Responsive Ad Slot

HPC (D) Manipur Region in Press Conference koin Hrilfiena an siem

Thursday, April 30, 2020

/ Published by Simon L Infimate
CCPur, April 30, 2020, Virthli (ONP): Tulaia HPC (D) Manipur Region le Pu Vungzagin Valte, MLA Thanlon A/C, Chairman, MTDC hai inkara bufai thua buoina le inzawmin vawisun khan Rengkai ah Press Conference koin chanchinbumihai hmaa hrilfiena an siem baka a hnuoia ang hin mipui hriet dingin hrilfiena an insuo.



PRESS RELEASE

April 25 le 26, 2020 nia Thanlon Constituency MLA Pu Vungzagin Valte le HPC (D) palai hai inhmuna le inzawmin mipui hriet dingin hrilfiena kan hung siem nawk.

April 25, chawhnung tieng chun tulai hrileng Covid-19 le inzawma mipuiin harsatna namenlo ei tuok le inzawmin Thanlon Constituency a Hmar khuo Paruk ( Pherzawl, Tinsuong, Damdiei, Talan, Serhmun le Leisen) hai chanvo ding ang an dawng naw leiin Thanlon MLA Pu Vungzagin kuoma thu intlun dingin HPC(D) palai chu an fea. A tir chun thu umdan hrilpui thei lo khawpin a uma, chier inhruoin ami lo hmuoka. Keini chun HPC (D) bufai le sum chungchang hril dinga hung kan ni naw zie le mipul palai a nina anga mipui narsatna intlun dinga hung kan ni lem thu kan hrila. Thupui hrilpui thei ani tak naw leiin kan fesan ta hrima.

Chulaizing chun Ama Pu Vungzagin chun "Extortion le Demand" thaw anga min tum letlingin Police le Assam Rifles hai kuomah ami lo report a, min mantir ding chenin thu a lo phiera. Chuhnungah ngaidam hung inhni dingin ami phuta. "Ngaidam in inhni naw chun HPC (D) le Thanlon biela Hmar hai indu hmu naw ti niu ti chen tawngbau a saksuoka. keini HPC (D) chu ram le hnam hmakhuo ngaia suokdawk kan ni ang hrimin, a tu tul khawm kan rin nawa kan hringna chen khawm inhlan kan inhuom vawnga, chu chau naw khawm, Ram le hnam damna ding ani phawt chun mi ke chela ngaidam inhni chen khawm kan inhuom thu khawm kan hril sa bawk.

Hieng anga thu a um tak le inzawmin patling takin kan thawsuol a um pal chun tiin a hrietthiemnawna hrilfie pui ding le mipui hai ngirhmun hril ding beiseiin April 26 ni chun kan fe nawka. Chu tuk chun Chanchinbumi hai el baka mi dang dang a lo inpuna, hienghai lai khawm hin chengrang chawia inbunranga thuneitu tak ni awmtaka inlang khawm an um teu bawk a nih. Iengangtakinam ngaidam chu inhni inlang i tia ti chenin kan indawna. Thanlon MLA Pu Vungzagin in a lo ruotlawk ang hrim le a ditdan ang chara a lo riruong lawk angin, ram le hnam damna ding ani phawt chun tiin, ngaidam chu kan inhni lem ta a nih.

Amiruokchu, ngaidam kan inhni leiin kan ngaimawtak mipui ta ding bufai chungchang thu chu a siemthain a sukdik phak chuong nawh. Tulai harsatna leia bufai sem hi vawihni ani tah. A vawikhatnaa an sem áš­um khan ama ngeiin flag off program neiin, a bufai peksuok zat khawm ama ngein WhatsApp group a hai feltaka hmu thei in a tarlang. Hmar khuo paruk a bufai ding chu truck pahnia tawlin, chu chu hieng ang hin a nih: Bufai bag chu a rengin 351 bags ani a, Truck MNO28-2826 in bag- 192 le AR 12-3043 in bags 158 a phur a, a Total chu 350 bags niin 1 bag chu an hmang nghal phawt a nih. Chun Hmar khuo haiin total in Bags 279 an dawnga (received). Chu taka inthawk deduction ei thaw chun 71 bags alan hmang rawp a nih. Chu umzie chu Thanlon bielah Hmar khuo paruk haiin bufai bag 72 an dawng ding an dawng nawh ti na a nih (Fact chu filed anih). Chun, hienga HPC(D) in thusuok siema hma a lak hnungah Vilage Authority thenkhatin lawmthu hrilna hi a vel hninaa mi an dawng thu ani lem. A vel hninaa mipuiin an chanvo ding awm hrim an dawng le an dawng naw khawm, HPC(D) chun bawzui pei kan tih. A vel khatnaa bufai bag 72 bo ta hi iengtinam a bo theia ti hi ngaituo tham a nih, ama Pu Vungzagin Valte chau hi a hrilfie theitu ani?. Hi lei hin a ngaituo pawl le a sukdik thei ding haiin bufai chingpena um hi, mipui chanvo ani ang hrimin mipui kutah pek ni ngei raw se. Hi hi HPC(D) dit dan a nih.

Chun HPC(D) in thusuok a siem zo hnung Tarik 29-4-2020 khan Churachandpur lai bufai Kg 5 in a sem tan ti thu khawm hriet nawk ani bawk. Biel danga mipui hai khawp le tlei taka a sie zing lain Pu Vungzagin hin Hmar hai ami enhran le ami sukfahra ding an nawh. Pu Vungzagin hin Hmar hai a hmusit el chau niloin, ami suk diriem tum nasa hi HPC(D) chun a ngaipaimaw zing.

HPC(D) chun khawvelin harsat hun khirtak ei tawng karah ei ram kilkhawrah mi harsa lem hai ngirhmun chu dawmin humhal zing a ta, Hmar hnam le Hmar ram hmusittu chu theinghil loin, a enthlak zing a nih.

JOHN L HMAR
Secretary
Information & Publicity
Don't Miss
© all rights reserved
made with by Simon L Infimate