Responsive Ad Slot

Imphal ah Sikpui Ruoi ropui taka hmang, CM Khuollien a thangin Pherzawl chungchang tam tak a hril

Thursday, December 13, 2018

/ Published by Simon L Infimate
Imphal, December 13, 2018, Virthli (ONP): HSA Imphal JHQ bultumna hnuoia siem Team Sikpui Ruoi chun zani khan TRI Auditorium, Chingmeirong, Imphal hmunah Siel that meuin Sikpui Ruoi chu ropui takin an huoihawt. Hi huna hin Khuollien (Chief Guest) in Manipur Chief Minister Pu N. Biren Singh, Khuol Inzaum (Guest of Honour) in Th. Radheshyam Singh, Minister (Education, L& E) le Khuoltha (Special Guest) in Dr. Sapam Ranjan, Chairman, Tourism Corporation of Manipur Ltd hai an thanga; Chawngpulien (Chief Host) in Dr. Chaltonlien Amo le Sikpui Pa in Upa Lalrosung hmang a nih.

Khuollien Pu N. Biren Singh chun a thu hrilna ah Hmar hai chu hnam zaidam tak el le inchukna tieng khawm insang tak an nia, Manipur a hnam 33 um hai lai ah Hmar hi hmasawn pawl tak ani thu a hril. A thu hril huna chun Pherzawl District chungchang hril kaiin, ahmaa ngenna le zawna siema um hai a dawn. Pherzawl District headquarters sawn tumna iengkhawm a um naw thu a hril a, sawrkar hluiin Pherzawl chu full-fledged district a a lo puong tah chu tuta sawrkar khawm hin a pawm ve a, mipui phalna le remtina naw chun sawrkar in thil thaw ngai naw nih tiin a hril. Pu Biren chun helicopter service khawm Parbung le hmun dang dang ah tan ani vat ta ding thu, sawrkar hluin development works zo fel lova a sie hai an bawzui mek thu, tlangram kilkhawra um han siet le damnaw mangang an tuok chang a ding flying ambulance service á¹­anna dingin Rs.30 crore zet DoNER ministry in a sanctioned tah thu hai a hril.


Pu Biren Singh chun a hril peina ah aithing ching hai khawm an chawtu ding le zawrna ding ah an buoi ta nawa, hun sawtnawte hnunga Pherzawl khuo ah Cold storage iná¹­hut vat ani ding thu a hril.

Infepawna chungchang ah, Pu Biren chun Tipaimukh-Jiribam road chu survey thaw zo ani tah thu le hi lampui hi Union Minister for Road Transport and Highways Pu Nitin Gadkari kuomah National Highway ngirhmuna a puong dingin lekha a lo thawn tah thu le Churachandpur-Tipaimukh road siemna sin á¹­ha taka a fe mek thu a hril.

Imphal-Pherzawl MST bus service chungchang ah Pu Biren chun a lampuiin a zir phawt chun Parbung chen tlung dingin a hril.

Pherzawl district headquarters ah infrastructure hai siem mek ani thu le Primary Health Sub-Centre, Pherzawl chu District Hospital ngirhmun ah lotheiloa hlangkai hun la um a tih tiin a hril bawk.

Manipura Sikpui Ruoi Restricted Holiday a puong dinga ngenna le inzawmin Pu Biren chun hi chungchang hi a hung en le bawzui ngei dingin an tiem bawk a nih.

Pu Biren chun Manipur a hnam dang dang han inthuruolna an thlasam thu hai hrilin politician le sawrkar thuneitu haiin an mawphurna tak mipui hai rawngbawl chu an theinghil hlaka, politics chu hnam bing zawnga innghat ding an nawa, mipui hmangaina le lunginsietnaa innghat ding ani lem a nih tiin a hril.

Politician tam tak hai chu tlangram khawm kan ngai loin phairama umin, tlangram suk hmasawn dan ding hai hrilin, an á¹­awng 50 % khawm an suk dik ngai naw leiin mipuiin an á¹­awnghai an awi ta nawa, Politician hai hi mipuiin inza hai sien khawm an hnungtieng anthawkin rukru angin an hmu a, tuta sawrkar ruok hin chu hiengang ringzo nawna le ringhlana umhai hi suk bo a tuma, tlangram hai suk hmasawn tumin a dawt dawtin hma a lak mek a nih tiin a hril.

Khuollien bakah Sikpui Pa Upa Lalrosung le Geust dang hai khawmin thu hrilna an neia, Dr. John Pulamte, Convenor, Team Sikpui Ruoi 2018 le Chawngpulien Dr. Chalton lien Amo, Hon'ble MLA haiin remchang inchawin hi huna hin nasa takin Hmar hnam le Pherzawl district chungchang ah CM kuoma ngena hai an siem. Pu Dr. Chaltonlien Amo chun Sikpui Ruoi hi Manipur a khawm restricted holiday ni ve dingin a hnia, Helicopter service khawm thla khat ah vawihni bek um sien, Jiri-Vangai road a hmaa lo um kha National Highway a inchang tir, MTS Bus service Parbung chen in tlung tir, Pherzawl a Bank in umtir a, á¹­ha deua in function tir, damdawiin chungchang le a dang dang hai a hril. Hieng ngenna an siem hai hi Pu Biren in a thuhril huna a tam lem a dawn a nih.

Hi huna hin kum 2018 sunga Imphal HYA Member fam lo chang tah hai sunna le an maksan an sung le kuo hai ta dinga á¹­awngá¹­ai pekna Rev. Lalnghatlien Songate in a nei a, Pu Lalthalien, Chief Executive Member, Sinlung Hills Council, Mizoram, Sikpui Pa Upa Lalrosung, Dr. L. Fimate, Director, MIMER, Mizoram, Pu John Tlangtinkhuma, IAS joint secretary, Government of Manipur hai chu chawimawina inhlan anni bawk a nih.

Cultural dance unau Kom Cultural Troupe haiin an inentir bakah MU le DM College HSA Unit haiin thiem takin an nei a, naupang haiin hmu nuom um tak el Traditional Fashion Show le Parade hai neiin mipui mit an suk thlei hle a nih.

Cultural Dance, Hlapawl le Lengkhawm Hla haia inruolsiekna nei ani bakah Mr. & Miss Sikpui thlangna Branch tin anthawka mi pahni seng an thlangdawk hai laia inthawkin Mr le Miss dingin Pu Kennedy le Grace Lalthlawnpek Khawbung hai thlang an nih.

Formal prokram hmang zo a niin Cultural le music tienga insukhlimna hun hmang ani a, hi huna hin tulai rimawi khawvela inlar ve ve Tv. Jajai Singsit le Nk. Christina Shakum haiin hnesaw takin mipui an inawi a nih.

Ruoi inhlanna le hun khar á¹­awngá¹­aina Rev. Hrangchunghnung in a nei a, Sielsa hmepawk le chartang inhnik tawk tak el kiltlangin Sikpui Ruoi chu hlim taka hmang zo a nih.







Don't Miss
© all rights reserved
made with by Simon L Infimate