Responsive Ad Slot

Thla 6 sunga dingin SHC interim period pawtsei, HPC (D) lungawi lo

Monday, January 21, 2019

/ Published by Simon L Infimate
Aizawl, 21 January, 2019, Virthli (ONP): Mizoram sawrkar chun notification insuoin Sinlung Hills Council (SHC) interim period chu thlaruk sunga dingin a pawtsei nawka, council member nilai mek mi 10 peithlak an nih.

Order hi January ni 18, 2019 (Zirtawpni) a insuo nisienkhawm vawisun khan pek suok chau a ni thu, General Administration Department (GAD) thuneituhai chun an hril.

GAD Commissioner le Secretary Pu Lalthangpuia Sailo in order a'nsuo dungzuiin Mizoram Governor Pu Kummanam Rajasekharan chun SHC interim period chu thlaruk annawleh council election nei hun chen (a hmasa lem lem) pawtsei nawk a ni thu a puonga, Executive Member (EM) nilai mek Pu Lalthlamuana Hmar, Sakawrdai/Shillong chu Chief Executive Member (CEM) thar dinga ruot ani a, council member nilai Pu Lalmalsawma Darngawn, Tinghmun chu Chairman-ah ruot niin, HPC (D) Deputy Army Chief hlui Pu Lalbiaknunga, Saiphai chu Deputy Chairman in ruot nawk a nih.



Executive Member dingin mi 4 ruot an nia, chuonghai chu Pu Lalrosiem, Khawlian; Pu Ngursangkima, Phuaibuang; Pu R. Lalfakzuala, Sakawrdai le Nk Melody Lalchhuangzeli, Sakawrdai hai an nih.

Anni baka hin council member dingin mi 7 (nominated member 2 thangsain) - Pu D. Hmangaiha, Sakawrdai; Pu Lalengzauva, Ratu; Pu Lalruatliana, Saipum; Pu Zahmingliana, Vanbawng; Pu HC Lalmalsawma, Zohmun; Pu Rodinga, Khawlian (nominated) le Pu Khawlremthanga, Suangpuilawn (Nominated) hai ruot an ni bawk.

Council interim period thar hi January ni 8, 2018 anthawkin tiem tan ning a tih.

Tarlang tah angin SHC hi Congress keihruoi Mizoram sawrkar le Hmar People's Convention (Democratic) haiin April ni 2, 2018 a inremna thuthlung an ziek dungzuia siem ani a, July ni 9, 2018 khan Mizoram sawrkar chun notification insuoin thlaruk sunga dingin interim council indin a ni thu a puonga, July ni 13, 2018 khan CEM Pu Lalthalien le mi dang 13 hai chu council member-a laklut an lo nih. Interim period fe lai mek chu January ni 9, 2019 khan a lo tawp tah a nih.

Tuta tuma sawrkar order thar a hin Pu Lalthalien le council chairman ni lai mek Pu Lalthanglien @ LT Hmar thangsain member nilai mek mi 10 hai chu peithlak an nia, an ni hai ai hin HPC thuoituhlui mi 2, HPC (D) President pawl mi 2 bakah HSA thuoitu hlui, Mizoram HPC member le MNF party worker mi iemanizat laklut an nih.

A sin thar a chel le chel naw ding thuah zawna dawnin Pu Lalthlamuana Hmar chun tu ngirhmuna ding chun iengkhawm a la hril thei naw thu a hrila, HPC (D) thuoituhai le Hnam thuoituhaiin rem an ti phawt chun a sin thar hi chel pawi a ti naw thu a hril. CEM post hi chel theia a lo um chun mipui thlawpna le hnam organisation hran hran hai thangpuina a ngai hle ding thu a hril bawk a nih.

Hi lai zing hin HPC (D) thuoituhai chun sawrkar order chungthuah an lung a awinaw thu an hrila, interim period pawtsei ding chungchangah HPC (D) thuoituhai rawn an ni naw bakah sawrkarin a ditzawng MNF party mi le sa, a tam lem council member-a aruot chu hrietthiem harsa an ti thu le Sawrkar le HPC (D) hai inremna dungzuia SHC chu siem a ni leiin interim period sung na na na chu HPC (D) ex-cadre hai mi iemanizat council member-a an thang ve chu awm an ti thu an hril.

HPC (D) thuoitu pakhatin ei palai a hril danin HPC (D) Manipur Region le Assam Region hai chu sawrkar order le inzawmin joint meeting an nei ding thu a hrila, a tul anga hma lak an tum bawk niin a hril. Ei thulaknain a hril danin tuta tuma sawrkarin order a'nsuo a hin HPC (D) ex- cadre 1 bakah HPC (D) aiaw 2 an thanga, a dang po chu puotieng mi ni'n hril an nih.
Don't Miss
© all rights reserved
made with by Simon L Infimate