Responsive Ad Slot

Blessed Choir 10th Anniversary hlimtlang takin hmang

Sunday, November 10, 2019

/ Posted by Simon L Infimate
Saikot, November 9, 2019, Virthli (ONP): Hmun tin le ram tin a, tawng hrang hrang a hlaa rawngbawlna nei mek Blesssed Choir chun November 9, 2019 dar 10:30 AM khan Saikawt Children's Home Chapel ah an Choir a kum sawm tlingna (1Oth Anniversary) hlim le lawm takin an hmang. Hi huna hin Chief Guest in Pu C. Lalrosanga, Hon'ble MP, Mizoram a thang a, Functional President in Pu V. Hangkhanlian , Hon'ble Minister, Agri., Vety., & A/H, Govt. of Manipur a thang a, Chief Host in Dr. Chaltonlien Amo, Hon'ble MLA, Tipaimukh A/C a thang.

Hun hmangna hi Pu Laldatlien F. Tusing le Nk. Christina Lalrokim haiin an keithuoia, hun hawngna hla "Lalpa Mi Thuoi Dan" ti hla mipuiin sakna an nei zoin hun hawng tawngtaina Rev. S.K. Songate, Adviser, Blessed Choir in a nei a, keynote address Ms. Lalnuntluong, Treasurer, Blessed Choir anthawkin ngaithlak a nih.

Hi huna Chief guest Pu C. Lalrosanga in thu a hrilna a chun Blessed Choir le hin inlaichinna inthuk tak el an nei thu a hril a, hlaa an rawngbawlna hin Mizoram ah nghawng nasatak a nei thu hrilin, hieng ang hunser an buotsai hi a ngai pawimawimawizie thu hrilin khawvel MP nekin Vanram MP a pawimawzie thu ursun takin a hril a. Functional President khawma Blessed Choir han hla hmanga an rawngbawlna hai a lo en hlak thu, fam tah Pu Buonglienkung le Pu Lalnunthar hai ngai an um thu hrilin Pathien inpakna hla hai saka rawngbawlna hi Pathien lawm zawng ani thu hrilin, Pathien inpaka an pakna hlasak hi malsawmna bul ani thu a hril. Chief Host in thu a hrilna a chun Blessed Choir hi hnam hming sukthatu an ni thu a hril a, an hlasak hai a hring a, tawng hrang hranga inpakna hla hai sak a hmun dang dang a hai rawngbwlna nei rawp dingin a ditsak thu a hril.

Hi hunser hmang huna hin Mr. Lalramhlun, Souvenir Editor keithuoinain Blessed Choir 10th Anniversary Souvenir tlangzarna le inhlanna hunser Rev. Dr. J.L Songate, Executive Secretary, ICI in a hmang a, Mr. L.Z. Hmar , Conductor, Blessed Choir keithuoinain Chief guest in Blessed Choir Music Video Vol-VII tlangzarna a nei bawk. Hi huna hin HCLF thuoituhai a'nthawk le Dr. John  Pulamte anthawk thuhril tawi ngaithlak a nih. Hi huna hin Blessed Choir Conductor lo ni ta hlak-  (L) Pu Lalnunthar F. Tusing hrietzingnain to tawka sunna hunser hmang a nia, a In phal taka Blessed Choir Office dinga pe suoktu Pu Lalramlien Darngawn kuomah chawimawina inhlan a ni a. Mr. John Hmar, Secretary, Blessed Choir in secretarial report pekna le khuollien hai chawimawina thilpek inhlanna hun a nei.

Blessed Choir 10th Anniversary hmang huna hin Blessed Choir, NPT Central Choir, ECA Central Choir, ICI Central Choir, PCI (R) Central Choir, EFCI Saikot Presbytery Choir, EBC Central Choir, Reformed Choir members anthawk malzai le Ms. Daisy Khawbung hai anthawk inpakna hla ngaithlak a nih a. Pu Thangzarlien, Chairman, Blessed Choir in lawmthu hrilna a nei a, hun tawpna hla ' Heiraw Heiha' ti hla Blessed Choir anthawk ngaithlak a ni zoin Rev. Lalhmingthang, Secretary, Ministries ICI in hun khar tawngtaina le ruoi inhlanna a nei a, hlim tlang takin 10th Anniversary ruoi kiltlang niin dit khawp lo takin hun suktawp a nih.

Don't Miss
© all rights reserved
made with by Simon L Infimate