Responsive Ad Slot

TUI & LUNG

Sunday, June 30, 2019

/ Posted by Simon L Infimate
~ Jami Darngawn

Ka ngaituo hlaka Tui leh Lung hi Pathien thilsiem lai a chun inang naw pawl tak ning a tih. Tui chu a luonga luong, annaw leh dawn chi, insukfaina a nih.

Lung ruok chu lungpui le lungte khawm nisien ei dawnin ei fak ngai naw hrim hrima, amiruok chu mihriemhai ta dinga a ṭangkaina ruok chu a dangdai in a ṭangkai em em a nih.


Lung leh tui chu an ṭangkaina/thilthawtheina inang naw hle, sienkhawm an umkawp chun an inmil hle a, tui bal deu lai khawm lunglien/lungte ei sie chun tui chu a hung var/thienghlim thei a nih. Chun, vadunga tuiluonglai a khawm hin lungte/lungpui an um naw thei naw bawk.

Bible a ei hmu angin ṭhuoitu Mosie chun Lalpa thu zawmin lungpui chang em em kara tui a vuokdawk khawm kha tui thienghlim dawn tlak le fak tlak a tinga Israelhai khan an dampui a nih ti ei hmu a nih.

Chuongang bawk chun harsatna leh malsawmna khawm hi an umkawp hlak ti inla inkhel naw nih. Harsatna leh malsawmna chu tui le lung ang ela inang lo nisien khawm mihriem hringnun a hin an inkawp tlat a nih.

Mihriem harsatna tuok ngai lo chu vadunga lung um naw ang ning a tih. Chu chun mihriem dangchar phîngṭam a hnem thei ngai nawh. Asanchu harsatna a tuok ngai naw leiin mi harsatna hang hnema  hrietpui chu harsa an ti hlakin lungril takin an tuorpui ngai nawh. 

Pathienin ṭhuoitu Mosie kuomah Israelhai dawn dinga lungpui chunga tui inputtir/insuoktir dinga A ti angin, Mosie chun thuawi takin a thaw hlaka, sienkhawm vawikhat char "Ka/kan" (Nambar 20:8-12) a lo hmang leia Ram tiem ram a tlung zo naw angin. Nang le kei khawm Lalpa'n ei mihriem chanpuihai tadinga malsawmna intluntu dinga Ami ti lai "Ka pei nawh" lo ti pal ei tih ti inlau a um de!

Exodus 17:
5. Chun LALPA chun Mosie kuomah, “Mipuihai hmaa chun fe la, Israel upa ṭhenkhat i kuomah ṭhuoi rawh. Chun vadung i vuokna hmawl kha i kutin chawi bawk la, fe rawh.

6. Ngai ta, Horeb lungpui chunga sawn i hmaah ngîr ka ta, chun lungpui chu vuong i ta, a sûnga inthawkin tui hung suok a tih, mipuiin an dawn theina dingin.” a ta. Chun Mosie chun Israel upahai mithmu ngeia chun chuongang tak chun a thaw ta a.

Pathienin ṭhuoitu Mosie kuta thilthawtheina A pek "Hmawl" anga thilthawthei Bible thu hi hmangṭangkaia mihai tadinga damna leh malsawmna intluntu ni thei dingin nang le kei Lalpa'n mal mi sawm thar raw sen ie.

LALPA'N A THU MALSAWM RAW SEH.
Don't Miss
© all rights reserved
made with by Simon L Infimate