Responsive Ad Slot

HUN HMANG FIMKHUR EI TIU

Sunday, December 30, 2018

/ Posted by VIRTHLI
~ Jami Darngawn

Lalpa'n kum 2018 ni 365 hraw ding step a mi daw pek chu a tawp chena hraw suok zo ta lova fam lo chang tah mi tamtak an um, ṭhenkhat chu Lalpa'n hun a ti ta leia a lo ṭhuoi ta khawm um an ta, ṭhenkhat ruok chu, an thil thaw’n a zir naw leia hunlo taka hringna chân khawm tamtak um an tih. Pathien lunginsietna zar chauva ei hang hraw suok bik el ding hi lawm a va um de aw! Lalpa chu inpâkin um raw se.


January 1, 2018 a'nthawka vawisunni chen, ei hun hmang ta hai hang suikîr inla, Lalpa hmaa ngirpui tlâk lo tam tak nei tâwl mei ei tih! I nitin hun hmang dân Cinema Hall ah insuo ding lo ni ta sien, Pathien le ei ṭhen le ruolhai en ve dinga ei phal/ngam lo ding, mani khawma ei en ngam ta lo ding tamtak um mei a tih!! Hun hmang hi fimkhur a va ṭul de aw!! A iengpo khawm lo nisien, hi Bible thu ka tiem hin mihriemhai, Pathien lunginsietna zâr chau a ei vângnei ziet a thar takin ka hriet suok a nih. Isai 43:18 & 25 chun, “Kha hmaa thilhai chu hre zing ta naw unla, ngaituo bawk naw ro” “In suolnahai khawm hrezing ta naw ningah” a ti a nih. I kum hlui suolnahai Pathien hmaa I phar ngam lo ding hai, insira i sim a ni phawt chun, “Hriezing ta naw ning, ngaidam ka ti che” ei Lalpa chun a ti a nih. Lalpa chu inpâkin um raw se.

Awleh, kum 2019 ei chuongkai ding mek hi, milien, michin, mi hausa le rethei, in ang rawngin ei hmang/ei ziek sip dingin lekhabu/hun thar hlawk Lalpa'n a mi pêk ding a nih. Ei hmang dân le ziek dân dinghai chu inang naw hleng a tih. Deu.11:12b chun, "Lalpa in Pathien mit chu kum thara inthawka a tawp chenin a fu hlak" a ti a nih. Unau, tuva inthawk a tâwp chen’in ei hun hmang dân haiah Lalpa mit ei chungah a fu zing a nih! Pathien mit hmu le mi mit hmua ei phar ngam lo ding hai chu, ziek dâl/thaw dâl ei tiu. “Kum thar 2019 Lalpa'n a mi present ding hi fimkhur takin, a mi presenttu Lalpa dit dân ang takin hmang ei tiu” ti chu ei infielna a nih.

Kei khawm ka hringna hi a derthawng em ema, thuok harsat hi ka nei hlak a nih, ka mihriem ngaidan chun hi khawvel a hin ka chamsawt ka ring ngai nawh. Zani zan mangang, takang (Mang angdeu)  khan mi pakhat a hmêl ka la hmu ngai lo le hriet ngai lo chun "I sawl thei em ṭhuoi el tang ka che" tiin mi ṭhuoi ding chun a hunga, chuonga mi ṭhuoi dinga hung chu pasal ni awm tak niin ka hriet a, mi puitling tak le mi hriethiem em em a nih, a kuoma um chu anhawiin a hadam em ema, khang ang mihriem kha hi khawvel a hin ka la tawng/hmu ngai nawh. (Lalpa Vântirko a ni hiel naw am a nih ?) Khawvel mihriem sungkhat ei nuhmei, pasal le nauhai ei inhmangai ang an nawh. Lalpa a'nthawk a nih ti chu ka chieng hle !

Chuongchun, ngai aum em lei chun ka lo zui el tah a, lam chenna vel kan tlung chun ka lungrila damte'n  pasal le naunei ka ni ti ka hung inhrietsuok leiin zui sawng chu ka ngam nawk ta nawh a, a kuoma chun ka zui thei naw ding thu ka hril tah a, chuongchun a mi maksan tah a nih. Ka hung har phut chu ka mang a lo ni zinga, maktakin ka thuok harsatna popo kha a bo vawnga ka va lawm de !

Chu umzie chu lo zui sawng lang chu ka lo thi el ding kha a'na, amiruokchu Lalpa'n hi khawvel a hin A hmangruo pakhat ni ve dingin Ami la dit lei ning a ta, Ami la ṭhuoi naw phawt chu ni hih ! Tiin ka ngai a nih.

Chuleichun kum a tawp hlak angin, nang le kei khawm vawikhat chu ei hringnun hi a la tawp/thi ngei ding ani a, ei damlai hin Ami siemtu Pathien ditdan ang tak le fimkhur takin ei hringnunhai hmang hlak ei tiu khai.

TIEMTU POPO LALPA'N MALSAWM RAW SEN CHE/CHEU.
Don't Miss
© all rights reserved
made with by Simon L Infimate