Responsive Ad Slot

Hearing by High Level Committee on Clause 6 of Assam Accord nei

Saturday, January 4, 2020

/ Published by Simon L Infimate
Haflong, January 4, 2020, Virthli(ONP): High Level Committee on Clause 6 of Assam Accord Justice BK Sharma inrawina hnuoiah vawisun khan Circuit House Haflong-ah hearing nei a nih. Hi huna hin Dima Hasao a cheng hnam tin le organisation hran hran hai ko an ni a, hi le inruol hin HSA Assam Hills Joint Headquarters khawm ko an ni angin hearing a hin an thang a nih.

A hranpa takin HSA hi hun pek an ni a, hi huna hin nikum 2019 September thla lailung laia HSA in High Level Committee on Clause 6 of Assam Accord, Implementation of Assam Accord in thusuok a siem anga comments, views le suggestions a lo peklut ta hai chu hriltlangna nei a nih.

HSA chun Local Bodies (Council) a tuta neka representative ei nei sa theina ding thu dam, State Legislative Assembly a MLA ei nei thei dan ding dam, Land rights humhimna ding thu dam, Culture preserve thaw dan ding thu dam, Hmar MIL suk hmasawnna ding le APSC exam a hai chena Hmar tawnga exam theina ding le Inchuktirtu mamaw hle thu dam le Assam rama Hmar hai theikhata luongkhawma Culture, Language, Land rights, Heritage etc hai vawnghim zingna dingin Hmar Autonomous Council Assam rama Hmar haiin ei mamaw zie thuah sawrkar hmalakna ding thurawn tamtak Committee kuomah hin ziekin a lo peklut ta a nih. Hi thurawn hai hi vawisun hriltlang ani huna hin Committee hai chun Hmar harsatna hi an ngai pawimaw vieu a, thei anga bawzui ani ding thu an hril bawk a nih.

HSA palai hai hi Pu John Mark Pena, President, Assam Hills JHQ in an rawi a, Pu Josef V Tuolor, General Secretary, HSA General Headquarters le Tv. Roger L Faihriem hai chu hi huna hin an thang bawk a nih.
Don't Miss
© all rights reserved
made with by Simon L Infimate