Responsive Ad Slot

2nd State Level Ginger Festival Pherzawl: Narrative Report

Wednesday, May 8, 2019

/ Posted by Simon L Infimate
~ Lalruotlien Hmar. Inf. & Pub. GFOC

2nd State Level Ginger Festival, Thupui: “Market Stability, Quantity & Quality Production” chu ni 2 & 3 May, 2019 khan District Headquarters Pherzawl khuoah hmang a nih. “Ân hawi em el, ka la dam phawt chun, a hung invêl nâwk tieng țhang nâwk ngêi ngêi ka tih’, ti’n ân lo hmang zo tah.
GFOC’n program hmang hun ding a ni dinghai a suk fel zo hnunga, ei ni hmang hun ding haia khawmuol siet ding ân hrillâwk leia organizing committee-hai lungril sâwl zie mawl kha….Pathien kuomah ân țawngțaia. Ân țawngțaina Pathienin a dawn a nih. Inringnawna tieng pangah, ei unau Parbung-hai le Damdiei ha’n motor eksiden ân tuok pal hlau ti naw kha chu; khawmuol le boruok inhawi tak hnuoiah hlimtlâng takin Festival chu ei țumțiek thei a nih.


Motor 407 eksiden na a chuong hi mi 52 (nuhmei 18 le pasal 34) zet ân nih a. Chuonglai chun mi 6 hai chu ân na zuol deu leiin, hmunpui panpui ân nih. Hi ân eksidenna hmun hi Pherzawl le Elim inkâr, Pherzawl a’nthawka 2 km vêl a hnai a nih. Festival hmang dinga hung Medical Team le Parbung CHC a Doctor le Nurse ha’n hliem tuokhai ân enkawl zung zung a. Medical Team-hai ân inpêkzona le ân țuonțhatna hai mipui inpâk ân hlaw tak meu. Hmunpui pan dinga an rifarhai chuongna ding motor hung pehai; Pu Ramsangthang Pherzawl lalpa, Pu Lalringum Inbuon, Chairman GFOC le Pu Derrick L Khawbung SDO hai chunga le eksiden a țhang Parbung chena thak dân ding ngaituotu ei DC le MST Bus driver hai chungah mipui chun ei lâwm hle a nih.

A nipui ni 2 May 2019 huna program uopmawituhai chu hienghai hi ân nih: Pi Mannuamching, IAS. DC Pherzawl (Chief Guest) –a pasal khawmin a hung uop ve, Pu Debdutta Sharma, Project Director MOMA (Functional President), Pu Thianlaljoy Gante, ADC Pherzawl (Guest of Honour), Pu Phiamphu Khamsanglien, State Manager, Clover Organic Pvt. Ltd. (Chief Host), Pu Lalhmangpui, MDC, Pherzawl, Pi Lalhminglien ZEO Pherzawl, Lalthanzam Fimate SDO Pherzawl, Pu Derrick L Khawbung, SDO Vangai, Pu Solomon Neihsial, DFM Med Dept., Pu David Kilong, SDPO Thanlon, Pu Thomson, SDC Pherzawl, Pu Thangchinlian, DFO, Pherzawl, Capt. Amit Verma 33 A/R, Pu Kh Jayanta Singh, SDC, Pherzawl, Pu Mangminthang Gangte, DIO CCPur, Pu Suanlian Tungnung, Reporter DIPR, Pu O ibomcha, Cameraman DIPR, Pu Bijoy, Sub Editor Hueiyen Lanpao, DDK Imphal team le Manmasi Cable hai ân nih. Pastors ieamanizât in ân mi uop bawk.

Hlasakthiem Pu Laltuoklien @ Pistol Puokruk (The Hmar Super Rock Star), Pu Lalbieklien (kohran upa ni tah), Nk Ramhlunnei, Pi Lalneihlim, Lalramlawm, le Lalthangsang hai ân nih. Chun, Ginger Choir (Pherzawl le Tinsuong) in Theme Song “Hung Ro Ginger Festival ah”, (phuoktu Famtah Pu James Songrolal) hla thiem mangkhenga ân sak khawm ngaiman a um hle. Sûn hun ahin, Cultural Troupes hieng Joutung, Tinsuong le Parbung Govt Higher Sec School ha’n hnam lâm chi hrang hrang inentirna ân nei bawk.

Ama, Pu Laltuoklien khawmin Aithîng Festival hla a phuok thar hlawk, stage zâwllai ânthawka mipui a hang Rock khum zet  chu a um țawk țawk thei tukhawm ân um nawh. “Hmarram Aithîng hi farsi kalasi a nih….sathu changal inhuom betbawta ei hang suong chu…”, tihai a hla thu a hin a zep a nih. Pu Laltuoklien hin nau 5 neiin, tuhin Damdiei, Vervek Mizoram khuoah a sûnghai leh ân khawsa a. GFOC in Cell Phone a nein aw lei a, a bie nuom tam tak ha’n ân inbiekpaw pui thei naw thu ân hriet leiin Jio Phone thar ân Present nghe nghe. Ân biek paw pui  nuomhai chun 6009213223 ah biek thei zing ân tah.

Sûn hun le zân huna thuhriltuhai thuhril lâktawi:

Chief Host:- Phiamphu Khamsanglien, State Manager. Clover Organic. Pvt. Ltd.: Organic Farming a pawimaw zie a hril uor hle a. Manipur hi Organic State a hlângkai ei ni theina ding chun, Stage 2 ei la paltlang a ngai a. Tuhin, Stage-I a um chau ei ni leiin, Farmers-hai le mawphurtu Sorkâr department-hai nasa nâwk zuola hma ei lâk a țul a nih. Stage-III ei kai hun a chu, ei product-hai hi International buyers hai leh ei insumdawngtu thei ding ân tah. Hieng ang ngirhmuna ei um theina ding chun, Sorkârin kum 3 sûng chen a mi ensin ding ana, ei Pherzawl District sûng a Farmers Interested Group mi 1000 inziekluthai khan țhang nasa taka in lâk a țul ding a nih.

Guest of Honour:- Pu Thianlaljoy Gangte. ADC/Pherzawl: Sum le pai ei lamsuokhai hi a hmang dân thiem a țûl zie a hril a. Second income opportunity ei nei theina ding khawm hi lo sinthawtu ha’n ei zawng hi a pawimaw hle a nih. Mitinin sum hi ei lam thei senga, saving tuma inren taka economic hmang tum hi ei tam naw hle a nih.

Funtional President:- Pu Debdutta Sharma, PD. MOMA: GFOC hmalakna zârin, nikum a’nthawk khan Pherzawl District sung a hin, Agriculture development project hai ei hung intlung tir a. Aithîng chîngtuhai ta dingin Minimum Support Price Rs 20 lakh khawm ei CM in a mi hung pêk a. Pu Lalringum, Chairman GFOC in Department hrang hranghai ah tlân kuolin, CM a chen hma a hung lâk peia. State Level Implementing Committee a le Cabinet a khawm râwl hung insuoin, mipui ta dingin țhahnem a ngai em em el hi kan ta dinga challenge ropuitak a nih. Farmers Interested Group (FIG) members zât ding Sorkârin a mi phal chin chu mi 500 chau ana, hi khawm hi mi 1000 ni theina, GFOC hmalakna leiin, ei nei tah a nih. Memberhai ta dingin kumtin an account ah Rs. 7500/- pêk ni bawk ân tih. Aithîng sawngbâwlna khawl khawm, Parbung le Pherzawl khuoah hmang el thei ta, a in dinghai leh ințhut a ni tah. Cold Storage khawm ei nei vat ding an tah. Tuta țum hin Generator 2, Plastic basket, weed cutter le aithing damdawi iemanizât Farmers hai ta ding hung phur a nih.

Tukum ang bawkin, nikum hun sung khawm khan ei âithîng hai kha Manipur State puotieng ei thawn dawka. Agreement ei zieka, aithing 1000 MT inpek ding ei ti a. Thil rinum pakhat chu, ei Aithîng inchawtuhai khan pil nawi ân inchawksa kha a nih. “Pil inchawk dinga agreement siem ei ni nawh a, âithîng inchâwk ding kan nih aw”, an mi ti pêk chu inzak a um hle a nih.

Chief Guest:- Pi Mannuamching, IAS. DC/Pherzawl: Manipur Organic Mission Agency hmalkna’n Aithîng khawl 3, Pherzawl, Parbung, Lungthulien ahai ei nei tah a, Farmers mi 1000 inzieklutin ei um ta bawk a nih. Hi Farmers Group a hin MOMA khawm hin Vangai Range tieng khawm hma hung la dingin ka ngen a. Govt of Manipur Agri & Horti Dept chung a khawm lâwmthu ka hril a nih. Lo sinthawna hi sin inzaum a nih (Farming is a respectful job) Sinthawtuhai hi mi taima ân na, inzaum an nih, Officer-hai nêkin ân hrisêla, ân hlim bîk a nih. Tukum Pherzawl District a ei Aithîng tharsuok hi ân diktak ka hriet nawh a chu, 3000 MT vêl ni ka ringa. A poisa a sût chun Crore iemanizat chu ei bielin ei lamsuok ding a nih. Chuleiin, ei ADC in a hril ang khan, sum saving hi ei changkangna ding chun uor hle ding a nih.

Zân hun Chief Guest:- Pu Ngursanglur Sanate, Ex-Minister: Nu le pahai ân hadam a hun tah. Vawisûna țhalaihai hin sinthawna kawnga ei nu le pahai hi inâwl tum tâng ei tieu. Țhalaihai hin, ei insûng, ei khawtlâng le ei ram hi tung ding tum ei tieu..Ram le hnam siem ding hin sum le pai a pawimaw kher nawh a, indikna le taimâkna hai a pawimaw lem a nih. Pherzawl khuo hi ei District Hqtrs a ni leiin, a sunga chêng mipuihai hi lungril lien, hmangaina hai hi ei put a țûl a nih..
Pu Vanlalhlun Hrangchal, DGM. MSPDCL Special Invitee khawmin zân hunah thuhriltawi a nei ve.

A nipui ni tak hun tawpna ah Pu Lalhmangpui, MDC in lawmthu hrilna a nei zovin, DC in, Truck 2 sipa Aithîng load sa a um, Nahakpam Food & Beverage ha’n Manipur State puotienga ân thawnsuok ding chu, a vei liem a, Stall 20 chuong lai siema um le lohmasuok chi dang dang ân pholanghai Inspection thaw in sûn hun chu hmang zo a nih. 
Sûn hun a hin GFOC chun CM kuoma Memorandum an ziek chu ei DC kutah pêk ana, hi lekha a hin, ei tui fâk harsat ziehai le Medical facilities ei nei țhatnawziehai zieklangin ei harsatna hai mi hung hliepkieng pêk dingin a ngên.

Zân programme chu Pherzawl Community Hall ah hmang a nih a. Mipui hall kenglo rakin ân tam hle a. Ginger Festival Theme Song “Hung Ro Ginger Festivalah” (Famtah Pu James Songrolal hlaphuok) a Hlapawl inruolsiekna neiin, Pu Barjohn, Chief Judges, Pu Ramhluothang, Pu Michael L Infimate le Pu Lalsiemsang ha’n hi inruolsiekna hi ân conduct a. Tinsuongin a pakhatna ân lâk a, Pherzawl in a pahnina an lâk a, lawman Rs. 20000/-, Rs. 15000/- inhlân ân nih. Nk Elizabeth of Tinsuong in Western Dance thawin mipui a hang inher khum chu a thiemin a en ân hawia, a entuhai po po kha ân pang asil tâwl hle ka ring.

Ni 3 May 2019 Community Hall ah zingbu fâk hma’n hun hmang nâwk a nih a. Medical Team ha’n  Awareness on Anti-Tobacco hun an hmang zovin Farmers Group membershai leh GFOC Orientation hun a țhuoi nghal a. Hi huna thurêlhai chu hieng a hnuoia hai hi ân nih:
1. Kum 2020 Ginger Festival vawi-3na ding chu March thla sung ni ngei ni sien ti a nih.
2. Pherzawl District sunga Aithing sîk râwntak chu lâwmman pêk ning a tih.
3. James Songrolal Memorial Award siem nâwk a nih. Hi lawman hi Pu Joseph R Hmar, President HI in ân tiem:
Pakhatna-Rs. $0000, Pahnina-Rs. 30000, Pathumna-Rs. 20000, Palina-Rs. 10000.
4. 3rd State Level Ginger Festival neina hmun ding le a ni ding chu GFOC mawphurna ding a nih.
Hi program hmang zovin, GFOC in Alu Rs. 15/- per kg, Purunsen Rs 20/- per kg in mipui kuomah â pêk.









Aithing khawl siena in, Parbung

Don't Miss
© all rights reserved
made with by Simon L Infimate