~ V.K.Pangamte
Hlim zai a vâwr a,
Nau anga innuiin;
Vawi khat bêk hmu tum a,
Hringmi dâna biethu hril;
Mi dâwn vê’ng a tî’m?
Thu Hmasa: ‘Aw Sangi, hringnun damin hmang la, hmangaina chanchin ka hril chângin i sakhming hril inri hi ma ngai naw’ng ka t’a; a tharin zuol deu deu lem a tih. Ei inkâra dotu an hung inlang a, nang le keiin ei hne thei; det takin chel tlat ei ti aw. Hringnun hi nun a tling tak tak ding a ni chun, duot taka i hmangaina pawm hi ni mawl a tih’ tiin hmangaina chabi ka lâk a. Ka pen hmûr chu iemani chen a châwl a. Lungril rila Sangi le inzawma thu ziek zawm dingin inthlahrungna lien tak ka nei ta bawk a, amiruokchu, boruoka inzâm hmang el ding chun pâmhmâi ka sak a; a tharin a hung suok nâwk hlawl a nih. Hmangaina zungin a man det leia intâl intâl ha’n hi thusep hi tiem a, hring le dama la umhai lai hin, thil po po nêka hlu le ropui lem chu, hmangaina hruia inzem mawl hi, ti lo inri thar raw se. Lemderna hmangruo haw lova, dam sûng intiemna rûn-a inlâwipui dinga ka ngaituona inpui lo hluotu, Sangi hminga thu inzâwt hi, hei tiem ṭan nâwk phawt la, a umzie damte’n hung inlang fie el a tih.
Dotu Hnâwl Ngam: Hmangaina thlumzie intem ding le hmu suok ding chun suk le tung, sik le sa, ṭênbaram le lam rinum hraw ngam a lo ngai a. Harsatna khawm thuo khat chau ni lovin, a thuo inthuoa mi deltu a um hnung a, mi dang nei dinga phal thei lo hiel khawpa man chieng hmangaina chu a tlo a, inzâ a um bawk. Hieng anga sukfietu thlarauvin a mi man lei a, Sangi ngaina thu hi ziek ngam chau ka ni a; mi dâwizep ruok chu ni si lovin. Mi ṭhenkhatin, tlangvâl lai taka hieng anga vântlâng hmu le hriet dinga Sangi’n hmun a hluo thu suklang hi a fûk chie naw thei ti thu an mi hril a. Kei ruok chun a um ang anga ziek lang ka nuom pei a, insuklâr tumna lungril chu sîra hnâwl daiin. Chuleiin, thu lâwmum le ngainuomum tieng chau ziek tum lovin, ip sawng thei naw khawpa mi mawrtu chanchin hi a la hring zing a nih.
Zingkâr inhma taka thova, lampui sîra thing hna chi dang dang ha’n sêlna thu hrim hrim dawng lovin, Siemtu indin anga lungâwi taka inhnîng sieu sieu hai chun ka sîngmit an sukhadam hle a. Anni anga hlim ve chu ka nuom a, ka’n hnar hiel hlak. Ṭawng theiin ṭawng thei lo a zuk inhnar el chu thil pângngâi naw tieng deu chu a hawi a, anih, Sangi mi hîp leia hmangaina kawlbun-a intâng chu ka ni takzet ie. Nî danga ruolṭha tia ka lo inhmêlhrietpuihai khan ngaidân an pêl a, hrietpuitu dinga ka thlangha’n ring naw tieng takin hmangaina chi ṭha lo an the ṭan a, Sangi le kan kâr thu inrem thei lo ding khawpin thu an phierruk bawk a; hnena dâr vawin lâwmna ruoi ruok chu an ṭhe chuong nawh. Hmangai le hmangai kâra thu ṭha lo rawltu an hung pung pei a, ring nêkin buoipui a tûl nasa a; nisienlakhawm, ka sûngril rila hmangaina indik hum chu ka la’n zuom zing a. Sangi dawnna ruok chu chîng takin ka la hriet naw a, nghâkhla takin ka la nghâk zing a nih. A harsa ie!
Hun A La Bâk: Bâksamna khawvêla hin ieng anga hun hmang pei ding amani aw tiin suongtuona chu a’n vâk vêl a. Hnawt lo ding thil hnawt a, beiseina hruia innghat zing chu hlimna a tling zo naw ding a chieng a. Amiruokchu, inthla phal si lovin ka la’n ban fan fan a nih. Indawnna tam tak ka siem ta a, dawnna tam lem chu a la hung tlung naw a; hlawsam dinga nghâktu nina ruok chu ka la’n pêk phal lul naw a nih. Sangi sûng le kuo hai ngaidân indawn lova, ka ngaidân ka hril tlang el kha dangtu a ni pal hiel ka sâwn a, anachu, hi khawm hi thil inlang fie lo a la ni ta pei a. Rem le rem lo hriet chieng naw leia man tum ṭâl ṭâl ka ni naw a, ka hriet chieng luot leia hi chen hi ka la um niin ka’n hriet ve tlat a. Thawnthu le mang rama inzin kuol inzin kuol khawm ka hawi a, a um lo zawng ruok chu ka ni si nawh. Hmangaina inchin rem tum a, in bâwltu ruoi hlak mizie chu dit a um naw a; Sangi sûngril ril hne tuma hmangaina tak châwia hun hmang ka ni lem. Duthusâm hril ringawta hun hmang dingin hringnun hi a hlu a, mâni chaua hmangaina lipui inhlieu hlak chu kim thei bawk lo ding a ni a; cheltu um lova hringnun chu a khingbâi tlat ding a ni si a. Sangi bawkin hmun a chang ie!
Hieng el ding hi a lo ni maw! Hril thei ang ang chu ka hril ta a, a nêka ṭha lem le hlu lem inhlân ding ka nei ta nawh. Ka neisun hmangaina ti hi a la tlâwm rawp a ni si chun, Sangi hin mi belsa sien la lâwm kim ngêi a tih. Inchûkna lampui kan hraw ve ve a, ngaidân khawm ni dang nêkin a hung puitling deu deu niin a’n lang bawk. Amiruokchu, thil fie lo a la um tlat hi a chenve lampui hraw chu a ni takzet a, sin ṭan sia a chenvea tâwp chu depde nun a ni a; chîng lo chi a nih. Hmangaina hi thing kûng anga enkawl thei nisien chu, tui petu ding chen ruoi ka’n huom a; nisienlakhawm, hieng anga inbuotsai chu a bul um naw ang hlawla thil thei lo a ni si a. Hnam le khawtlâng thila ṭangkâi taka inhmang, kohran le insûng sina a kûl-a-tâia hmalatu, hmangaina thu hril chânga a chawngpu tlin hlie hlie, nunnêmna thuoma inbel, Sangi a mâwi chuong ngêi ie! Hun a la bâk leiin a la’n tuok naw ni dingin ka ring. Intuok dinga hun hung tlung ding chu iengtik am nîng a t’a? Aw Sangi, ka dem phal lul naw che. Hunin a mi tiem dingin sawrkâr le khawtlâng ruoi a ṭûl âwm naw a, intiem rem thei a ni si a.
Sangi Hmu Tumin: Ni khat chu ka ruolpa L.San leh khuol inzin dingin rem kan ruot a. Phûr takin duthu kan sâm vêl a, inhawi kan ti hle. Ziekpu R.L.Stevension-in, ‘A hun tlung hmaa beisei taka inbuotsai hun lai hi a taka tlung nêkin a’n hawi lem’ tia a lo inzâwt thu dâm kan hril a. Kei ruok chun, Sangi hmangaina le ka hmangaina intuok dinga ka’n buotsai lai hi inhawi ka ti hle a, ama leh intuok ngat inlang chu hi nêkin a let tam takin hlimna pâr indik chu lâwm ngêi dingin ka’n ring. Hun sâwt taka ka lungril ril hîptu umna tlâng sir ngêi chu kan tum a, chuleiin, hmabâk la um neu neu hai chu râla inthawkin kan hei sui chieng a. Sangi ruolṭha pakhat, Puii-a inthawkin chanchin kim lem kan indawn a; ama chun fel takin a hung hril a, kan lâwm hle. Hmangaina hi a tak le a lem a um ti chu mi tin hriet ni ngêi a t’a, a naw tienga inâwk ta laklaw ta ding chun thina tûr khawm a ni thei bawk. Mihriemin hmangaina chu dampui dingin ei beisei hlak a, thil intem laia chu hmangaitu hmangaina intem hi a hlu âwm ie! Chu nêk hmanin, neitu chan changa hmangai le hmangai intuok mawl chu hlimna danglam nîng a tih. Hieng anga lung inrempui ding hi annâwm, nghawk lova ka lo thlîr zing hlak.
Naupang inhnel ang mei meia hmangaina inhnelpui chu Sangi khawmin a nuom naw a; hi hi kan lungril inangna ni ngêi a tih. Hringnun sietpui khawpa intiem kan tum naw a, a taka inlâwm mawl mawl ruok chu kan thlâkhla ve ve niin a’n lang. Thu khir tak tak anga inlang hlak, rem thei naw ang hiela hril hnuol umna kâra lêngin, thu tiem det tak kan nei tlat a. Mi ṭhenkhatin dang tum ṭâl ṭâl hlak hai sienkhawm, hmangaitu umna pana patling inthawk suok meu chu an dang zo ngai nawh. Khawvêla hin thil hlu le hmun inhawi hril inthang tam tak a um a, chuong po po nêkin Sangi hmu chu ka thlang lem a; chuleiin, hnung tieng kîr rêl lovin, hma tieng ka pan ṭâwk ṭâwk lem a nih. A bula thu insam ennawn chun a tâwp dai ring a um ta a. Nisienlakhawm, châwl el lovin hmangaina thusam chu a la fe pei a, ieng hun taka tâwp ding amani ti khawm ka hril thei ta naw ie! Sangi hin chu a mi lo man det thlâwt a nih. A lampui a um a, khârin a la um nawh ti ka hriet a, ka la châwl thei naw a nih. Sangi hmu tuma inbuotsaina hi a la ṭha tâwk naw ni lovin, a lampui hi a’n kuol deu leiin a teirei pei a ngai a, mi danga innghat khawm a rem nawh. Hmangaina mit keu hun ding mawl chu ka lungril ril hluotu a la ni zing. Hi chena hin Sangi hmu tuma lungril ril insiemna chu ka la châwl hri phawt a, ka ruolṭha, L.San khawmin a mi hrietthiem êm êm a.
Bethel, Tuiṭhaphai
Thlazîng 3, 2020
