlak thu hai a hril a, chu hai harsatna hrein ambulance hi  inchawk ani thu a hril.

Dr. Amo chun Ambulance hmang dan ding chungchangah dan le dun tha taka siem ani ding thu a hril a, ambulance hai hi mithi ruong phurna ding chaua hmang ding an naw zie hrilin, a biel sunga Covid leia damnaw inrik, Oxygen tlasam leia inrik bik deu, Natna dang dang leia damnaw, Accident tuok leia emergency a doctor panpui tul an um huna ding le, damnaw thak lawn tul le phur lawn tul ha'n Ambulance hai hi an hmang tangkai ngei a beisei thu a hril.
Don't Miss
© all rights reserved
made with by Simon L Infimate