Responsive Ad Slot

HAA huoihawtna hnuoiah Lengkhawm Hla inruolsiekna nei

Saturday, December 15, 2018

/ Posted by Simon L Infimate
Saikawt, December 14, 2018, Virthli(ONP): Hmar Artists’ Association GHQ huoihawtna hnuoiah December 14, 2018 dar 10:30AM khan Saikawt Youth Club Hall ah HAA Imphal JHQ le Tuiṭhapui huop sunga HAA Units tum tum han Lengkhawm Hla a inruolsiekna an nei. Hun hmasa tieng HAA Anthem mipuiin sakna an nei a. Hi huna hin Chief Host in Mrs. Lalrengpui Keivom, Promoter, HAA. GHQ a ṭhang a, mipui fekhawmhai kuomah lawmlutna thucha hrilna hun a hmang. Hi huna hin hi programe sponsor tu- Nk. Margareth Ramtharsiem anthawk thuhril tawi ngaithlak a nih a. Nk. Margareth in thu a hrilna a chun tulai ṭhangtharhai lai hla hriet rawn an tlawm chu pawi a ti thu a hril a, Krismas lengkhawmna le lusun inahai hla hriet rawn an tlawm leia harsatna ei tuok hlak thu hai hrilin, ṭhangthar hai lai hla hriet rawn an pung pei theina ding le lengkhawmna a hai khuongpu thei ding ṭhalai tam tak sersuok an ni pei theina dinga hieng ang ‘Lengkhawm Hla a inruolsiekna‘ hi huoihawt a ni thu a hril a. Hla hi Pathien ei chawimawina le inpakna dinga hmangruo pawimaw takel ani thu hrilin hla hriet rawn a pawimaw thu ursun takin a hril. Hi inruolsiekna a hin Kristien Hlabu le Independent Hlabu anthawk hla 15 thlang dawk ani a, an hla pawt fuk fuk inruolsieknaa ṭhanghai hin an sak pei a nih.


Hi huna hin “Hmar Artists’ Pa- (L) James Songrolal Songate” hrietzingna le inzana suklangnain toṭawka sunna hunser hmang a ni a, Pu Lalvullien Hmar, President, HAA GHQ in chawimawina hunser a hmang. Hi huna hin Hmar hnam sunga organization tum tum a ṭhuoituhai khawma uop vein, thuhrilna hun an hmang tawl. Hi inruolsiekna a hin HAA Unit tum tum- Rengkai Unit, Muolvaiphei Unit, Thenmuol Unit, Thingchom Unit, Saidan Unit le HPC(D) Unit an ṭhang a. Inruolsiekna result chu hieng ang hi a nih: 1st Prize- Saidan Unit (Rs. 20,000), 2nd – Rengkai Unit (Rs. 10,000), 3rd- Muolvaiphei Unit (Rs. 7000). Hi inruolsiekna a ṭhang hai po Consolation prize Rs. 1500 seng pek an ni a. Hi huna hin HAA Unit thar- HPC (D) HAA Unit hai Rs. 5000 inhlan an ni bawk. Hi inruolsiekna a endiktuhai chu- Rev. H.P. Runremthang, Rev. Lalhmingthang Famhoite, Rev. C. Lalthlunglien , Rev. John Lalnunmawi, Laltlanmawia, Pu Lalsuong Famhoite, Pu P.C Lalrawngbawla le Pi Vanlalhriet an nih.



Zan program hmang hunah Chief Guest in Pu L. Sanga Hmar, Defence Secretary, HPC (D) a ṭhang a, Mr. Josh Hmar, Town Commander anthawk thuhril tawi ngaithlak ani a, ama a inthawk hin Pathien thu ṭha tak el ngaithlak a nih. Hi hunser hmang huna hin Hmar Artiste hai- Joseph M. Pakhuongte, Boia Puruolte, Hossanmawi Songate, Melody Varte, Alfred Lalremruot, Joslyn Infimate, Gloria Khawlhring le Gladys Lalparzo Sanate han hla in mipui fekhawm hai an inawi a, hi hunser hmang huna hin Ruoi inhnik tak el kiltlang a nih.

Don't Miss
© all rights reserved
made with by Simon L Infimate