Responsive Ad Slot

ZAKAI ANGA DUNG INHNUOI KA LO NIH

Sunday, August 19, 2018

/ Posted by Simon Infimate
~ Jami Darngawn

✍ Mi țhenkhat chun ka chanchin ka ziek/hril hlak leia mi lo nghawk/chim khawm an lo um thei a nih ti chu ka hriet zing de khawmin, mi anga inchukna țha le hrietna insang ka nei naw leiin ka phak tawk chin ka tawnhriet hai bawk hi ka thei ve sun ani leiin inphalam um sienkhawm Lalpa mi țhuoidan hi Ama ropuina dingin hung suklang nawk ka tih.

Awleh, Pathien zar chauvin ka nau lutir ding ka vawn/pai țan hlim a'nthawkin kan sungkuo chu kan hlim em ema ka pasal hi a ma chauh unau nuhmei pali 4 laia pasal umsun ani lei khawm chu ning a'ta nau pasal kan dit em em a nih. Keia tiengkhawm unau nuhmei pali 4 kan niha unau pasal ka neinaw leiin nau pasal chu ka
dit hle bawk a nih.


Chuongchun Pathien kuomah ka nau lutir dingin nau pasal ka lo hni mawl mawl hlak a nih. Bible a ei hmu angin Hanna chun bungheiin Lalpa kuoma nau pasal a lo hnia Lalpan nau pasal a pek ngeia chuongchun A petu Lalpa Rawngbawl dingin a pek let ve a nih ti ei hmu a nih.

Kei khawmin Hanna kha lo entawnin Lalpa kuoma nau pasal bunggeiin ka lo hni hlak a. "Lalpa l Rawngbawltu ding nau pasal mi pe rawh" tiin ka lo hni hlak a nih.

Vawikhat chu ka nau nei ding hun hma deu thlakhat vela chun ka Nu (ka tarpi) chun hieng hin a hrila "Nau hming ding ka lungrila hung um chu Zakai a nih.  Zakai in a khan Lalpa lsu a tlung a nih" tiin kan nupa kuoma chun ka Nu chun a hril tah a. Kei chun ka nau lutir hming dinga Zakai a hang ni el ding chu harsa ka ti deua chu ka Nu thuhril chu kan za leiin iengkhawm ka hril nawh a, ka pasal ruokchun kan nau lutir hming dinga Zakai ti chu a dit naw thu a hril suok nghe nghe a nih.

Chuongchun Lalpa zar chauvin Dt. 12-10-2002 khan nau ditumtak ka nau lutir ding chun nau pasalte pekin ka um tah a, amiruokchu kan lawm em em laizingin ka naute chu vangduoithlak takin a pienghun taka a pieng ta naw lei chun thi vangin chau takin a hung piengsuok taha, ka naute chu a hriselna a țhat tawk naw lei chun ka kuoma khawm zal thei ta lovin hun iemanichen chu ICU rooma a mi um peka, kan sungkuo chu kan mangang hle a nih.

Chuonga lungngai le beidawnga kan um lai chun Lalpa Rawl ka hriet tah a, ka naute piengna ding hmun Hospitala kan lut nia ka lo hmu chu,  mangang tak angin puonvar sil mi pakhat hin nau pasalte a hung pawma "hi naute hi i ta ding a nih amiruokchu a chunga thuneina iengkhawm i nei nawh" tia mi hung hriltu kha ka lungrila chieng em emin a hung inlang nawk a, chun ka Nu'n kan naute hming dinga 'Zakai' a lo ti kan nupaa kan lo dit naw dam kha ka hung dit thar em em nawk tah a. Zakai ka lo tluk zo naw ziet dam kha chieng em emin ka lungrila a hung um a nih. Chuongchun ka Nu kuoma ngaidam kan hnia kan naute hming dinga Zakai a lo ti kha lungawitakin ka nau lutir hming ding chun Zakai hming kan lo inputtir tah a nih.

Chun,  hnam hming țhangsa a nuom leiin ka Nu chun "Darngawn" hming chawiin 'Dar' ti char kha kan laka "Darzakai" ti chu ka nau lutir hming dingin lungawi takin kan siem/phuok tah a nih.
Kan tunu Esther chun 'Alex' tiin a hung siem/phuok vea chuongchun iengtika ka dawng ngai lo le nei ngailo nau hming ditum  takel 'Alex Darzakai Nu' chu ka lo nizing tah a nih.
Lalpa ka lawm ie.

Awleh, Biblea Zakai hi ei hriet seng ring a um, mi dung tawi ani leiin Lal lsu lampuia a hung  ding kha mipui laia a lo hmu phak naw ding leiin theichang kunga a lo kai a nih ti ei hmu a nih.
Lal lsu chun Zakaiin lungril le titakzeta a hmu nuom ti a hriet leiin a lawm em em a nih ti ei hmu bawk a nih.

Luke 19:
9. Chun Isun a kuomah, “Voisûn hi ina hin sandamna a hung tlung tah, ama khawm Abraham naupa a ni si a;

Ani ngei maw !  Kei ah, kan insung ah, Lal lsu a hung tlung nuom dim aw ? Sandamna kan chang kim am aw ? ti chu mani seng indawn a țul ngei de !!

Abraham naunu/naupa ni theina ding chun Zakai anga mani nina inhriet chienga ei suolhai sima  Lalpa Pathien lungril le titakzeta zawnga hmu chu a nih.

Ziektu kei hi taksa piengdana chu  (chapona thu nilovin) dung insang tak ka nih a, mi lai ka um khawma ka dung insang leia inzak hlak kha ka lo nih, sienkhawm Lalpa Pathien mi hmu dana (thlarau rama chun) dung inhnuoi takel Zakai khawm ka lo tluk zo naw a nih.

Ani ngei khawvel rama chu thiemna, varna, hausakna, hmingthangna insang tak tak ei ti hai khawm hi thlarau rama chu Lalpa Pathien hmu dana chun inhnuoi takel khawm an lo ni thei a nih.

Amiruokchu mani nina inhrietchiengna, misuol ei nina, tlinglo ei nina,  Zakai inhrietchiengna anga mani nina hin Lal lsu hmel ei hmu phak naw ziet ei inhrieta Lalpa lsu țhatna le felna chauva Pathien Ram lut/hmu thei ei nih ti chu ei chiengpha, mani țhatna nita lovin Lal lsu zar chauvin  Lalpa Pathien Thlarau Thienghlim ei nia a hung um/cheng hlak a nih.

Atawp taka dingin :
Hanna anga ka țawngțaina kha dawnin ka um a, Samuel angin ka naupa hi Pathien Zawlnei/Thiempu ni naw sienkhawm, taksa ram taka chun ka nau lutir hin a mita a hmu hai a mawiziet hrilsuok thei naw sienkhawm, a fe nuomna hmuna hai fe thei naw sienkhawm, mihriem hai chawl hadamna hun,  zan huna chawl hadam thei naw sienkhawm,  Pathien le ka nau lutir Alex Darzakai zarin hiengang ngirhmuna um thei ka nih ti chu ka puong a nih.

LALPÂN ROPUINA CHANG RAW SEH.
Don't Miss
© all rights reserved
made with by Simon L Infimate