Blessed Choir in Aimol Khullen Baptist Church Golden Jubilee ah hlaa rawngbawlna an nei

Tengnoupal, December 30, Virthli (ONP): Zohnathlak hai laia Pathien inpakna hla sak a rawngbawlna nei mek Blessed Choir chun fiela an um angin December 29, 2019 khan Aimol Khullen Baptist Church in Golden Jubilee lawmna hunser an hmang huna inpakna hla hai sakin hlimtlang takin rawngbawlna an va nei. Hi huna hin Rev. Dr. W. Konghar, General Secretary, Manipur Baptist Church Convention in Jubilee Lung hawngna a nei a, ama a inthawkin Pathien thucha ngaithlak anih. Golden Jubilee lawmna a hin kum 1969 a an khuo a Chanchintha a lut kuma inthawka  kristien hmasa hai le missionary dinga lo inpe hmasa hai kuomah chawimawina chi tum tum inhlan an nih.

Hi hunser a hin Blessed Choir chu Jubilee Choir le Praise & Worship Team niin 'Jubilee Hla' le an Choir in 10th Anniversary an hmang huna an album thar tlangzar a um " Isu hi Lal anih" (Vol-VII) a inpakna hla hai sakin Pathien inpak le chawimawiin unau Aimol hai lai an rawl mawina hai po po insuoin rawngbawlna hi an va nei a, Blessed Choir member- Nk. Hossanmawi Songate, Nk. Christina Khawbung le Nk. Florence  Lalremsiem han inpakna hla pakhat seng an inhlan bawk. Hi huna hin Jubilee Celebration Committee han Chawimawina thuziek le thilpek an lawmthu hrilna in Rev. S.K. Songate, Adviser, Blessed Choir kutah inhlanna an nei a, Jubilee ruoi hlimtlang takin kiltlang a nih.

Aimol Khullen hi Tengnoupal District, Manipur a um a ni a, state capital Imphal a inthawk 49km a hla a nih. Hi khuoa inthawk hin 3.5km chaua hla ah National Highway 102 (Pallel-Moreh) / Asain Highway No.1 a um bawk . Aimol Khullen a hin mihriem chengna In 120 vel a um a, mihriem 500 chuong met an khawsa mek a , an rengin kristien vawng an nih a. An khuo a hin kohran pakhat umin- Aimol Khullen Baptist Church a hin an rengin an inkhawm seng hlak a nih . Aimol Khullen hi Aimol hai ta dinga khuo pawimawi tak el, an bubitna hmun tak ani thu hi huna hin a khuo mihai chun Virthli Palai an hril.