Responsive Ad Slot

Joint Organisation haiin Siet-that ah uksak an ni naw ding thu an puong

Tuesday, September 25, 2018

/ Posted by Simon Infimate
Hmarkhawlien, September 25, 2018, Virthli (ONP): Diger Compound a cheng Pu Lalhmangai le Pi Zonunthieng hai chu Siet-ṭhat ah Barak Valley sunga Hmar mipuihaiin uksak nawng an tih tiin Barak Valley sunga Hmar hnam binga Joint Organisation chun a puong.

September 14 khan Hmar National Union (HNU), Assam chair lakna hnuoia Barak Valley-a Joint Organisations (HNU Assam, Hmar Inpui Barak Valley Region, Hmar Youth’s Association, Hmar Students’ Association) hai chu inṭhungkhawmna an nei a, Diger Village Council le Diger khawsungmi Pu Lalhmangai le Pi Zonunthieng hai kara buoina thua Diger khawtlang  ṭhuoituhaiin HNU Assam in rel fel pek dinga lekha an pek chu ngaituona an nei a. “Pi Zonunthieng le Pu Lalhmangai haiin, “Diger khawtlang rorelna kan kal el bak ah, Hnam rorelna khawm inza der lo le pawmtlak ah kan ngai nawh,” an ti leiin SIET-ṬHAT khawm lo tuok hai sien, Barak Valley sunga Hmar mipuihaiin uksak nawng an tih,” tiin Pu Lalhmangai le Pi Zonunthieng hai uksak an ni nawna ding san Joint Meeting Resolution extract copy chun a tarlang a. “Hi dan pawisa lova lo bawsetuhai chu hnam rorelna bawsetu ah ngai ning an tih,” tiin Pu Lalhmangai le Pi Zonunthieng hai Siet-ṭhat an tuoka lo bawisawmtuhai hmakhuo ding a tarlang sa bawk. Diger khawtlang ṭhuoitu le mipuihai chu hi le inzawma ṭawng lo insum dingin an hriettir bawk a nih.


Organisation pali ṭhanga Joint Meeting Resolution an siem a chun Diger khawtlang ṭhuoituhaiin sa zawrna In an bawl, an hmanglai zing chu sawrkar tienga inthawkin sawiselna (objection) a um naw chun sunzawm pei ni sien, Pu Lalhmangai khawmin lo sawiselin lo sukbuoi ta naw sien la, Sa Tax chungchang khawtlangin DAN a izam chu la fe pei sien an ti thu an hril a. Pi Zonunthieng le Pu Lalhmangai haiin Diger Village Council ṭhuoituhai Sawrkar ah hekna case an lo zu peklut chu Hmar Customary Dan ah sukrem theina lampui a um el am ti beiseina leia case hnukkir dinga inhriettir an lo ni tah thu le case an hnukkir nuom naw leia Diger khawtlang ṭhuoituhai khawmin an thei ang anga lo bawzui ve dinga inhriettir ni sien an ti thu an hril bawk a. “A ṭul a ni chun Joint Organisations haiin thlawp an tih,”  tiin Barak Valley sunga Organisation pali intelkhawmhai chun Diger Village Council ṭhuoituhai a ṭul dan dungzuia an thlawp ding thu an hril bawk a nih. (input:THT)
Don't Miss
© all rights reserved
made with by Simon L Infimate