Responsive Ad Slot

Parbung Helicopter Service hawngna nei, chuong man Rs. 1500/- ding

Saturday, February 22, 2020

/ Posted by Simon L Infimate
Parbung, February 22, 2020, Virthli (ONP): Manipur CM Pu N. Biren Singh in April 20, 2018 a Parbung khuoa 1st State Level Ginger Festival a hawng ṭuma a lo hril tah, May 25, 2018 a inthawk Helicopter service tan ding tia a lo hril kha vawisun a hawngna nei a lo ni tah.

Parbung Helicopter Service hawngna hi Parbung Communnity Hall ah Dr. Suresh Babu, IAS, Chief Secretary, Govt. of Manipur in a nei a. Hi huna hin Dr. Suhel Akthar, IAS, Addl. Chief Secretary (Forest & Env). Govt. of Manipur, Letkhogin Haokip, IAS, Addl. Chief Secretary (T.A & Hills), P. Vaiphei, IAS, Principal Secretary, Transport, Merlina Pamei, Director, Transport, BK Sharma, Jt. Director, Transport, D. Juli Anal, Dy. Secretary, Transport, Captain Y. Prakash Rao, Global Vectra Helicorp Ltd., Thangjam Rajesh, Station Manager, Global Vectra Helicorp Ltd. hai khawm an thang ve a nih.


Tuta Parbung Helicopter Service ding hi Imphal le inkara ding ti a nia, vawisun khan Parbung VA le a biel mipui han Memorandum lo pein, Imphal via CCpur - Parbung ni lem sien ti chu an ngen a nih. Chief Secretary chun a biel mipui hai dit dan hi hung bawzui dingin an tiem a, a hlawtling ngei a beisei thu a hril.

Parbung helipad tieng panga sukfel ding hieng Counter, Toilet le Quarter hai a la um leiin Service tan ding hun tak hi chieng taka hril thei a la ni nawa, Chief Secretary chun Helicopter Service tan vat ani theina dingin Parbung VA hai chu temporary counter, toilet le quarter pahni bawlna sin lo thaw dingin a hril a, permanent a ding ruok chu nakie Airports Authority hai hung bawl dingin a hril.

Parbung le Imphal inkar a chuong man ding thua, Chief Secretary chun Tipaimukh biel hi lungsiet a um em baka, a hla bawk leiin hmun dang hai nekin palia sukhnuoi/quadruple concession pek ning in ta, a chuong man chu Rs. 1500/- ani ding thu a hril.

A Helicopter service ding tak hi a hma khan Pawan Hans Ltd. hai ni dinga hril ani a, amiruokchu Manipur sawrkar le an contract a tawp ta leiin Global Vectra Helicorp Ltd. hai an service ta lem ding a nih. Global Vectra Helicorp Ltd. hai hi India rama helicopter service tieng panga lien pawl tak le safety record nei tha pawl tak an nih. An Helicopter service ding hai hi Bell Textron le Airbus Helicopters hai siem a ni a, mi 6-13 chen chuong theina a nih.
Don't Miss
© all rights reserved
made with by Simon L Infimate