Responsive Ad Slot

MI THIL EI PEK HIN FIMKHUR A NGAI HLE

Sunday, September 9, 2018

/ Posted by Simon L Infimate
~ Jami Darngawn.

✍ Thilpek hi inhawi ka ti zawng tak a na, ka neiin tlin sien chu mihai kuoma thilpek hi ka nuom tak a nih.

Tulai ( August 25, 2018) chu ka ruolnu hai in ah Pathien thua inpawlna kei ni nupa leh an ni nupa leh kan nei hlak a, zani chu ka ruolnu thilpek iem a'ni bek pek ka nuoma, ka thilnei laia hlu ka ti tak le kan ro lai ngei pek ka nuom a, ka thilpek tum chu hang en dingin a ho (simple) taluo a nih. Sienkhawm ka nei laia hlu ka ti laia țhang a ni leiin ditsak takin ka pek tum a nih.


Ka ruolnu hi Pathienin a hmang em ema, thlaraumi indiktak a nih. Pathienin ka ruolnu fethlengin mi tamtak thlarau bohmang ding a sansuok taha, lan sansuoktir pei bawk a tih. Thilmak tak tak thuruk inthup hai khawm ka ruolnu fetlengin Lalpan a hung puong hlak a nih.

Kei khawm ka nina Lalpan ka ruolnu fethlengin a mi puong/hrila andik thei ngei el, Lalpan ka ruolnu fethlenga a mi hril pakhat char hung suklang ka tih. "Lalpa'n thuziek theina a pek che a, ziek pei rawh" ti a nih.

Ka ruolnu hi miha'n thilpek chidang dang khawm an lo pek tawl taha, amiruokchu miha'n thil an pek hin a lak ding le ding naw Lalpa a rawn hlaka, a petuha'n inro sa saa an pek chun Lalpan la lo dingin a ti hlak a nih. Kei ka thilpek khawm kha Lalpa a hang rawna, Lalpa chun "A thil nei laia hlutak phal taka a pek che a nih, keikhawm ka lawm. Amiruokchu a pasalin a lo insit/zapui a nih" a hung tia, ka pasal chun hienghin a hril "Ava mak de aw !! Andik a nih Jami'n ka thil nei laia hlutak a zuk ti kukha ka lo inzak/insit a nih asanchu a simple ema, a thilnei danghai neka a hlutna ding awm ka hriet nawa a nih" a hung tia, ka ruolnu chun "Lalpan lungril tieng a en hlak a nih" a tia mak tiin kan innui tawl a.

Ani ngei ei mihriem chanpui hai thil ei pek khawm nisien Lalpa hminga ei pek a ni leiin Lalpa lawm a tling ding am aw ? Ti hi ngaituo tham a nih.

Thilpek kawnga nisien, thuhrilna khawnga nisien, mihriem hai mitmei en lova Lalpa Pathien mitmei en hi a pawimaw takzet a nih.

Luke 21:
1. Chun a dâk suok a, mi hausahân thawlawm bawma an thawlawm thlâk lai a hmu a.

2. Chun hmeithai pasetak tuinamanih dâr tangka pahni a hung thlâk a hmu bawk a.

3. Chuongchun “Titakzetin ka hril cheu hi, hienghai popo nêk hin hi hmeithai pasetak hin a thlâk tam lem;

4. Hienghai popo hin an nei liem chu Pathien ta din thawlawmah an thlâk a nih; ama ruok hin chu a pasiet veileh, a khawsakpui dinga a nei sun chu a thlâk vong a nih,” a ta.

LALPAN A THU MALSAWM RAW SEH.
Don't Miss
© all rights reserved
made with by Simon L Infimate