Aizawl, 6 May, 2019, Virthli (ONP): Khawvel hin mi ropui tak tak, mi bîk tamtak a neia, hienghai hi a tam lem chu lal in le concrete building hnuoia pieng nilo, retheina khurkuoruom a'nthawka hung suok, an taimâkna le tumruna in khawvel hrietah a i siem hai dam an nih. Chuongang mi chu ei chêngna ram India a ngei khawm hin hriet ding an tama, ei ni tlangmihai lai khawm hin hmu ding an um nuk.
Mizoram hmar tiengpanga um Bilkhawthlira naupang pakhat chun harsatak hnuoia inchûka miropui hung ni ta hai chanchin a tiemna inthawk le insung retheina a'nthawkin tumruna a hmusuoka, chu a tumruna chun hlawtlingna a'ntluna, mi hrietah a siema, an retheina le harsatna chu a tawpah lawmna'n anchang tah a nih.
Hi naupang hi tu mi dang ni lovin Hmar-Thiek (Tuolor) thisena insieng Given Lawmnakima Thiak (A birth certificate a anziek dan) a nih. Given hin May ni 2, 2019 a Mizoram Board of School Education (MBSE) in HSLC (Class-X) result a suksuoka khan full mark 500 ah mark 433 (86.6%) hmua, subject popoah (Maths-87, Science-84, Social Science-90, English-82, Mizo-90) letter mark a hmu vawngin, Top ten-a mark hmu inhnuoitak R Lalrinmawii, Bethel Mission School, Champhai leh mark 31 in an inthlau a nih.
Kum 2004, March ni 22 khan Pu David TVL Hmangaiha (58) le Pi Lalzarmawii (35) hai inkara rîlara nau malsawmna 9 (Pasal-5 le nuhmei-4) laia a upatak ni dingin Kharzawl, Bilkhawthlirah a pienga, naupang thuawitak le lekha thiem thei tak a nih.
Apa Pu Hmangaiha hi Saipum, Sinlung Hills, Kolasib district khawsuok niin, lo sinthawa fakzawng an na, kum 1986 khan fakzawgna ṭhalem beiseiin Saipum a'nthawk km 38 vela hla Bilkhathlir ah an inpêma, chu chena inthawk chun umhmun an khuor sawng tah a nih.
Given hin an insung ngirhmun a hrietchieng leiin, a thei ang angin a nu le pahai a ṭhangpui hlaka, lo a dam fein tlangsin hai a thaw hlak a nih. "Lo sinthawa fak zawng kan nia, kan ureng laia upatak ka ni bawk leh ka thei ang angin ka nu le pa ka ṭhangpui hlaka, lo a hai dam fein sin hai kan thawk hlaka. Duthusama lekha tiem thei naw châng ka nei hlak," ti'n a'nchûk dan Virthli a hril.
An in le school inkar hi km 3 le chenve a hla a nia, a kalman ding tuokin a pahai a thangpui hlak. "A châng chun ka kalman ding bakah ka tuition fee le lekhabu man dinghai tiin mi dang kuomah ka van hlaw nawa chu ka pa lo ah ka zui hlaka. Kan zirtirtu ha'n an mi lunginsieta, lekhabu dam mi'n chaw pekin, ka kalman dam an mi tum pek hlak," Given chun a tih.
Ni kuma pawl-10 anchûk ding khan admission an thaw theinaw leiin an school chun a thlawnin an thaw peka, "Sum kan harsa leiin a huntaka admission kan thaw theinawa, sienkhawm kan principal le zirtirtuhai an fela, free admission an mi thaw peka, chu chau chu ni lo school uniform, shock (moja) le uniform keihnawi thil dam a thlawn vawngin an mi peka, ka tuition fee chen min awl tir châng an nei hlak," ti'n Given chun an principal Pu Zaithawnmawia le zirtirtuhai chungah a lawmzie hnuk ul rakin an zawt.
Pawlsawm result suok ni khan mi danghai chu an school a hai dam feiin result suok ding kar an nghakhla a, Given ruok chu bawngtuthlaw leh inthawkin a sunghai leh lo tieng an pir vuok vuoka. "Kan result a suok ding ti ka hrieta sienkhawm Kuva kan phun lai tak a ni leiin sinthaw a tul sia. Ka ni kuomah result a suok pha mi hung hril dingin kan tia, ṭu ah kan chawl lai tak ka ni chun pawlsawm ka pass thu a mi hung hrila, kan sungin kan lawm takzet a nih," tiin Given chun Pathien, a nu le pa le an zirtirtuhai zara hlawtlingna a chang thei chu ropui a ti chau ni lovin a lawm a kim em em thu a hril.
Ṭawngmawinaw ni naw sien insung harsatak hnuoiah lekha inchûka, iengtin am tumruna i nei thei?
"A ni ngei, lekha kan chûk ṭan ve ding chau a na, hmabak an kho khawp el. Lekha ka tiem thei china inthawkin mi ropuihai chanchin ka tiem hlaka, chu khela chun ka nu le pa hin an min fui mawl mawl hlaka, harsatak hnuoia khawsa kan ni leiin ka hmatieng inhawi deua ka khawsak theina dingin nasa deua inchûk dingin an mi ti hlak. Chu hai te chu ka lungril a ka vawng tlata, tumruna an mi pek pha niin ka hriet."
Given hin Engineer a nuoma, Science hi a favourite subject a nia, Class-10 exam an prepare lai khan Mathematics ah a chau deu leiin tution la dingin an neina'n a tlin si naw leiin an zirtirtu ha'n an hril bak chu a ma in a chawk ngat ngat el hlak a nih. "Ka chawk ka chawka, chawk dawk chang chu ka nei ve el hlak," ti'n Mathhematics subject an suolpui dan a hril.
Aizawl ah school ṭha ah kai ngei a nuom thu a hrila, a hobby chu movie le reading ana, class-X exam an buotsai lai khan darkar 6-7 lekha a tiem hlak.
Given hin hmun hran hrana inthawkin lawmpuitu a neia, mimal damin lawmpuina thilpekhai an peka, Serlui bieltu MLA Pu Lalrinsanga Ralte chun lawmpuina thilpek Rs 10,000 lai an hlan a nih.
Hmatieng a fe peina dingah ditsakna vochuom ei inhlan.
Given lawmpuina chibai bûk nuomtuhai chun a pa number-8258870685 a hin biek paw thei a nih.
