Responsive Ad Slot

Delhi khawpuia Hmarnau haiin ‘The 34th Freshers Social Meet’an hmang

Sunday, September 8, 2019

/ Posted by VIRTHLI
New Delhi, Thlaram 7, 2019, Virthli (ONP): Vawisun chawhnung dar khat khan Delhi Police Subsidiary Training Centre Auditorium, Malviya Nagar, New Delhi hmunah Hmar Students Association, Joint Headquarters, New Delhi (HSA Delhi) huoihawtna hnuoiah ‘The 34th Freshers Social Meet’ hmang a nih. Hi hun hi Delhi le a sêvêla khawsa Hmar ṭawng hmang mipui tam tak fekhawmin an uop a nih.


‘The 34th Freshers Social Meet’ hi hun hni a ṭhe a hmang a nih. Hun khatna hi Tv. Henry Haulienkung le Pi Lalhlimum haiin an hnesaw takin an keihruoi a. Hun hmasa takah Tv. Robullien Khawbung, President, HSA Delhi in fekhawmhai lawmlûtna a nei. Tv. Ephraim Lalditsak, Vice President, HSA Delhi hi an hmalakna chi hrang hrang hai ngirhmun a hril. Hieng hai laia langsar zuol deu hai chuh Delhi University a inchûk ding admission zawng Hmarnau inchûklai hai an ṭhangpui dan le thla ruk zet aw, ‘professional tutor’ruoia an huoihawt ‘competitive exam’ pe dinghai ta dinga coaching an buotsai dan hai a hril a. Inchûklai tamtakin an hlawkpuiin an la sawr pei beisei ani thu a hril a. Hi coaching buotsaina ding hin HSA sum nei sa bâkah Delhi a mi tlawmngai ṭhenkhathai sum thawlawm hmanga puitling thei a ni thu a hril bawk.

Hun khatna a hin Nk. Roslyn Sinate le Tv. Paozamuan haiin ṭuonthar (fresher) hai inhmelhriettirna hun an hmang a. Ṭuonthar 150 vel zieklût hai lai mi 70 vel vawisuna hun hmanga hin an ṭhang thei a nih. Kum 2019 a inthawka 2021 chena Hmar Students Association, Joint Headquarters, New Delhi ṭhuoitu ding thlangna nei a ni a. A hnuoia ang hai hih mipui fekhawm haiin an thlang tling a nih:

President: Tv. Ephraim Lalditsak
Vice President: Pu Lalṭhuoilien Chhangte
General Secretary: Tv. Joshua Lalsandam
Asst. General Secretary: Tv. Fimruolsung Infimate
Finance Secretary:  Nk. Cindy Hrangchal
Treasurer: Nk. Elohim Buhril
Department Secretaries: Tv. Samuel Lalsuokung, Tv. Samuel Penatu, Tv. David Khawbung, Nk. Lizya Shakum le Tv. John Lalsansuok Parate

Ṭhuoitu ding thlang thara um hai hi Pastor Lalditsak Inbuon in mipui le Pathien hma-ah sesamna an nei tir.

Hun khatna a hin Pu Darsuothang, Chairman, Delhi Hmar Welfare Association le Pastor Lalditsak Inbuon haiin thuhril tawi an nei a. Pu Darsuothang in Delhi le a sêvêla khawsa Hmar ṭawng hmang ni si, khawtlang le kohran bêl nachâng hre lo le bêl tum lo, hnam hming suksie hlaktu mi tam tak an um thu a hril a. Hieng anga khawsa hai hi an sim theina dingin mipui fekhawm hai chuh an theina sengah ṭhang la pui dingin a fiel a nih. Tv. Fimruolsung Infimate, General Secretary report a pek bawk.

Hun khatna hmang zo ani hin mipui fekhawm haiin sa chârtâng inhnik tak el hme in khawp le tlai takin ruoi an kîl tlang a nih. Ruoi ṭhe zovin hun hnina sunzawm nawk nghal a ni a. Tv. Henry Haulienkung, Pi Linda Riengsete Chhangte le Tv. Hmarramsiem haiin hun hnina hi an keihruoi a. Thusam (poem) ziek insiekna hun hmang a ni a. Tv. Joshua Lalsandam, Asst General Secretary in lawmthu hrilna a nei bawk. Hi zo hin hla ruoi ropui tak kîl tlang nawk a ni a. Hmar hla mawi tak tak el, hlasak thiem tak tak haiin mipui fekhawm hai an in-awi a. Mipui an hlimin an lâm nasa hle. Hun khatna a inthawkin hlasak thiem tak tak el hieng: Tv. Lalhrietsung Sanate (Pengpelep), Pi Chatuonramhlunnei, Nk. Jessica Khawbung, Tv. E Zion Varte, Tv. Lalrotluong, Pu Isak Parate, Nk. Jenet Joute le Tv. Jacob Penatu haiin hnam hla le sai hla chi hrang hrang sakin mipui an in-awi a nih.











Don't Miss
© all rights reserved
made with by Simon L Infimate