Assam in MLA 126 a nei. Sawrkar siem thei ding chun party in MLA 64 nei a tul. Assam a BJP thuoi state sawrkar cheltu BJP-AGP-BPF coalition hin MLA 84 a nei.
BJP in a khatin 60 MLA a nei. Chuong hai chu a hnuoia hin ei hung tarlang
1. Brahmaputra Valley ah 52 MLA
(Dhubri, Goalpara, Kamrup, Morigaon, Nagaon, Jorhat, Dibrugarh, Tinsukia, etc)
2. Barak Valley ah 8 MLA
(Cachar, Karimganj le Hailakandi)
(a). Bengali Hindu 7
(b). Bengali Muslim 1
Sawrkar suksiet thei khawp vote bank MLA politics hisap chun BJP MLA pariet Barak Valley a thlangtling hai hi an pawimaw nawh. A number zawng chun Brahmaputra Valley a BJP ticket a tling Assamese tawng hmang MLA 52 an pawimawtak. Sawrkar ngirlai sukhning theitu an nih.
Amiruokchu, hieng lawm lawma BJP in Barak Valley districts a Bengali Hindu hai a ngaituo el hi iem a san ning a ta?
Assam hi tawng dang dang group sari umna state a nih. Chuong tawng group sari hai chu a hnuoia hin ei hung tarlang:
i. Assamese tawng hmang Hindu
ii. Assamese tawng hmang Muslim
iii. Bengali tawng hmang Hindu
iv. Bengali tawng hmang Muslim
v. Hill Tribes Roman le Assamese script hmang
vi. Indigenous Tea tribes
vii. Non-Assamese speaking Asomiya hieng 1947 hma a lo lut Nepali hai hi an nih.
B. BARAK VALLEY
Assam a districts pathum Cachar, Karimganj le Hailakandi district hai hi Barak Valley ei tih. 6,222 sq km a lien a nih. Chu chu Assam ram 12% a nih. Mihriem 37 lakhs bawr umna a nih. Chu chu Assam a mihriem 27% ang a nih.
Kum 2011 Census dungzuiin Barak Valley a Hindu population chu
i. Cachar 10 lakhs
ii. Karimganj 5 lakhs
iii. Hailakandi 2 lakhs
Total 17 lakhs
Kum 2011 Census dungzuiin Barak Valley a Muslim population khawm
i. Karimganj 7 lakhs
ii. Cachar 6 lakhs
iii. Hailakandi 4 lakhs
Total 17 lakhs
Barak Valley a hin mihriem 37 lakhs vel ei cheng a. Chu taka 17 lakhs vel chu Bengali Hindu an nih. Bengali tawng hmang Muslim khawm lakh sawmpasari bawr an um. Bengali Hindu an tam met.
Bengali Hindu le Bengali Muslim hai hi tawng angkhat hmang ni hai sien khawm sakhuona ah Hindu le Muslim an nih. Chuleiin politically in Bengali hai hi an inthuruol thei nawh. Muslim hai hi a tamlem chu Hanafi thuoihruoi Sunni an nih. Shia le Ahmadiya tlawmte an um.
Population en chun Barak Valley a Bengali Hindu hai hi iengza an ni nawh. Amiruokchu, hieng lawm lawma BJP in Barak Valley Bengali Hindu hai a ngaituo el hi iem a san ning a ta?
Inlo ngaituo ve hlak am?
C. BENGALI HINDU
Assam a Bengali tawng hmang Hindu hai hi a det a det an nih, linguistically le culturally. Sin insang cheltu an tam a. Clerical posts ah an lut rawn bawk. An tawng an ngai thupui hle. Literature tieng an hausa. Barak Valley districts pathum Cachar, Karimganj le Hailakandi hi an bubitna a nih.
NRC
Kum 2011 khan Assam pumpui ah mihriem 132 lakhs vel ei um a. Chu taka 91 lakhs bawr chu Bengali tawng hmang an nih. Bengali tawng hmang Hindu le Muslim an nih.
Assam ah Bengali tawng hmang 91 lakhs an um. Chu taka 29 lakhs bawr chu Bengali tawng hmang Hindu an nih.
Ring dan chun National Register of Citizens (NRC) List 2018 a lutlo 19 lakhs bawra mihriem 7 lakhs bawr hai kha Bengali tawng hmang Hindu sakhuo zui an nih. Lakh sari bawra thang lai khan Barak Valley Bengali tawng hmang Hindu lakh li lai an thang ve, titu an um.
Thenkhat chun Barak Valley a mipui zaah 11% chu NRC list puotienga sie an nih, an tih. Hailakandi a mihriem zaah 14%, Karimganj a mihriem zaah 11% le Cachar a mihriem zaah 8% hai chu lekha mumal nei lo an ni leiin NRC ah zieklut an ni nawh, titu an um bawk.
Chuleiin Citizenship Amendment Act (CAA) 2019 hi NRC a lut pha lo Barak Valley Hindu Bengali tawng hmang mihriem lakh li hai ta dingin Assam ram mi nina certificate petu ding a nih. An ni hi sakhuona le inzawma East Pakistan rama insukdudana leia kum 1950-2014 sunga Assam a hung lut hai an nih.
NRC List a hming chuonglo hai kha 1951 bawra inthawka Hindu refugee anga zieklut a um hai an nih. East Pakistan ei ti tuta Bangladesh a hin kum 1950 lai khan hnam le hnam indona a lo tlung a. Bengali Hindu lakh hni velin Bangladesh a an in le lo, an sin le ro popo maksanin Barak Valley an hung lut a. Economic reasons leia hung inpemlut an um bawk. Sawrkarin colony sawmhni a siem a. Chu taka chun enkawl an lo nih.
Sawrkar refugee list 1951
i. Karimganj le Badarpur ah 19,723
ii. Ratabari le Patharkhandi ah 17,897
iii. Katigorah, Borkhola le Udharbond ah 11,745
iv. Silchar ah 8251
v. Hailakandi le Katlicherra ah 6625
vi. Lakhipur le Sonai ah 6072
Tuta NRC a lutlo hai hi khang hun laia Pakistan a suknawmnata um, Barak Valley a hung tlanlut le an nau hai nau hai dam an nih. Lungsiet an um hle. Chun puotienga inthawka Assam hung tlanlut popo illegal migrants titu ei tam lem.
Barak Valley ah MLA biel 15 a um a. Kum 2011 MLA election khan Congress in MLA seats 13/15 an chang. BJP=Nil. Kum 2014 a MP election a khan, Silchar MP seat chu Congress in an chang a. Karimganj MP biel chu AIUDF in a chang.
Amiruokchu, BJP in Silchar MP biela Silchar MLA bielah an hmu rawn tak. Chun Karimganj MP biel a MLA biel pahni Ratabari le Karimganj North ah BJP in an hmu rawn tak. Chu umzie chu Barak Valley MLA biel sawmpanga ah biel thum chu BJP mansapui ah laklut an tah. BJP in Hindu Bangladeshi hamrhatna ding an sopui lei a nih.
Kum 2015 khan MHA fethlengin BJP sawrkar chun Bangladesh a inthawka Assam hung inpemlut Hindu Bengali kum 2014 chena hung lut hai ngaidamna order official in a lo insuo tah. Chu order chu Bengali Hindu refugee hai ta dingin malsawmna certificate a nih. Chu certificate chu sirsanin Barak Valley a MLA biel riet ah kum 2016 MLA election khan BJP in hratna an chang ta a nih.
BJP hratna MLA biel riet hai chu a hnuoia hin ei hung tarlang:
i. Katigorah, Cachar
ii. Borkhola, Cachar
iii. Silchar, Cachar
iv. Sonai, Cachar
v. Dholai, Cachar
vi. Udharbond
vii. Ratabari, Karimganj
viii. Patharkhandi, Karimganj.
Karimganj North le Badarpur MLA biel chu Congress in an chang. AIUDF in Hailakandi, Katlicherra, Algapur le Karimganj South an chang.
Assam a Bengali hai hi an taima a. Sin taphawt thaw peilo an nei nawh. An capitalist minded bawk. An fak kuol thei vawng. Amiruokchu, Asomiya hai chun Bengali tawng hmang hai hin Assamese tawng hmangtu hai inthanglienna dal theitu dingin an ring. An ram le tui inchupui theitu dingin an ngai a. Chun an chanpuol an la lak pek ding an sawn. Chuleiin Asomiya national culture chu Bengali hai leiin a derthawng tiin an hung sopui ta a nih.
D. BENGALI MUSLIM
Assam ram Brahmaputra valley a districts dang hieng undivided Kamrup, Goalpara, Nagaon, Darrang, Lakhimpur le Sivasagar a hai khawm Bangladeshi refugee Hindu le Muslim an lo inpemlut. Tuhin Assam a districts 12 ah intodel deuva um an nih. Assam economy ta dinga motor pawimawtak an hung ni tah. Dhubri, Goalpara, Kamrup, Morigaon le Nagaon districts ah rawl inringtakin an khek ngam tah. Bodoland ah hnam dang chawkbuoi khawp an um. Asomiya Bengali Samaj sopuitu an um bawk. Bengali language movement (1960-1961) khan Brahmaputra valley a Bengali a lo chawkbuoi ve. 50,000 bawrin Brahmaputra valley an suoksan a, Bengal an pan. 90,000 bawr Cachar, Karimganj le Hailakandi ah an hung lut. Amiruokchu, khawvel inlumlet en peiin tuhin chu Bengali Muslim tia ko nekin Muslim of Bengal origin ti an nuom lem tah.
Bengali Muslim hai hi Assam ah biel li ah an cheng
i. Lower Assam (Kamrup Rural, Dhubri, Goalpara, Barpeta, etc).
ii. Central Assam (Nagaon, Darrang, Morigaon, etc)
iii. Upper Assam (Lakhimpur, Tinsukia, Dibrugarh, Sivasagar, Golaghat, etc)
iv. Barak Valley (Karimganj, Hailakandi le Cachar). Lakh 71 a 23% vel chu Barak Valley a cheng Bengali Muslim hai hi an nih.
Bengali tawng hmang Muslim tam takin Assamese tawng chu an mother tongue a nih tiin Census ah an ziek. Chuleiin kum 1951 khan Assamese tawng hmang Assam ah 56% an tling. Chu chu kum 1931 le tekhi chun a double neka tam a nih. Kum 1951 khan Assam ah Bengali tawng hmang 16% chau an nih.
Politics tieng khawm an insang hle. Kum 1978 khan Assam a MLA 126 ah 27 chu Bengali Muslim an nih. West Bengal lungril put Leftist MLA 23 an um bawk. Guwahati Municipal Corporation a chen 13/30 Ward Members chu Leftists an nih. Hmatieng peia Assam CM ni pal an tih ti Assamese haiin an inlau ta bek bek a nih. Assamese upper class le an local press haiin public domain ah an inlau thu an hung sopui khan Assam politics chu a hung danglam ta a nih. Bengali tawng hmang Muslim haiin Assamese hai politics ah an hnengna boruok khan Assam Agitation (1979-1985) a suksuok ta a nih.
E. ASSAMESE-BENGALI CONFLICT
Assamese le Bengali hi hieng lawm lawma iengleia inmillo el am an ni aw?
A san ding awm pathum zuk tarlang ei tih:
Linguistic le economic
1. Kum 1826 a Saphaiin Assam an hung lut khan ram ruok taluo a la nih. Assamese lekha thiem an tlawm. Chuleiin clerical posts le administrative sin thawtu dingin Bengali tawng thiem thuoilut an nih. Bengali babu in administration tieng an enkai a. Sin an hnesaw a. British officers nekin an inlal lem. Kum 1836-1874 chen kha Assam ah Bengali tawng chu court le official tawngin an lo hmangpui. Sikul a medium of instruction khawm Bengali a nih. Hieng hun lai hin Assamese tawng hmangtu chu 25% chau an nih.
Tea trade, opium business, oil exploration, coal mining le rail lam siem huna sin thawtu dingin East Bengal a inthawk, Bihar, Jharkhand, Orissa le Nepal a inthawk damin mihriem tamtak a tawlin a lo tawllut. Capital investment thaw nuomtu Rajasthan le hmun dang danga mi hai Assam ah an hung lut bawk.
Kum 1874 khan Assamese chu state language a hmang a hung nih. Amiruokchu, Assamese texbooks an la nei tlawm a. Literature tieng an la pasie hle. Chuleiin school a medium of instruction thuah an buoi ngun. Lo thei lovin Bengali hmang tulna a lo tam. A var deu haiin kum 1888 khan Assamese Language Improving Society an indin.
Kum 1901 khan Assam ah Bengali 29,47,916 an um a. Kha kum vek khan Assamese 13,49,694 an um.
Kum 1930s lai khan agriculture tienga inthanglienna hnawtin phaia lo nei nuomtu East Bengal mi tamtak Assam ah laklut an nih. Mi dangin an hung zui pei a. Kum 1947-1971 sung khan inpemlut Bengali tawng hmang an pung hle.
Assam Brahmaputra valley a lut tamtakin Assamese chu an mother tongue angin an ngai a. Force hmanga inthawluina leia inti Assamese khawm an um, an tih. Chuleiin kum 1951 khan Assamese hmang chu Assam a mihriem zaah 56% tia record a nih. Hi kum ma hin Bengali tawng hmang 16% chau tiin an record.
Assamese in Bengali Hindu hai chu inelpui khawpin an hmang. Chuleiin kum 1947 a inthawk khan Assamese haiin Bengali Muslim hai chu ruoltha in an man a. Bengali Hindu an inkhingpui.
Brahmaputra valley a Bengali Muslim ruok chun school an indin a. Assamese medium an hmang. Assamese candidates an vote tling a. Assamese tawng an hmang. Bengali Muslim lai lekhathiem an la vang a. Middle class tha an la nei nawh. Bengali Hindu competitors khinpuitu dingin Assamese haiin an lo hmang hlak. Chuleiin Bengali Muslim hai chu Brahmaputra valley ah hadam deuvin an khawsa. Pawl thar an indin a. AAMSU le Asomiya Bengali Samaj in mipui an thuoi.
Amiruokchu, Assamese haiin Bengali Muslim hai hi middle class profession le political thil ah ruolkhat angin an ngai thei nawh. Kum 1970s khan Bengali Muslim hai an hung piengthar a. Dispur sawrkar chu Brahmaputra valley a indigenous Assamese hai chau sawrkar a nih, an hung ti tan ta a nih. Pu Farukuddin Ali Ahmed le Pu Moinul Haq Choudhury haiin Brahmaputra valley a Bengali Muslim political rights an hung sopui ta a nih.
Kum 1960 a Assam sawrkarin Assamese tawng official state language in a puong khan Barak Valley ah buoina a suok a. Bengali language movement humhaltu Cachar Gana Sangram Parishad (CGSP) thuoitu hai man an nih. May 19, 1961 khan Silchar Railway Station ah mi sawmpakhat kaphlum an nih. Vawisunni chenin hi ni hi Bhasha Shahid Divas an tih. Kum 1961 khan Assam sawrkarin Barak Valley a dingin Bengali tawng chu official language in a lo pawm tah.
Kum 1960-1961 Bhasa Andolan a khan Brahmaputra valley a Bengali hai an thang nawh. Bengali Muslim tia ko nekin Muslim of Bengal origin ti an nuom lem.
Kum 1948 laia an lo sopui tah Purbachal state chu kum 1954 khan Union Territory Demand Committee (UTDC) haiin an demand. Cachar le Tripura khitkawpin Purbachal state an lo ngen. Assamese haiin hihi Greater Bengal Scheme an tih. Sawrkar in Bengali Purbachal state a pek nawh. Kum 1961 khan Assam a Bengali chu 17% chau an nih. Assamese 57%. Bengali Hindu a tamlemin Purbachal movement kha Muslim movement an tih.
Gauhati University hnuoia college popovah Assamese tawng chau medium of instruction a hmang ta ding tiin Gauhati University in kum 1972 khan thu a lo pass a. Cachar le a sevela Bengali biel aiawtu Assam ministers pahni le MLA sawmpathum hai chu inhnukdawk dingin mipuiin an lo vau. Bengali tawng chu Gauhati le Dibrugarh University ah medium of instruction ni ve dingin Cachar Sangram Parishad in
a lo nawr. Brahmaputra valley huomsunga school le college ah Bengali medium hmang theina permit an lo ngen bawk. Ramtina buoina a suok. Kum 1994 a Assam University kha Bengali language movement rasuok a nih.
Politics inlumlet in Bengali a thangpui a. Kum 1978 a MLA election a khan Assam a Bengali Muslim in MLA 27 out of 126 an hung nei ta a nih. Gauhati Municipal Corporation election ah 13 out of 30 wards ah hnena an chang khan Assamese mipui lung a sukna hle. Kha kha Assam agitation intanna bulpui a nih. Ali (Muslim), Coolie (Bihari), Bongali (Bengali tawng hmang) le Naak Septra Nepali (Nepali) hnawtdawk an hung tum ta a nih. Kum tamtak Assam an chawkbuoi a. Illegal migrants hnawtdawk tumin sawrkarin kum 1983 khan IMDT Act an duong pha ta a nih. Hi act hin kum 2000 chen khan illegal migrants sangkhat vel a hmudawk.
Assam agitation leiin Bengali Muslim tamtakin hringna an chan. Boruok a hung sosang nasa khan sawrkar le student union leaders inbiekna chu Delhi ah nei a nih. Kum 1985 khan India sawrkar le Assam student movement thuoitu haiin Assam Accord an sign. Chu accord dungzui chun kum 1971 hnunga indiklotaka Assam hung lut popo hnawtdawk dingin sawrkar le Assam movement thuoitu hai an inrem. A tangkai chuong nawh. Kum 2005 khan Supreme Court in IMDT Act chu a thaibo a. Kum bul khan Assam Accord a Clause 6 bawzuitu ding High Power Committee indin a ni bawk.
Kum tamtak Congress party in illegal migrants Bengali tawng hmang Brahmaputra valley a cheng hai chu votebank politics in a lo hmang a. Amiruokchu, kum 2006 a inthawk khan AIUDF an zui tah. Kum 2016 khan Assam ah MLA sawmpariet an hmu. Barak Valley ah MLA seat pali (Hailakandi, Katlicherra, Algapur le Karimganj South ah an tling.
Chun Union Territory demandtu UTDC hi Bengali Muslim hai party a nih tiin Barak Valley Bengali Hindu a tamlemin an support nuom nawh. Literary le cultural organisation hrattak an nei a. Chu chu Barak Upatyaka Banga Sahitya-O-Sanskriti Samnelan (BUBSS) a nih. Hi hin Bengali Hindu mipui a thuoi tah.
Demographic
2. Kum 1951 a inthawka kum 2011 sung popo khan census a tam lemah Muslim population a pungzie. 2001 le 2011 kar khan an pung hle. Hi hun vek hin Hindu population a tlahnuoi. Hindu kulmut lung a tawk hle.
Land
3. Puotienga inthawka Assam hung inpemlut a tamlem hin ram ruok le wasteland ah umhmun an khuor a. An taimakna leiin bu le tlai an chieng a. Phai lo lien tak tak siemin, bufai zawr ding tamtak an nei tawl. An thil hlawk sirsanin trade le business an lut a. Sum an kamai hlawkin Assamese ram ruok an inchawk pei a. Tribal ram khawm an hneng pei. A ram neitu hai nekin business an thiema, an hausa duok duok. Ram an hau pei a. Political power chen an nei pha ta a nih. Chu power chu sirsanin Bengali tawng an hung uor a. Bengali medium school an indin a. A ram mi hai le inmix nuom bek lovin an fena naah Bengali culture an putlut pei a. Assamese gamocha nekin an thuomhnaw le language besanin an ni ropui hai mi rama an hmang pei. Chu chu a ram mi hai tawng le culture hnengnan an hmang pei. Bengali Muslim hai hi census tinin an punga. Kum 2011 khan Assam a 29% chu Bengali tawng hmang an hung ni ta a nih. Assamese sub-nationalism uongpuitu le upper middle class hai mit an suk kham hle. Vawisuna anti-CAA protest hi chu dorbin a inthawka thlir a tul.
F. GREATER BANGLADESH
2011 Census hril dan chun India pumpuiah Assam state ah Muslim sakhuo a pung tak. Kum 2001-2011 sung 3.3% in an pung. Uttarakand, Kerala, West Bengal, Goa le Jammu and Kashmir a Muslim pung nekin Assam a Muslim pungzat an sang lem.
Barak Valley a Muslim population hi census thaw zat a pung zie hlak. Bengali Hindu population ruok chu a pung hrat der nawh.
Hienga Bengali Muslim kumtin an pung pei chun nakie chu Barak Valley ah Bengali Hindu nekin Bengali Muslim an la tam lem hun um a tih. Chu hun a chun Muslim haiin Islamic state an lan din tum ding a nih.
Tam tak chun illegal immigration hi Greater Bangladesh Project hriemhrei a nih, an tih. BJP in Barak Valley ah Islamic country pieng ding an inlau hle. Chuleiin Bengali tawng hmang Barak Valley a cheng Hindu Bangladeshi hai hi "Greater Bangladesh" Islamic state project lo dodaltu dingin BJP in hmang a tum a nih. Chu lampui a sirsan pawimawtak chu Citizenship Amendment Act (CAA) hi a nih. Kum 1971 inthawka kum 2014 sunga Assam inpemlut Bengali Hindu hai hamthatna a ni nghal. CAA hi India mi le sa nina petu ding a nih. Hmatienga Barak Valley Bengali Muslim la do theitu a nih.
G. THUKHARNA
Assam a district thenkhat khitkawpa Bangladesh a zieklut tumna lungril nei helpawl in Dacca sawrkar an lo zu dawr khan India sawrkar lung a sukna hle. East Pakistan khan NSCN, MNF, ULFA le helpawl dang dang an lo thangpui a. Chu chu dodalnain ei hun tha, sumfai le energy tam tak ei lo sukral.
Kum 1947 July thla khan India le Assam sawrkar chun Assam Province huomsunga um Bengali bubitna Sylhet district chu East Pakistan ah an lo nawrlut. Sylhet district rin sunga Badarpur, Ratabari, Patharkhandi le Karimganj Thana area mipui chu ni hni East Pakistan huomsungah an um hman.
Amiruokchu, Bengali tawng hmang Cachar nationalists hai zarin khang laia Bengali Hindu bubitna Badarpur, Ratabari, Patharkhandi le Karimganj Thana area hai chu Assam ram ah ei la laklut thei hram. East Pakistan a nawrlut Bengali speaking Sylhet district sunga cheng ve Badarpur, Ratabari, Patharkhandi le Karimganj Thana biel mipuiin Sylhet referendum in East Pakistan lut vawng ding tia a namdet kha pawm chuong lovin Assam ah an la kawp phet phet a nih. Cachar district ah zieklut an nih.
Kum 1950, 1962, 1964 le 1971 a East Pakistan Surma Valley a Bengali Hindu sukdudana leia Assam a hung tlanlut popo hai ei salaam. Chun sakhuona leia kum 1989, 1990, 1992, 2012 le 2013 chena Assam hung lut hai ei lawmlut bawk.
Kum 1947 July laia Assam sawrkar suklawm tumtu national leaders hai kha vawisun hin mi tam takin an sawisel tah. Indian nationalists a tamlemin Bengali speaking Sylhet district referendum an lo sopui naw kha tuta BJP sawrkar hin pawi a ti hle. Amiruokchu, NRC, CAB le Clause 6 High Power Committee sirsanin BJP in Assam politics thiem takin an hnel zing.
Kum 1946 khan BJP founder Pu Shyama Prasad Mukherji in Bengali Muslim hai "United Bengal" movement kha a thei tawp suoin a lo do. United Bengal Pakistan a thuoilut tumtu Bengal politician hai a lo do char char. Indian union huomsunga Bengali Hindu Homeland a lo demand lem a nih. A rasuok chu West Bengal a nih. Bengali Muslim bubitna East Bengal chu Pakistan ah thailut a nih. Kum 1950 khan Pu Mukherji in Nagaon, Tezpur le Shillong a hung sir a. Assamese tawng inchuka Assam hi mani khuo anga ngai dingin Bengali hai an fui tawl.
Pu Mukherji lo huoihawt Bengali Hindu homeland movement chu lungril ah sie zingin BJP hai hin Assam a MLA nei rawn lem Brahmaputra valley a Assamese mipui lung sukna khawm pawisa lovin Barak Valley a Bengali Hindu refugee politics besanin Indian national politics an inhnel a nih. A rasuok chu CAA hi a nih.
Barak Valley Hmar hai hi Kachari kingdom indin a ni hma dai a inthawk khan Tippera kingdom huomsunga lo inzellut ei nih. Tularam Senapati Barman a lalram North Cachar Hill Tract khawma a mi lo huomsa ve nawh. Hmar country in Kukidesh a lo khawsa hlak ei nih.
Christian Bangladeshi nilo vawksa le bawngsa fa hlak hai chu Assamese-Bengali divide thuah ei buoi phak ve nawh!
-Ziektu
Dada le Jojo-Pa,
Hmarkhawlien, Cachar, Assam
30.12.2019
