Responsive Ad Slot

Tipaimukh MLA in Hmarbiel a sem ding Bufai phur Truck hai a vailiem

Monday, March 30, 2020

/ Posted by Simon L Infimate
Tuithaphai, March 30, 2020, Virthli (ONP): Tipaimukh MLA le PAC Chairman ni lai mek Dr. Chaltonlien Amo chun vawisun dar 10:30 AM khan tulai natna hri inleng leia fak-le-dawn kawnga harsatna tuok mek- Tipaimukh Constituency a Hmarbiel mipui hai ta dinga a tlawna sem ding, bufai bag 920 phurtu Truck palihai vailiemna hunser a nei. Hi hunser hi Pi Mannuamching, Pherzawl DC, Mohemed Jackiruddin, Pherzawl SP ,Thianlaljoy Gangte, Pherzawl ADC le SDO/BDO staff hai khawma an uop ve.

Hi huna hin Dr. Amo chun a biel mipuihai ta dinga bufai bag phura um mek hi ration card nei hai po ta dingin sawrkarin dan siem sien khawm, chuong ang chu niloin ration card nei le neinaw han inruoltaka an chang seng theina dingin per head hisap a sem ani ding thu a hril a, a tlungna ding hmun hai tluong taka a tlung theina ding le mipuiin an chanvo hai indiktaka an chang seng theina ding le a chavai um lo dinga felfai taka sem ani theina dingin security venghimna khautak hnuoia fepui ani ding thu a hril.

Dr. Amo chun Vangai Biel mipui hai ta dingin zani le zani hmasak khan bufai hi sem ani ta thu a hril a, hmatieng peia a biel mipuiin harsatna an tuok huna hai sawrkar ah intlunin a thei ang anga hma lak pei a tum thu a hril. Tipaimukh Hmarbiel mipui hai ta ding bufai phurtu Truck hai hi Pherzawl Police han venghimna sin an thaw ding thu , khuotinah indiktaka sem pei ning ani ding thu Virthli Palai a hril.








Don't Miss
© all rights reserved
made with by Simon L Infimate