Parbung, August 16, 2020, Virthli(ONP): Indian Youth Congress, Parbung Unit chun bieltu MLA Pu Dr. Chaltonlien Amo in Covid-19 le inzawma a hmalakna hai le Parbung khawtlang tui harsatna sawk zangkhaina dinga khawtlang tui siekhawlna (public water tank) ding a bawl pekna thua a hnuoia ang hin lawmthu an hril.
--------------------------------
OFFICE OF THE INDIAN YOUTH CONGRESS
Parbung, Pherzawl District, Manipur - 795143
Phone – 7628962830/ 8413028499
Ref No. - Date - 16-August-2020
LAWMTHU HRILNA
Pu Dr. Chaltonlien Amo in July thla a Hmarbiel Quarantine Centre hai kanna hung nei trum a, QC a um hai inpawlpuina le thurawn thratak tak hai pe a, ruoi hai a hung thre pui el dit tawk lo a QC a’n thawka lo suok ta hai khawm an khuo a hai fe in tlaitleng a la va buotsai pek nawk peina le khuotin fanga a biel mipui hai inpawlpui in hun a hung hmangpui na hai hih, a biel mipui hai tading chun tlamuong a um in, an tading in` Pa’ atling takzet a. Hieng anga mipui hmangaina nei, thruoitu thra Hmar hnam hmangaitu ei nei hih Youth Congress chun an pak in a suong takzet.
Pu Dr. Amo in Hmarbiel a hung fang lai hin, Indian Youth Congress, Parbung Unit chun inhmupuina nei in, Parbung khawtlang tui harsatna hai a kuomah alo intlun a. Ngaituo ding le buoipui ding tamtak nei sienkhawm, Dr. Amo chun Parbung khawtlang tui harsatna hi ngaipawimaw in, Youth Congress beiseina khel tieng ah, ama Pu Dr. Amo in meeting la hung nei pui in, Youth Congress thil ngen chu ngun taka ami la hung ngaituo pui hih, Khawtlang hmasawnna ding a ngaipawimaw zie a suklang cheing hle a. Chu khelah Youth Congress, Parbung Unit chu khawtlang tui harsatna sawk zangkhaina dingin, a bul tranna dingin khawtlang tui siekhawlna (public water tank) pakhat bawlna sin lo tran nghal dinga a hung inhriettir hih Youth Congress tha a suk fan in a suk phur hle. Public water tank bawlna dinga a trul le mamaw hai po po ama Pu Dr. Amo in phaltaka hung tum vawng in, thratak a bawl zo a ni theina dinga iengkima hma a hung lak na zarin mipui hmangthei dinga bawlzoa a hei um tah hih, Youth Congress chun Pu Dr. Amo chungah lawmthu a hril takzet.
Hmarbiel mipui in hieng ang a khawtlang le mipui rawng bawl inhawk le nuom zing thruoitu Dr. Amo ei nei hih, Youth Congress chu vangnei an ti hle. Hmatieng peiah khawm mipui le khawtlang rawng la bawl tlang nawk pei dingin Youth Congress chu anuom takzet. Hmar mipui tadinga malsawmna intluntu hmangruo ah Pathienin hmang sunzawm pei sienla, a hmatieng peiah Ram le Hnam rawng anek a nasalem a bawl sunzawm pei thei dingin Pathienin hriselna thra a inthuomin, a hma thruoi-in umpui zing raw seh, ti chu Youth Congress trawngtraina ni zing a tih.
Hrilhmingthang
(Secretary)
Lalremruot
(President)
