Nu-in Khawvel a Siem

Nûhai po po Nûhai Nî (Mother's day) chibai ka bûk seng chêu!

~Isaac Hmar

(Heb. 11: 23-24)

Mosie chanchina inthawk hin chiengtakin hmu lê hriet theiin a um. Mosie farnu kuoma pharo nâunu'n a enkawltu ding zawngpêk dingin lê a hlâw âwmtawk khawm siempêk hiel dingin pharo nâunu chun Meriemi chu thu a pêka. Chuong angtak chun Miriemi chun, Mosie Nû ngêi chu zawngpekin. A nu hin kumthum sung chu Mosie hi a enkawl a nih tî hi Exodus-ah chieng takin ei hmu a nih.

Khawvêla hin mi ropui Mihâusa tawntaw Mirâl hrât thuhril hmingthang tamtak an chanchin hril zata inhmai ruol lo hrilsâ ngêi ngêi hlak an um a. Chuonghai chu an Nuhai zâr ani tei hlak. Mawphurna chi tum tum sûngkuo hin ei nei a. Pâ chun, insûnga hmangding sum le pâi a ngâituo hlak a. Nû ruok chun, Pâin a ngâituo sum le pâihai hmangna kawnga dâm, Sil le bil, fâk le dawn kawnga dâm, mawphurna insângtak a nei a nih. Sûnglekuo laka dâm, ina lenglûthai hrim hrim sawngbawlna kawnga dâm, insûng boruok inhawi lê inhawinaw chenin Nûah a'n ngat a nih.

Hieng po po hai nêka pawimâw chu Nâu enkawlna kawnga Nû mawphurna hi a nih. zinga ei insung ei kohran khawtlâng ei ram le ei hnam chu Nua innghat a nih.

Madhya Pradesh-a kan um lâia thil theinghil thei lo lungriltaka la châmzing el ka nei chu. Unâu Nepali nûpui (Ama nû hi kristien a nih) pakhat hin nâu pasal ditumtak el hi Pathienin a pêka. Ama (nâutê) chu thla thum mî a nih. Ain ṭhang khan, adangchârin a ṭapa; anû chun "bawi la to rawh" a t'a. A ṭawngṭâipêka a nâutê khawm chu ṭap bangin chieng êm êm hin a Nû hmai a enzinga, a ṭawngṭâi zo chun, a nene chu a hei pêka hmêl hlim sarin anin en vê vê a. Kha kha thu kha a ropui ka ti tâwp thei nawh.

Aw, khawvêl siemtu Nûhai hi in lo va hluin in lo va hei ropui veng veng de âw!

Nûhai hin an sul sûngah thlakuo sûng zet el chu an mi pâi a;  Bâu inhniknaw dâmin vitamin chi hran hran thlasam leiin châu ngâwi ngâwi damin an um a, bu du lovin umhai sienkhawm an sul sûnga um an mi ngâituo luot leiin luoksuok pawt damin an fak ṭâwk ṭâwk a.

Ei hung pienga ei dangchâr ding inlâuin theitâwk takmeu suoin an mi enkawl a, ei dei tuor nêkin an nî'n dei tuorhai sien khawm an pawi ti nawh. Khuo ei hriet hma khawmin ei ta ding hin rinum hril sêng lo tuorin a'n mi lo enkawl chu a lo nih.

Chuleiin, Nûhai châwimâwi hi nâuhai tading chun, an phu hlie hlie a nih tîhi innghil hlau rawi ei ti khai

Vawisûn hi Nûhai nî, ni famkim, Nûhai kuomah nâuhaiin an hmangaizie an suklangna hun țha chu. I ta dinga a hlutzie lê i khawvêl sukmâwitu a nizie ei inhriettir a pawimaw. Châwimâwina po po, inzâna po po lê ditsakna po po hi nî bêk hin Nû'n a dawng ding a nih.

Hrezing ei tîu, Nû chun nâu ta dinga a tuorna lê a'n rimna hi a'n zawtsuok ngâi nawh a, harsain ringum hle sienkhawm to tawkin a tuormuolsuo el hlak. A'n harsat tuor lê a'n rinum tuor suksâtu ni loa a sâwk zângkhaitu ei ni hi nuom a um hle.

Hnuoi vântirko Nû, Pathienin a mipêk hin châwimâwi a phu hrim annâwm! Zingkâr dei lâi khawma insunga tho inhmatak, zân a midang po zâl hnunga zâl chau hlak. A țûl lê pawimaw po po thâwtu Nû a nih. Pakhat chau nisienkhawm insûng a hluo bit hnea, a um nâwna hmun chu a ruok hle hlak. Nû hlutzie lê pawimaw zie hi innghil thei ani nawh.

Nû hmangaina iengtin am ei lo sanglet hlak a? Inruiin, a thu zawm lovin, ei dit dân ang chauva hun hmanga Nû thu ngai lovin Nû hmangaina hlutak el hi ei lo sanglet hlak am? Ei suol lê ei that naw lâi tak khawma Nû hmangaina chu a kiem ngâi naw a, hmangaina tawp lo, a thei bâk lê a tlin bâkin nâu a lo enkawl hlak a nih.

Nû hmangaina hi engtin am vawisûn hin sanglet ei tia? Nû tia ei kova an la'n hâwi thei lâi lê ei râwl rî hre theia an um lâi hin ei hmangai zie suklang ei tîu.

Aw le, Pathien thû ei tiemta khan Mosie chanchin ei tiem tah a. Kha khan ie'm a mi'n chuktir ei ti chun; A Nû khan kum thum sûng char enkawl sienkhawm Lalpa dit dân angtakin a en kawl leiin, Aigupta hâusakna nêkin Krista a'n hmusitna chu sum ropui lema a ruot ta lem a nih.

Nû ditumtakhai, Pathien dit dân angtakin nâu hi hei enkawl zet raw leh! Insir ngâinaw ti nih. I thiemin i varnaw thei, i hmêl a siein a ṭha nâw thei, Mîhaiin mâwl lê var khawm an ti thei che, Nâu leiin rinumna hrilsietna beidawngna lê hmingsietna chen khawm i tuor ta thei, sienkhawm i nîna insângzie in hre la Iengkima Pathien râwnin a thu zawm raw leh, Pathienin khawvêl siemtû dingin a lo buotsei che a lo ni zing a nih tîhi hre raw khai.

Vawisûn Nûhai nî hmangtu ding po po Nûhai kuomah ditsakna chibai lungriltakin ka bûk chêu a, mitin chunga roreltu Pathienin malsawmna'n vur sien la chêu, sâwt tak dam dingin ka ditsak seng chêu

Nûhai nî Chibai.