Responsive Ad Slot

71st General Assembly hmang mek; 2019-2022 sunga thuoitu ding thlang

Saturday, March 9, 2019

/ Published by Ralsun Hmar
Rengkai, 09 March, 2019, Virthli (ONP): Evangelical Assembly Church, ECCI chun "Seltaka tlan" Heb. 12:1 thupuia hmangin Rengkai EAC Biekin, Bible Hill, Rengkai-ah General Assembly a vawi 71-na an hmang mek. EAC inkhawmpui lien hi March 06, 2019 (Nilaini) khan tan a ni a, March 07, 2019 (Ningani) khan Council Inthung nei niin March 08, 2019 (Zirtawpni) a inthawk khan Assembly rorel tan a nih. Vawisun (March 09, 2019) khan kum 2019-2022 term sunga EAC Kohran thuoitu ding thlangna nei a ni a; hieng a hnuoia hai hi palai fekhawm haiin lungruol takin an thlang tling:

1. Executive Director - Rev. Lalkhamlien
2. Missions & Evangelism Director - Rev. Laldinglien
3. Finance Director - Rev. Lalngaizuol
4. Relief & Development Director - Pu Simon L Hrangchal
5. Evangelist at Large - Rev. Zawllienmawi
6. 2020 Assembly Moderator - Rev. Dr. Lalrosiem Songate
7. Conference Secretary (Jr) - Pu Simon L Hrangchal

EAC 71st General Assembly a thang ding hin biel tum tuma inthawk palai le mipui thahnem tawk tak an fekhawm a, Rev. Challienkung; Rev. Fimchawnthang; Rev. Lalkhamlien le Rev. Dr. Lalhmuoklien haiin Pathien thutaka rawngbawlna an nei tah a, mipui fekhawm haiin Pathien malsawmna tamtak an dawng.

Vawizan (March 09, 2019) biekna inkhawm hunah Mr. David Yoon, Director, ITC, S. Korea in Pathien thua rawngbawlna a nei a, Pathienni (March 10, 2019) zing biekna inkhawm hunah Rev. Dr. Lalrosiem Songate, Principal, ECT in Pathien thu hrilna a nei khelah EAC Assembly Musical Society in a buotsai Kristien Hlabu (Tonic Solfa edition) chu Rev. Huolthangsei Thiek, Executive Director in tlangzarna nei a tih. Kristien Hlabu (Tonic Solfa edition) a hin hla 601 lai sie niin leather cover le paper quality tha taka siem a nih.

Chawhnung inkhawm tinin "The Kingdom of God" ti thupui hmangin Seminar nei ning a ta, zan inkhawm-ah Rev. Huolthangsei Thiek, Executive Director in Pathien thua rawngbawlna nei bawk a tih. Inkhawmpui hun sung hin EAC Assembly Choir le unit tum tuma inthawk KTP hlapawl mawi tak tak ngaithlak an ni a, mipui fekhawm haiin Pathien malsawmna tamtak an dawng dinga beisei a nih.
Don't Miss
© all rights reserved
made with by Simon L Infimate