Responsive Ad Slot

Tipaimukh MLA in Quarantine Centre a kan, a um hai Positive an la um nawh

Wednesday, May 20, 2020

/ Posted by Simon L Infimate
Tuithaphai, May 20, 2020, Virthli (ONP): Dr. Chaltonlien Amo, Tipaimukh MLA & Chairman, PAC chun vawisun khan Manipur State puotienga inthawka hung, Pherzawl District a Tipaimukh Constituency le Thanlon Constituency mihai ta dinga Quarantine Centre a an hmang mek, En-Gedi Camp & Retreat Centre, Gelzang a mi chu hang kanin thangpuina sumfai Cheng Rs.10,000/- a pek a, medical staff hai hmang ding gloves, mask, sanitizer le thil pawimaw chi tum tum inhlanna a nei. Hi huna hin Dr. Amo chun Covid19 le inzawma kawng iengkima thei tawp suoa hma latu le a hmatawng a thang - Para Medical le Security Force hai chungah lawmthu a hril a, a biel sunga a thlawna sem ding bufai cheng Nuoi ruk man chuong a deposit thu hrilin an hma tieng bufai hi sem nawk vat ani ding thu a hril.



Dr. Chaltonlien Amo chun Quarantine a um mi 29 hai hi a thei ang anga a thanpui pei ding thu a hril a. Pherzawl District mihai ta dinga Churachandpur-a Quarantine Centre siema a um nasan a hrilna a chun suspected case le positive an lo um pal chun  enkawlna kawngah awlsam tak le inrangtaka hma lak vat ani theina ding beisei lei le a hmunpuiah medical facilities tha lem a hai enkawl vat an ni theina dinga Quarantine Centre hi CCpura ah buotsai lem ani thu a hril.

Hi Quarantine Centre a hin tuhin mi 29 an um mek a, Medical Test hai thaw vawng an ni tah a, Medical Test dungzuiin  an rengin an la Negative vawng a nih.


Quarantine a um mek mi 29 hai hi Doctor le Staff Nurse han an enkai mek a, Dr. Chaltonlien Amo in Quarantine Centre a kan huna thangpuina thilpek le hmatieng peia thangpui dinga an tiemna chungthuah Medical staff le Quarantine a um ha'n an lawmthu an lo hril. Dr. Amo in Quarantine Centre a hang kan hun a hin Pi Manmuanching, Pherzawl DC, Dr. Phirthanglien Buhril, Pherzawl CMO, Pu Derick L. Khawbung, Vangai SDO hai khawma an uop ve.










Don't Miss
© all rights reserved
made with by Simon L Infimate